Nuta Lai Kikhak – 3 ~ Hau Za Cin

Nuta Lai Kikhak – 3

“Ka tapa aw, na laithak lah ngah pahlo ka hih manin tun na nau a man laitak ciin khat hong gelh leuleu ing. Koh lam ah Zomi leh Chin cih vai kithang mahmah. I tenna gam zong Chin State hi a ci pawl om, pawlkhat in lah Zogam cih ding hi aci pawl om. Koh nupi pawl bang a tua bang tepawl khawng zong a theilo kai ve vua. Noh omna lam ah a kithang hiam? Kuateng in Zomi deihzaw a, kua tengin Chin deihzaw hiam?

Nungkala mikhual khat hong zin bang ulian khat hi in, gamdang pan ci lai uh ei, lukhu palh deda te khu lailai. Ama genna ah, gamdang a omna lam vuah bel Zomi kici uh ci. Chin cih peuhmah zatloh ding ciin koh kiangah zong hong uang gen mahmah hi. Chin cih min tawh pawi ahi zong, vai khat peuh ahi zong a kibawlna peuhmah ah pailo ding bang ci zawzen ei. Ei hilo ihih manin ci.

Ahi zong amau omna khua ah bel ih Zomi Nam Ni pen Chin National day kici in Zomi akici te khawng peuhmah pen pailo uh hi ci. Ahi zongin lasa ding, thugen ding khawng bek in sam uh ci. Amah leh amah zong a kilehbulh gawp khawng tawh kibang e. Noh lam ah tua bang ahi hiam?

Koh inn lam pen na theihsa bangin mikhual khat peuh, a dangnaal khatpeuh in thugen in a tel kan lote in a um suk pahpah hilel ung. A gensiam peuh a hampha cih dan hi. Mipi kihai lua lai ahih cianga maw. Tua ahih kei leh zong a gen ngam, a pau ngam khat i thugen pen a kithupisak pahpah himai. Nungkum lama kong gen ngei, Tedim mi hi hang, Tedim Minam hi hang a kici zel te pen tu kum ciang hong dai deuh in a thak khat hong piang kik hizawta hi. Noh lam ah zong tua bang ahi hiam?

THU THAK: Tu zingsang na pa inn phaitam lam ah daileng dingin a pai leh lamsak pan lamnuai ah zulei in lam kaan in amah zong “hoihlo thei” ciin hong kileh kik, huansakte dailenbuk a va zat leh hong ciah lam ciang i kongsak ah kipuk in a khe hek sak.

Ka gengen hiveh aw — ei tapidaw bek hi nawnlo, Christian nangawn kihita a, tua bang lawki i hih lai, Pasian thu i theihma thute khawng zuih ding hinawnlo ka cihcih hiveh. Um nuamlo a, hong kileh tektek a, a pai ngeina ah pailo in innvengte aa a va zat leh peng tuanlo…. noh lam ah tua bang a hi lai hiam? Koh inn lam ah tua bang khawng hilai hi. Tapidaw i hih lai pek pan a kizang nawnlo, tun kal khat kisuanto in Christian na ngawn kisuakta in tua bang thu luite khawng zat nawnloh ding ka cih hiveh aw. Ka siapa uh na dong ning maw, bangcih ding cih?

Mai Kha December 12 Ciang: Zomi lasiamte in Chin minam khempeuh lasak pawi (All Chin Concert) ah lasa ding ci. Tua sanah lasa dingin Zomi, Tedim mi, Tonzang mi, Kawlpi pan, Thantlang pan, Matupi pan, etc… leh Zangkong, Mandalay dong pan hong pai ding uh ci. Nang zong hun na neih leh hong ciah teitei in maw. Muh nop mahmah ding, thupi mahmah ding ci. Leitung pianzawh i gam Chin State ah a thupi pen hilai ding ci uh. A mun ding Kawlpi pan gamla vetlo na mun Thangmual ah Stage bawl ding, motor tampi, Jeep tampi, Bus tampi zong pai ding ci. Galkap bu zong tampi hong pai ding, nungak zong mel hoih ding ci uh…. koh zong ka pai sawm uh hi. Na nau zong a lunglut pianpian a, amah bang fashion lamsang a uk mahmah hi a, tua lam khawng zong om maithei ci.

Chin mi khempeuh pai ding ahih manin Zomi te zong kihel teitei ding ci. Tedim mite zong kihel sawm tek ding ci. Tonzang pan, Cikha pan, zong a kihel ding kiteel khin ci. Mite lawp thei peuhmah. Nam Puan zong silh tek ding ci uh ei.

Letsong leh awards tampi kihawm ding. Zangkong pan zong Mentami leh Mante tampi hong uap ding. TV ah zong kilak ding ci.

