US omte ading in Good News, kigensawn tek ni ei!! Thupi lua mahmah! ~ Dai Za Mang
Ni (4) bang kikup nawi dikdek khitciangin, Demo le Repub alangtuak in, kipsak taktak ta uhhi. Tuni ahihkeileh Friday Ni ciang, Pu Trump in tua Bill Sign thuu tading hi.
Natna Galdo nading Dawl 3 na Economic Relief Package Phase 3 aading akigawm vekpi $2 Trillion kiim bei ding cihi. Hamphatna tampi kigelh himahleh, Zomite tawh akinahvawh pawlkhatte bek ong gelh ing.
1. US Gammite tungah Check Sum pia ding
- (A) Kum Khat sumlut $75000 nuaisiah anei Single khat in – $1200 ngah ding.
- (B) Pasal le Zi nupa nasem khawm a, Kum khat Sumlut $150000 nuaisiah aneite in – $2400 ngahding
- (C) Ta neite Kum (17) le anuaisiah in, Ta khat ciang $500 ngahbeh ding.
- (D) Kum khat Sumlut $99000 anei Single khat in bangmah ngahlo ding.
- (E) Kum khat Sumlut $198000 anei Nu Pa nasem khawm te in, bangmah ngahlo ding
(F) Sumlut pen 2019 Kum tungtawn in kituat masa dinga, 2019 Tax File nailo te pen 2018 Sumlut tawh kituat dinghi. Check pen April kha sungin Direct Deposit tawh ong kipia dinga, Direct Deposit ahihlo te in, Mail pan ong kikhak dinghi. Shiauh kul lo a, Tax na File lai a, napiak Bank Account tungtawn in Kumpi in ong vaihawm dinghi. Ngah ding kilawm napi, angahlo ih omleh, ki thuza ni. Tax File ngei khempeuh in ngah dinghi.
2. 401K (Retirement Program khat peuhpeuh) pan sum na thoh leh (Withdraw) 10% penalty piakkul lo dinghi. Sumthoh pen Leitawi la (Loan) hilo hi. 401K hitaleh Sumkholna khat peuhpeuh ah ahun ciangtan ma in, sum ih thoh leh, 10% penalty piakkul hamtang hi.
401K pen nang ma Kum 59 le alang na cin ciang, sum na thoh leh, 10% Penalty piakkullo a, tuama na thoh leh 10% penalty piakkul hamtang hi. Hihpen Kumpi thukhun ahihi. Ahizongin, Covid-19 hangin cihmawh dongtuahna hanga 401K sum na neih khempeuh na thoh leh, 10% Penalty piakkul nawnlo hi.
3. Unemployment Benefit pen kha (4) sung, kal khat $600 pia ding
Natna huhau a Nasepna Company pan ong ki Lay-Off zenzen leh, na omna State Kumpi tungah Unemployment Benefit shiau ding cin a, na omna State in ong piak zahzah baan ah, Federal Kumpi in Kha (4) sung, kal khat $600 ong piak beh dinghi. Hih Fund aadingin $250 Billion kiseh hi.
Gentehna: Michigan State aom khat in, Michigan State Kumpi tungpan Kal khat $300 na ngah leh, Federal Kumpi in $600 ong piakbeh ding ahihman-in, akigawm $900 ngah ding cihna hi. State khat le khat ong piakzah ub kibanglo hi.
Hih hamphatna pen Company nasemte aading bek hilo a, Self-Employed akici Sushi Sai neite, Kawlsai, Zosai neite le Independent Contractor te’ aading zong ahihi. Ahizongin hih hamphatna pen ong ki Lay-off kei leh nang tawh kisai lo hi. Aki Lay-off te aading bek hi.
Hih Benefit pen Republican Party in deihlo Reject Nial ahihman-in Senate sungah Vote kila a, 48-48 kikhia ahihman-in, kikipsak suak veve hi.
4. Covid-19 Natna tawh kisai kikep kidal nadingin na Company Insurance tawh Siikhan/zato kilahna aom ciangin Copay piakkul lohi.
5. Kal sial le kha sial a ihpiak Tax tuamtuamte, pia nailo phot dingin, 2021 kum bei’ lam ciang, ih piakzah ding lak pan alang bek pia pan dingin, 2022 Kum ciang, acianlai alang pia ding. Tuadan deihlo a, angeina bangin ong kidok lel hen na cih leh zong, nang thuthu hi.
6. Student Loan leiba neite in Sept 30 ni ciang, ameet lo tawh payment khiinto thei dinghi. Dai Za Mang @ Mangpi
Comment piaknop aomleh...