Mi zolsiam zong kisam ~ Hau Za Cin

Mi zolsiam zong kisam ~ Hau Za Cin

‘Nungak a hoih tata in tangval a maizum theilo teng ngah’ cih kamleng khawng kiza thei zel hi! Zong ahi takpi thu hihtuak a, ahi thei thu zong na himawk hi. Bang hang: a zol siam uh hiven!!

Nungak helna bek ah hilo in sumlei sumzuakna ah, politics leh vaihawmna, pawlpi leh kipawlna kalsuanna khat peuh ah zong midang zol siamna kisam mahmah hi. Mi khempeuh lawp kinkenlo a, lawp mah leh zol tektek a ut pawl om a, zol kullo a makaite nung thuap pahpah mi zong a om hang kitam mahmah masalo hi.

Tua ahih leh bangci mi zol siam ding? Makaite in mipi a zol ding ciangin a zol kulna thu a tel mahmah kisam hi. Mipi zolzo in semkhawm le uh nakpi takin mi khempeuh in phattuampih ding hi cih a tel mahmah ding ahi hi. Mipi ama makaihna nungzui ding, amah makaipa/nu nasem dinga zol hilo zaw in mipite phattuampih ding nasep gina, nasep lian om hi cih a telsak mahmah ding kisam hi.

Tua a theihna dingin makai khat in amakaihna mun ah a kisam thu, behlap ding, puahphat ding, zuunbeh ding a kisamteng a theih kisam hi. Mukhol ding cihna hi. Mailam ah i tuah ding thute na mukhol dinga, a sep ding zia zong na kankhia in, a semkhawm dingin mipi hong zol ding cihna ahi hi.

Mi a zol ciangin mi khempeuh in thukimpih ding hilo a, a thukimpih pawlkhat in zong lamkal ah nusia dinga, mi pawlkhat in a zu a ham ah zui ding hi cih a theih ding ahi hi. Mite in a kicingzaw in a thu, a vai a tel nop leh a dot ding uh hi a, a dong a om leh a dawng thei dingin a kiginkholh ding ahi hi.

Tua bang a dawng thei dingin makai khat, mipi matheh a omte in thu theihna hunkhom khat a neih kisam ahi hi. Thu thei bek hilo in gelkholh siamna, kiginkholh theihna zong kisam hi. Lungduaina kisam a, thudikna, thumanna kisama, mite lungdamna ding leh mite lawpna lam zong a theih kisam hi. Thukhentat siamna a neih kisam a, manlang taka thu gensiamna, manlah taka mite lungdamsak siamnate zong a neih kisam hi.

Nang a mizol in na pan leh na zolna ding a hang teltak in na theih kisam hi. Zolzo hi lecin na zolzawh mite tawh na kalsuanzia ding zong na gensiam kul a, na tonpih siam zong kul hi. Na zol ciang na kammal zat ding, na hopih zia ding, na kiho ding uh thu khempeuh ngaihsutsa in na neih ding ahi hi.

Nang deihna bek hilo in, amah, na zol ding mite lunglutna, a lungluanna lam uh na tel kisam a, na theihpih, na lunglutpih, na ukpih siam kisam ding hi. Kamsiam tak, kamnem tak, itna takpi tawh, deihsakna takpi tawh, sepkhop ding utna takpi tawh na holimpih, na zol ding, na kuaisawm ding ahi hi.

Na kiho uh ciang, na zol ciangin na mizolte a lunglut maw lunglutlo maw cih zong telsiam inla, zawhthawh thu tawh hih kha kei in. A lunglut mello ciin na muh leh lungkia kenla, zol dan lampi laih kik in. Na deihna a hang ciantak in gensiang sitset in. A hoihna, a khialh theihna cihte zong a kul leh genin.

A tel theih dingin gentehna tawh lak thei in. Hih bang vai nei leng bangci sep leng a hoihtam cih bangin dotbawl lecin na mizolte lungsim kitel semsem ding hi. A telsiam pah kei leh hun pia lai inla, damin zol kik in. Nang zong na zolzia ding kisin in thuhoihzaw, thu kilawmzaw leh a lampi ding na kanbeh in.

Na zol zawh leh hoih a, na zol zawh kei leh zong zol teitei kenla, na zolna tawpsan hun omsak in. Na zolte in na deihna a tel hun om dinga, tua ciangin hong zom veve ding a, a lunglutlo ding ahih leh lah zol zawh cih om tuanlo ding hi. Ahi zongin mi na zol ciangin na zolzo kei zongin na zolna a hang na gen kikkik ding lunghiang kei in. Na khahsuah hun dong, na khahsuah khit ciangin zong na kimuh sim in na zolna thulu genkik zelzel in.

Mi zolsiam zong siamna khat hi a, makai khempeuh, mipi khempeuh in i kisin ding, i neih ding, i siam ding a kisam ahi hi. Niangtui dawn ding ciang bek hilo, nungak hel ciang bek hilo, lawm leh gual tawh kikholh ciang, pawlpi kalsuan ciang, politics ah, minam vai ah — vai khempeuh ah mi tawh kikholhsiam, kizolsiam zong a kul mahmah khat ahi hi. Hau Za Cin (Phuitong Liim)