Mangpha Pu Vungh Za Dai (Neng Khaw Cin) Hatlang beh, Kum 71

Dahna Pulakna : Mangpha Pu Vungh Za Dai (Neng Khaw Cin) Kum 71, Hatlang Beh
USA gam, Oklahoma State, Tulsa khuapi a teng Pu Neng Khaw Cin Kum 71 (Hatlang beh) in abeisa October 02, 2016 ni zingsanglam nai 6:00 AM kimpawlin Tulsa khuapi sunga om St. Francis Zatopi panin mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.

Pu Neng Khaw Cin pen Zogam, Tonzang uksung, Saipimual khuami Pu Lam Za Gin leh Pi Cing Za Dim ten tapasal 6 leh tanumei 2 a neihna sung uhah a upapen zom leh Pasal lakah a upipen ahihi. ong nusiasa Rev. Dr. Chin Do Kham pianpih laizom zong ahihi. a it mahmah a zi Nu Cing Ngaih Man a tanu Lia Zen San Cing, a tapa Tg. Gin Sian Muang te tawh nuntakhuasakna anuamzawding lunggulhna tawh abeisa 2013 kumin USA, Tulsa khuapi ongtung uh ahihi.

Pu Neng Khaw Cin te innkuanpen Tulsa khuapi bulphuh Zomite kipawlkhopna Zomi Innkuan Oklahoma ah pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai kipawlnaah Active member khat ahihna uhtawh kizui-in ZIUSA Genvai thukhun ombangin Pu Neng Khaw Cin pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi. Hih akipiakkhiat luangphamna sumtepen USA gamsung muntuamtuampana ZIUSA Genvai thukhunpom pawlmi 8,000 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.

I it mahmah Pu Neng Khaw Cin tawh a nunungpen hunzatkhopding pen ongtungding October 08, 2016 (Saturday) ni 1:00 PM hunin Fitzgerald Southwood Colonial Chapel 3612 E 91st St, Tulsa, OK 74137 ah FEMC Pawlpite makaihna tawh a nunungpen hehnep hunbawlna kineiding hi. tuakhitciangin Rolling Oaks Memorial Gardens Cemetery 4300 E 91st St, Tulsa OK 74137 ah daitansakna/Vuina kineidinghi.

I it mahmah Pu Cin ongnusiatna hanga adah akap, alunglengkhuangai pianpih sanggam laizomteng leh khuapihtuipih tanaumeltheih akuamapeuh adiakin a nusiat a itmahmah azi Nu Cing Ngaih Man leh a tano tegel tungah Meigong tagahte a nusia ngeilo, a maute pasal/Pa dinmun ah a pangden ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.

Dahpihna lianpitawh,

Executive Committee
Zomi Innkuan USA, Inc.
October 06, 2016