A Manpha Zogam ~ Paul Thangpi

A Manpha Zogam ~ Paul Thangpi

Thumasa
Amasa in Zomite leitung ah Zomi hi ing ci-a Minam khat hihtheih nang leh Zogam ci-in Zongei na, Zopau, Zolai zat theihna Gam hong pia Pasian tung ah lungdam thu ko masa hang. Minam khat koi pan kipan, bang hun in kipan cih theih nang in Pau pan ki kan hi. Leitung ah Minam khat ciaptehna ngah theih nangin Gam, leitang neih kisam hi. Gam, leitang i neih kei leh bangzah takin mi i tam zongin minam lian in hong kiciamteh thei lo hi.

Minam Khat Kipatna Pau (Language) tawh kikan masa

Leitung ah Pau nam 7000 val om. Tua teng khenpi 4 in ki khen: 1) Indo-European (Europe lam), 2) Sino-Tibetan (Asia lam), 3) Semitic (Arab, Israel, Sehnelgam lam) le 4) Banto (Africa lam). Sino-Tibetan sung ah Pau nam 250 om, tua sung ah Tibeto-Burma nam khat in kihel. Tibeto-Burma sung ah Pau nam 400 val om in Zopau (Zomi pau) nam khat in kihel hi. I pau Tibet lam pau tawh kinai ahihmanin i piankhiatna zong Tibet kiim cihna hipah hi.

Tibeto-Burma Pau etkaakna Pawlkhat

Pasian’ cih Kammal hong Piankhiatna

‘Pa’ tibet kam in ‘Pa’ (father) hi in, ‘Tian’ pen Sen pau in ‘Van’ (heaven) acihna hi. Pasian cih kamal a Original in ‘Patian’ hi kha ding hi. Tua man in Lamka lam, Mizo lam leh Sihzang lam te’n ‘Pathian’ na ci uhhi. Pasian (Pathian) akhiatna in ‘Vantung a om thunei pa’ cihna hi. Hih kammal i et ciangin Zomite kipatna mun Tibet leh Sen gam lam ahihna ki mu thei hi (britannica .com /topic/tian).

Zomite Piankhiatna

Sikang(Xikang)-Tibetan Plateau (Sikang-Tibet Mualvum Zang)

Leitung ah Plateau (Mualvum Zang) tampi om hi: 1) Tibetan Plateau, 2) Columbia Plateau (USA nitumna lam), 3) Atarctic Plateau, 4) Colorado Plateau, (USA Colorado state), 5) The Deccan Plateau (India) cihbangin om in tua sungah Tibetan-Plateau a zai pen hi. A zai na 2.5 millions Km² (1.5 millions miles²) hi. Sikang(Xikang)-Tibetan Plateau, Tibet gam le Sen gam kikal ah om in azai na 924,000 Km² (356,000 miles²), Kawlgam zah khat-le-alang in zai hi.

Sikang(Xikang)-Tibetan Plateau ahihtheihna

Tibet gam tangtawng pek pan Buddhist biakna abia gam hi. Tibet Ukpi (Emperor) masa pen Songtsen Gampo (AD 569-649) in Buddhist akauh mahmah Sen zi leh Nepal zi nei in Tibet gamteng Buddhist suak hi. Zomite tangthu ah ipu ipa te cikmah hun in buddhist asuah lam ki gen/ ki za ngeilo hi. Tibet khuapi Lhasa pan Ukpi te’ ukna gam taktak ah Zomi ipu ipa te om hi leh buddhist na suak ngei ngel ding uhhi. Sikang-Tibetan Plateau mun nidang in “Kham” kici in 1939 kum ciangin Sen kumpi in Sikang (Xikang) province in a min khel hi. Tibet gam ah Gelukpa Buddhism bia in, Kham (Sikang) ah biakna tuamtuam bia hi. Kham a om te “Khampa” kici in Tibet taktak te tawh pau le ngeina tampi kibang napi’n tampi mah kilamdang hi. (tibetculturetour.com/about-kham-tibet).

Kham (Sikang) ah nidangin kumpi 20 val bang om in amau-le-amau ki uk hi. Tua kumpi 20 val te lak ah kumpi a hat zaw deuh: 1) Muli (Muli Tibetan Autonomous), 2) Chakla (Sichuan province), 3) Dege (Sichuan province), 4) Lingtsang (Sichuan province) le 5) Nangchen (Yushu Tibetan Autonomous) cihbang ahihi (thelandofsnows.com/kham).

Kum AD 600-900 sung Tibet le Sen (Han Kumpi) in sak le khang pan sim in pawlkhat Tibette suak in pawlkhat Sente suak hi. A sim khaklohte minam neuneu in om suak hi. Hih aki sim khalo minam sung ah “Qiang” minam te kihel hi (china-guide.de/qiang.minority). Sen gam ah minam 56 om in tua sung ah Qiang minam khat in kihel in Tibeto-Burma pau azang nam ahihi. Qiang le Jingpo (Kachin) kinai mahmah hi ci in Sen kumpi in ciamteh hi (wikpedia.org/jingpo-people).

