Cidam nading in anekdet huai zatui hoihmahmah Siing (Ginger)

Cidam nading in anekdet huai zatui hoihmahmah Siing (Ginger)

Siing (Ginger) pen nisim nekdetding in ahoihmahmah khat ahihi. Siing pen Asia gampan in hongki pankhia kici a, Asia gamsung ahzong kilimzat phadiak pahhi. Asia gamsung aom te’n meh “Asian Cuisine” ahuan ciangin Siing pen kilimhel mahmah ci’n hongki ciaptehsak hi. Cidamna lamtawh kisai in leitung mipil misiam Scientist te’nzong hih Siing thutawh kisai in kancianna Research nanei uh a, cidamnading in hoihmahmah, Health Benefits tampi hongpi theihi cih mukhia uhhi.

Sungnim thuak noptuamsak (Calming nausea)

Sungnim ciangin Siing pen sungnim phatuamsak theihi ci’n WHO akici “World Health Organization” te’n ciamteh uhhi. Sungnim cihciang in naupaai in sungnim luaksuak cihzong hithei a, khualzin in mawtaw kham “Travel Sickness” cihte zong hithei hi. Tuaban ah zato ah Operation kibawl, Surgery kibawl ki at cihbang hunciangin zong Siing pen ahoihna om ahih manin, Chemotherapy zatuilak ahzong kihel hi. Mipil te Study bawlna ah Siing aki suvui 0.5g pan 1.5g kikalbang nekna hangin naupaai laitak sungnim luaksuak cihte phatuamsak mahmah ci uhhi.

Gilpi an gawizia baihsaktuam (Improving Digestion)

Siing sungah Gingerol kici zatui kihel ahih manin gilpi an gawizia baihsaktuam mahmah kici hi. Gilpi an gawina ah akisam sinkhatui “Bile” ngahtheih nadingin thahatsak cihi.

Thagui thatang natna phatuamsak (Reducing muscle pain)

Adiakdiak in Sports kimawlna tuamtuam akimawl zelzel te’n Siing pen nek huai mahmah hi. Siing nekna hangin cilehsa kham cihte leh thagui thatang natna te phatuamsak hi. USA panin Study akibawl “Journal of Pain” kici te’nzong ni 11 sung akizom in Siing 2g ta nedenleng Physical Exercise bawlna panin cilehsa natna te 25% phatuamsak hi ci’n amuhkhiatna ah suahkhia ngei uhhi.

Pumpi lumsaktuam (Warming the body)

Siing nekna hangin pumpi lumsaktuam hi ci’n “Traditional Chinese Medicine” te’n ciamteh uhhi. Pumpi lumsak nadingin ahoih mahmahkhat hi ci’nzong zatui in azatzat khat uh ahihi. Body Temperature khangsak in, adiakin phalbi khuadamlam ciangin Siing nekzelding hoihmahmah kici hi.

Gilzang Cancer pan hongdalthei (Preventing colon cancer)

Siing sungah “Anti-inflammatory Properties” kihel ahih manin, Siing nekna hangin gilzang Cancer ngahtheihna panin hongdalsak thei cihi. “Cancer Prevention Research” kici American Study bawlte’n amuhkhiat uh hi a, Siing nekzelna hangin gilzang Cancer ngahding akipelhsakthei himawk hi.

Huihdik baihsaktuam (Easing breathing)

US gam aom Columbia University te Study bawlna panin amuhkhiatna ah Siing sungah “Bronchodilator Properties” kihel ahih manin Asthma natna neite adingin huihdik baihsaktuam ci uhhi. Asthma natna pen Zopau in Haihut vei zong kici a, huihdik hamsa sa, nak hamsa sa cihte ahihi. Gawlsung bing, natsung bing cihtezong Siing neleng hoihtuam hi.

Siing pen Zogam ah asial bekbek in kinezaw a, asial bek aomding bangin ki ngaihsun khaliang hi. Gam khangto te ah Siing pen “Fresh Ginger” bekthamlo namtuamtuam in bawl uhhi. Capsule ci’n zatang bangdan in akibawl om a, aki gawivui “Ground Ginger Powder” cihbangzong omhi. Syrup ci’n bukkhuhza dingin atui in akibawlzong om a, Herbal Tea ci’n niangteh bangdan in dawntheihding in akibawl “Tea Bag” tuamtuamzong om hi.

Siing aki gawivui “Ground Ginger Power” tepen 1g ahih keileh 2g ciangin Siing asial “Fresh Ginger” 10g tawh kikim hi ci’n ki ciamteh hi.

Siing pen ahoihna namtampitak om a, ahi zongin lungtang hoihlo, lungtang tawh kisai in zatui ane te in amau thuin mawkneklo in siavuan te kiangah bangci nekding cih dongcianleh hoihzaw hi. ZD Sawltak #zomidaily