Kalaymyo sangnaupang khat ii abiang a eksakgawp sangsiama ki dinkhawlsak

Kalaymyo sangnaupang khat ii abiang a eksakgawp sangsiama ki dinkhawlsak

Myanmar, Kalaymyo khuasung aom No (4) Middle School khatah Sangsiama khatin sangnaupang khat abiang eksakgawp cih Facebook tungah hongki thehzak hi. Tua sangnaupang pen pasalno khat hi a, Tan 2 akah laitak sangnaupang khat cih Kumudra News pan kiza hi.

Siamanu in tuabang in abiangteng a eksakgawpna hangin, tua siamanu pen laihilhna panin ki dinkhawl sakphot hi ci’n Kalay Myone Education thunei te’n genkhia uh cihi.

Hih thupiang pen abeisa Tuesday (December 5) ni in thupiang hi a, tua sangnaupang in Kawllai simtheilo ahih manin a sangsiama nu’n abiangteng acintawh a eksakgawp cimawk hi.

Hihvai tawh kisai in Kalay Myone Education thuneipen ahi U San Yu in agenna ah Education Committe tetawh hivai aphual ah akanding in ka kuankhia uh cihi. Hihthupiang pen atakpi himawk a, laihilh sangsiamanu zong hihvai hangin laihilhna panin ki dinkhawlsak phot cihi.

Tuaban ah mailam ciangin hihbangdan in sangnaupang te kabawlnawn keiding hi ci’nzong letmat ki thuhsak in kiciamna ki neisak cihi.

Hih laihilh sangsiama nu pen Middle School sangsiama hi a, akisapna dungzui in Tan 2 aki hilhsak ahihi.

Tulaitak in sangnaupang ii anu apa tezong kisam a, ki muhpihna akineih khitciangin hih thupiang tawh kisai in tungsiah ahzong ki Report dinghi ci’n thunei te’n genkhia uhhi.

Sangnaupang ii anu apa tetawh thunei te akimuh ciangin anu apa te’n atapa hihbangin abawlsak sangsiamanu pen bangmah gawtna bawlkei un, nasep khawlsak kei un ci’n thuumsakzaw bilbel cih kiza hi.

Ahi zongin sangnaupang khat hihbangin khutnga in bawlsiatna pen kilawm hetlo ahih manin, hihbangin agamtat sangsiamanu pen khauhtak in thu kibawlhen ci’n ngetna zong atuamtuam om cihi.

Ahi zongin hih thupiang tawh kisai in tungsiah ah Report kibawlkhin a, tungsiah te ii khentat bangbang, thupiak bangbang in kisemding hi ci’n U San Yu in genkhia hi.

More: Kawlpi (Kalaymyo) khuasung lamgei ah Zomi aliamgawp khat kimu

Kalay Myone sungah hihbangdan khutnga in bawlsiatna pen omngeinailo a, hihpen amasapen kici hi. Akhutkhial abawlsia sangsiamanu pen Tan 2 bek laihilhkhuan aki dinkhawlsak hilo a, koimah ah laihilhkhuan omloding in aki dinkhawlsak ahihi. Athu bangci kisepding cihpen tuangsiah panin thupiakna kingaklai cih kiza hi. Sawltak #zomidaily