EQ & IQ

Mikang (English) te’n kammal thupi mahmah gentehna khat nanei uha, “IQ” & “EQ” ahihi. British te’n kum 300 val bang Leitungbup na-ukzo uhi. Tua banga athahat Britist Empire te’n “IQ” leh “EQ” khentel thei-in, nuntakpih uha, tudongin leitungah akizahtak gam khat suak toto hi. Mailam hun saupi adingin midangte’ nuai-ah om ngei tuanlo ding uhi. IQ pen Bilpi tawh kibanga, EQ pen Sumkuang tawh kibang hi.

IQ Khuak – IQ Brain

Khuak manlang mahmah in, ngaihsutna hoih tuamtuam thei hi. I theihvat dingin tulaitak dinmun enlehang, China te, “Made in China” kici khempeuh apualam hoih mahmah napi-in, tovetlo mawk hi. Amau ngaihsutna ah siapah siapah dingin ong kileikik mengmeng leh Business hoih mahmah hiding ci’n ngaihsutna tawh abawl uh ahihi. Hitakpi mah hi. Mizawng daipam te’n sum haulo uh ahihmanin, China Brand bekmah kileizo a, kilei ziahziah takpi hi. Tua mah bangin, van ginalo, mi ginalo, thu ginalo khat peuh aom ciangin, China Brand kicihsan ziau-a, China tepen kuhkallo in azulhzau gawp bangkhat in ilungsim sungah kingaihsun thei mawk hi.

EQ Khuak – EQ Brain

Zomite’ nuntakpih, ipu ipa te’n ana nuntakpih ngiat uh pen “EQ” Khuak ahihi. Citak, thuman, lungduai, sumngam, baingam, piakhiangam uha, “Kawl zongh tuidam in kiho” naci ngiat uhi. Ipu ipa te’n “Lamnai tawnnuam Behiang Kumkua a tunglo” cih kammal anazat uh pen “EQ Theory” tawh anungta uh nahi gige hi. Tuhun tak ciangin, kim leh pam’ huzapna hangtawh ngeina hoih tampitak Zomi khangthak sungah kinawlkhin in midangte’ ngeina kizuihpih mawk a, dah huai dinmun atungto ihih lamtak kitel thei hilehang hoih mahmah ding hi. Mikang (Britist ) te’n “EQ” Khuak nuntakpih in thukhual tak-in Leitungbup kum 300 val sung na-uk uhi.

Thukhupna:

Mihing khempeuh in lametna ciat kinei-a, tua ilametna pen tawmvei sung kimang ding (IQ Theory) tawh nungta lo-in, saupi kimang ding (EQ Theory ) tawh nisim nuntakna ah Leitung izep ding kisam mahmah hi. Leitungbup mikim in, ei’ma munsan tek pan leitung zepsiam hilehang, Leitung sialua cih kammal kiza ngeilo dinga, Topa Zeisu’ thungetna mah bangin, “Vangtunga nadeihna akicin mah bangin leitungah ong kicingsak in” acih kammal ong tangtung ding hi. Hih Mission pen Zomi Nampi sung pa’n kipatkhiat dingin, kuama peuh vaipuak ahihi.