Malaysia palik te’n Subang Jaya sungah kolbulhsa in mikhat taisuah

Malaysia palik te’n Subang Jaya sungah kolbulhsa in mikhat taisuah

Malaysian Police te’n Subang Jaya sungah kolbulhsa in amatsa uh mikhat khahsuahkik cih theStar pan kiza hi. Tuapa minpen Wan Mokhta Zaimin ci’n pulak uha, kum 32 aphakhin khat ahihi.

Hihpa pen mikhemkhem “Criminal breach of trust” tawh zanni Friday in akiman hi ci’n Subang Jaya OCPD Asst Comm Mohammad Azlin Sadari in tuni Statement abawlna ah genkhia hi.

Zannitak in Police te’n mawtaw tawh apuak laitak in USJ9 sungah akhut kol kibulhsa in taisuah uhhi. Palik nihin Kelantan panin USJ9 aom District Headquarters ah apaipih laitak in mat athuakpa’n kacina ci’n lua ahih manin, zatui zuakna Pharmacy khatah khawlin palik khatin zatui leiding in paikhia hi.

Palik khatpa zatui leiding in apaikhiat laitak in akhatpa zong kumkhia in mawtaw anunglam ah apailaitak mawtaw anung tutna ah kolbulhsa in akoih amimatpa uh ahawlpa tutna ah tusuk in mawtaw tawh taikhia vingveng hi.

Tua palik mawtaw pen tuamunpan in 3 km agamlatna munkhat ah ki mukik a, ahi zongin amimatpa uh mangciplai hi.

Amimatpa uh kacina ci’n luakhia takpi ahih manin, hehpihhuai sa uh a, zatuisai khatah zatui leiding in palik khatpa apaikhia ahihi. Akhatpa zong mawtaw anungbuk vankoihna ah vankhat lakhiading in apailaitak amimatpa un mawtaw tawh ataisan vingveng ahihi.

Mimatsa khat akhahsuah palik nihte zong hoihtak in Guidelines zuilo uhhiam cih ki kankhiading a, azuihkeileh anih un thu kibawlding cihi. “Section 223 of the Penal Code for negligence by a public servant” cih thukhun tawh kizui in palik nihte’nzong mikhat ataisuah manin lehthuakkik khatheiding uh cih kiza hi.

More: Malaysia: Pistol tawh innkuan mi 4 akaplumpa zong Palik te’n kaplumta

Khuasung mipi te’n amukha na om uhleh amanlang in palik te tungah hih phone 03 7862 7100 tawh hong zasak un ci’n ACP Mohammad Azlin in genkhia hi. ZD Sawltak #zomidaily