Malaysia UNHCR zumpi ni 4 sung akizom in kikhakding

Malaysia UNHCR zumpi ni 4 sung akizom in kikhakding

Malaysia gamsung ah Merdeka Day leh Hari Raya Korban ni thupinih kizom ahih manin, Public Holiday ninih sungtak kizomto hi. Tua ahih manin UNHCR zumpi zong hih Public Holidays te kikhak ding cih UNHCR-CLU te tungtawn in kiza hi.

Merdeka Day ahih keileh Independence Day pen 31 August 2017 (Thursday) ni hi a, Malaysia gam ii suahtakni nithupi mahmah ahih manin Public Holiday in ki ciamteh a, UNHCR zumpi zong aki khakding ahihi.

01 September 2017 (Friday) nizong gammi te biakna pawi nithupi “Hari Raya Korban” ahih manin, Public Holiday mahin ki ciamteh a, UNHCR zumpi zong aki khakding ahihi.

Tua ahih manin hongtungding zinglethai Thursday & Friday ninih pen Public Holiday hi a, zum kikhakding hi. Tuaban ah Saturday & Sunday tawh kizomsuak ahih manin, akigawm in ni 4 sungtak UNHCR zumpi akikhakding ahihi.

04 September 2017 (Monday) ni ciangbek in UNHCR zumpi ki hongkik panding ahih manin, zumvai akansawm ahih keileh UN Card tettan Renew sawm cihte’n hih zumkhakni atheihnading in nalawm nagual te na hilhsawn un.

UN vai gen kizom in nungsungteng mipi te’n ih buaipih, ih lunghimawh mahmah MyRC Card bawlding vaizong tulaitak thebetkhiat bangin hong daikhipkhep leuleu hi. SEA Games tawh ih kumpi thunei te buaiphot tadih uh ahikhadiam, SEA Games hong mansiangleh bangvai hong gingkhiasak leuleu uhdiam aw…

Related: Malaysia Home Ministry te’n UNHCR Card tawite ii Background sitciansawm

Tuaban ah Kawlgam ciahnuamte’n Myanmar Embassy tungtawn in akibawl, CI ngenin ciahthei ihcihpenzong Malaysia Immigration Department te’n “Immigration’s 3+1 programme” ci’n ciamteh uhhi. Hih Immigration’s 3+1 programme zong tukum December khaciangbek ki ngahlaiding hi ci’n nung 18 August 2017 ni in theSun te’n Newspaper ah suahkhia uhhi. “No further extension for Immigration’s 3+1 programme after Dec 31”

Ani akha ahun hongtung taktakleh bangthu hongpiangdiam cihbel genciantheih omlianlozel hi. Tulaitak gamthumna Resettlement vailah hizatzat mello banah Kawlgam ciahkiknuam te nangawn ahun beibeipian taleh kilawmmawk ahih manin, lungkhamna kibehlap semsem hi. Kawlgam Rohingya te vaitawh Malaysia gamsung ahzong Myanmar akicih nakleh gammi biakna te’n hong nuamtuam hetloding cih theihsa in koihden in, hawhna ciahna ah pilvang in kidawm ciatni. Sawltak #zomidaily