Kachin (Jingphaw, Jingpo) te Sen te’ Ciaptehna

Sen (China) gam ah Kachin te Jingpo in kiciamteh hi. Mimal 150,000 bang pha in Sen gam minampi 56 lak ah kihel hi. Tu in Yunnan Province, Dehong Dai-Jingpo Autonomous ah om hi. Tanglai in Jingpo (Kachin) apu apa te Sikang (Xikang)-Tibetan Plateau nuailam ah om in damdam in Kawlgam le Yunnan gam lam ah lal suksuk hi ci-in Sen kumpi in na ciamteh hi (china.org.cn/jingpo). Tangthu ah Zomi le Kachin (Jingpo) unau kici hi (youtube.com/kachin&chin). Tua ahihleh Zomi zong a sanggamte pianna mah pan a pian kul hi. Tua ahihmanin Zomite zong Sikang-Tibetan Plateu (nidangin ‘Kham’ zong ki ci ngei) pan kipan hi ding hi.

Tibet pan Zogam(Ciimnuai) Atomin

Tibet pan Kawlzang (Kalay gam)

Cope Topa Zogam hong tun in Zomite kiang ah hih mun na tun zawh khang bangzah bang hita hiam, ci in a dawt leh khang 12 bang hita hi ci-in na dawng uhhi. Copa Topa November 1, 1910 in Tedim hong tung hi. Tua ma khang 12 pen kum 500 bang in tuatleng AD 1400 pawl in Zomite Khamtung/Zogam kitungto hileh kilawm hi. Tibet gam (Sikang-Tibetan Plateau, Sikang-Tibet Mualvum Zang) pan AD 850 pawl in khua lumna, zaang lei hoihna mun lam Tuikang (Zo gun, Chindwin river) dung zui in ki zuan hi. Gunkhawm (Khawhkhen) ah tua pan Kale-Kabaw ah kiteeng in tua pan damdam in Khamtung lam ah ki lal to hi (Khamtung mite’ Thu by Cope Topa).

Kawlzang (Kalay) pan Khamtung gam

Zomite Kalay gam a tung hun in Kawlgam Ava ukpi nuai ah om hi (Kum 1364-1555). Tua hun in Ava ukpi Minkhaung I (25 Nov. 1400-Feb. 1422) in ukpi asep lai tak hi (wikipedia.org/Burmamonarchs). Kalay gam teng a tupa Kyitaung Nyo uk sak hi. Kyitaung Nyo in Ava a, a pu kulhpi bang Kalay ah bawl in mipi nasia takin nasem sak hi. Mipite gim mahmah in a liam, a bai tampi om a, ni khat sung in khutme tawng, kheme tawng khut phaam khat bang om den hi kici hi. Hibangin gimna a thuak nuamlo teng mun dang ah damdam in lal hi. Zomite zong hih hun sung mah in Khamtung gam ah ki lal to hi (Siyinbaptist.wordpress.com).

Ciimnuai pan Mun Tuamtuam ah

Kawlzang (Kalay) panin Khamtung kizuan in Ciimnuai ah kiteng hi. Ciimnuai tun hun Saizang khua gei Ciimnuai munlui ah mualsuang kiphut in Kum 1420 in kiciamteh hi. Atunga Kalay gam Kyitaung Nyo uk sung tawh ki tuak hi. Ciimnuai pan in Kum 1500 pawlin Zomite mun tuamtuam ah ki khehthang in Sihzang, Teizang, Saizang, Zo, Vangteh, Dim, Khuano, Tedim cihbangin omna mun zui in Awkaih-Pau tuamtuam hong piang hi.

Gam Leitang neih Manphatna

Israel Gam: Galpi nihna lai Judah mite awm 6 bang aki thahna Gam kician aneihloh man ahihi. May 14, 1948 galpi nihna aven zawh kum 3 khitciang Judah mite in Israel gam ci-in Gam Leitang leitung theihpih in nei pan hi. Akiim a Arab gamteng in do huan zel in nuntakna, sisan tampi tawh nang zo ahihmanin tuni dong Israel cih leitung gamlim tung ah om ahihi. Galpi nihna lai in Gam kician nei hileh Nazi te’n a bawlsiat ciangin a gam vuah ciah in kihem thei ding hi.