Ka lai na ngah ciang hong thuk pah in aw. Koh na nau tawh ihmut suak, tui tawina zong gim pian hi ung. Tui pen to luan lo a, a suk luan sese man in, luitaw pan mualtungah ka puaktoh den uh kul hi. Noh lamah tui tawina bang kizang hiam? Phelkhai leh Galon khawng mah na zang uh hiam? Noh omna lam zong a thu hong zasak zel in maw.

Amelikah cih bek kiza in, mi gam khawngah galdo in pai den uh a ci a, a takpi mah hiam? Mi gam ah galdo in pai cih ciang ni bangzah bang pai uh hi ding hiam? I khua pan Tonsim pai tawh koi gamla zaw ding hiam?

Tua zah at phot ding hi ing. Na nau a ihmut suaklua ta. Na pa lah a khe natsak tawh kingeksak in lum ial ual khinta hi. Koh na nau tawh bek hita ung. Na nau zong nungakno cih bang bek ahih hang a lawmte kiang pan a theih hi hiam, “Parcel Ka Pai Ut” peuh ci thei zel. Ken lah muang nailo, a nikbawk ten zong sawt nailo hiven. Bangci pai peuhmah ding. A pai theita diam ciin hong dong nuam khawng zong om zanzan ei. Tu ciang ciang bel ka phal nai kei hi. Nang zong na phal nai ding ka um kei hi.

Khatvei vei a heh ciang “lai ka sim ut nawn kei, parcel ka pai ut zaw” peuh ci thong — ka nial luat ding lah a lai a kiat takpi ding lau. Tulai inn lam nidang banglo hi. A vekpi in bel hong gen kei ning in, tawmtawm hong gen lai ning. Na pa bangin bel inn lam ah i om sang i tapa omna lam ah pai leng a nuamzaw ding hi peuh ci thei gawpgawp, ken bel um peuhkmahlo. Bangci pai theih peuhmah ding, na pi, ka nu in hong phal ding maw? Phal peuhmahlo ding hiven.

Gennop tampi tawh tua zah in hunsak phot ning. Ka tawpna dingin i khua ah nidanga galkap tum pa na thei na. A pensen zawh hong ciah in, a namdang zi neih tawh hong tung bialbual in, Sial tawh na dawn uh hi. Ahih hang khuasung ah kithu neisak ut peuhmah in, hausate thu gen khempeuh khawng nial gawpgawp, hang gawpgawp hi. Mi khat thugen za peuh leh hansan, ama thu kingai kei peuh leh hansan ahih cianga, khuasung tangvalte in a min ding khat phuaksak uh e, banga tua pen, na thei na? Na theih kei leh hong gen in maw? A kik ciang hong gen ning.

Ka tawpna dingin zingciang koh numei pawl in mai kha ciang kumthak ding ahih manin December kha a bei lian leh January a kipat lian manin lungdamna lak dingin nungakno banga kizem ciat dingin Sweet December laia ka laam bang vua laam ding ci uh ei. Na thei na. Sweet December a ka laam uh migen za ding hive cin maw. Tua bang e… hong pai thei lecin ut peuhmah sing e…..

Ka tapa aw, thu na mang in aw. Kong gennop tampi a tawpna ah, tua hi. Thu na mang in. Na lawmte in zu a dawn leh nang dawn ken maw. Ann tampi a nek leh zong nang tam ne ken maw, na gil gol ding hi. Kong it man hi aw, hong phawk mahmah ung. Na pa zong a zan zun khatvei nawn khinzo, koh zong lumta nung. Na nau zong a mit khamta hi inteh, ka laikhak a gelh kawmkawm in ka thugente bek ngai, ka hopih hang hong dawng nawnkei. A ihmut suak cip luata a, gimta hi inteh. Ka meikhuat uh zong mit dekdek, huih in hong mutsak sak ahih cianga.

Mai kumthak sungah thu lamdang a piang ding hiam? Koh lamah leitung pen ni sa deuhdeuh ding, guah tui tawm deuhdeuh ding, ann leh meh tawm deuhdeuh ding… gial zong hong tung thei hi ci uh hi. Noh lam zong tua bang ahih leh hong gen in aw.

Tawp taktak ta ning maw. Hih zah in hunsak ning. Ka gennop tampi omlai mah taleh, na sim sung zong sawt ding ahih ciang tawpta ning. Na hun neih loh gengen tawh saulua leh sim khin man kei kha niteh. Na laisim ding a tam hang hih ka laikhak mah na simsak masa hamtang in maw. A saulua kong gelhloh uh hizaw. Mailamah thu tampi tuni a kong gelh lohte hong gelh ding hi ing. Na pu te khanlai a a sa betzia uh nong dotte zong mailamah hong gelh mai ning. Tunitak bel ka lup uh hunta. Tua zah ci taktakta ning maw. Nang zong na sim khit ciang na lumpah in maw. Koh zong ka gelh khit uh ciang mei sumit in na lumpah nung. Nang zong zan sawt haklua, zan meng lua ken maw. Ihmut cim kei leng luna thei hi aw. Tui tampi dawn in maw.