Senkaku Islands: Taiwan gam gei, East China Sea ah Tai 7 patlee (7 miles²) bek apha Tuikulh khat Sen le Japan kituh in Galpi 3 na hih Tuikulh pan hong kipan thei ding kici liang hi. Nidang in thupi sa kholo, ngasa ben na ciang bek in kizang himahleh, 1968 in tua Tuikulh nuai ah Namgim tui piang cih atheih uhciang anei nuam kituh hi. Sen in kum 1500 pekpan ko a hi ci, Japan in lah kum 1898 Sen-Japan ki do pan kipan ko a hi ci. Sen te’n tua Tuikulh tung a Vanleng leng peuhpeuh ka kap khia ding uhhi ci-in genkhia, tua hangin Japan in Galkihunna (defense) budget 1.5% ($41.1 Billions) khan in Japan tangthu ah Galkihunna budget tam azat pen hun ahihi.

Falklands Tuikulh: Kum 1982 in Argentina gam nuai lam, Antarctica Taih neh a om British te Tuikulh Falklands kici Argentina le Britain kituh in nasia tak in kha 2 val ki do hi. Tua Tuikulh ah mi 2000 val bek teng in, gal kido na ah British galkap 255 si in 775 liam a, Argentina Galkap 649 si in 1657 liam hi. Akigawm in Galkap 3336 asi aliam om hi.

Leitung ah gam Dialkhai (Flag) khempeuh phial ah Colour a San om hi. Sisan tawh lei sa gam cihna hi. Alamdang ah bel ISIS te Dialkhai vomdeda ven maw.

Zogam, Zomite’ Gam

Leitang khat, gam khat ah i ten hangin kiim le paam pan gal le sate nang zokei leng i gam i leitang suak ngeilo hi. Zomite Khamtung i tung ciangin kuama omlohna mun ahihhangin Pawi gal, Kawl gal, Meitei gal cihbangin sak le khang pan gal tuamtuam in hong sim den hi.

Saizang Pawi Gal: Ciimnuai pan Saizang khua Pu Mang Sum Thawmte in sat hi ci-in tangthu ah kiciamteh hi. Thawmte in mang sem in, tua khitteh Tawmging, Gualnam, Sukte cihbangin na mang ngei hi. Tawmging mang sung hileh kilawm, Pawi gal hong tung in mitampi hong that ahihman in naupang tampi tak ta ngah in om hi. Ka pu Sim Hang (Tawmging tapa u pen) bang a kem ding omlo in Sihzang ten na kem uh hih tuak hi.

Meitei Gal: Zomite tangthu ah Meitei te tawh tam kido pen hi. Kum 1834 pan kipan Meitei ten hong sim den uhhi. Kum 1857 in meitei galkap 1500 Zogam sim dingin hong kuan in Zomi-Meitei gal masa kici hi. Kum 1875 in Meitei galkap 3000 Tedim sim dingin hong kuan kik hi. Khaici nam tuamtuam pua in a giahgiah na vuah tuh pahpah a, tua hun pan kipan Meitei kung, Be, Bal, Tangkun, cihte ki nei pan kici hi. Pu Kam Hau zi Pi Ciin Ngul a melhoih mahmah cih leh Saiha tampi neih cih meiteite sal a tai suah Ebuasah akici pa khat tung pan thei ahihmanin Pi Ciin Ngul a luppih masa ding leh Saiha teng atang ding ki seh khin uh ciliang hi (hong zawh ngap lua). Zomite’n na zo kik veve in Meitei te 2000 val si in Thau lawng 287 ngah hi. Mikangte hong tungciang tua Thau teng mah tawh na do uhhi.

Tedim, Zomite’ Khuatheih kipatna

Tedim khua pan Zomite’ khuatheihna (Civilization) hong kipan hi. Kum 1848 in Pu Kam Hau Thukhun hong om in tua pan kipan Zomite’ khuatheihna (Civilization) hong kipan hi. Tedim khua ah Thuk 9 vei kiciang hi kici hi. Gal tam in ki lal san zel cihna hi. Galte nang zo kei leng, Zomite’ khuatheihna omlo ding a, bek thamlo in sak le khang ah mi sila in ki om in Zomi cih minam omlo kha ding hi. Zomite tulaitak i zattang Pau zong Tedim tualsuak Pau hi in, i Lai zong Cope Topa in Tedim tualsuak Aw-Kaih tawh Lai hong bawl sak ahihi.

Thukhupna

Zomite tulaitak in Zogam, Kawlgam ah nuntak haksatna hangin leitung gam tuamtuam tung hi hang. Tu laitak lungmuangin nuam i sak mahmah hangin hun khat ciang, nuntakna lauhuai zah dongin om theih nawtloh hun hong tung ding hi. Tua hun ciangin ipu ipa te’n nuntakna le sisan tawh a lei sa gam, Zogam i ciahkik hun hong om ding hi. Tua ahihmanin gamdang i omom na pan Zogam leh Zomi leh-et kik ding hi hang. A Man Pha Zogam puah in, zuun ni.

Khuado hun nuam! (Happy Khuado!)

Rev. Pau Pian Thang (Paul Htang) Offenbach, Germany

Speech by Rev. Pau Pian Thang (Paul Htang)
Germany Zomi Khuado October 1, 2016 Frankfurt, Germany