Zeisu dingmaw, Jesu ding?

Zeisu dingmaw, Jesu ding?

Kikum vanglak ni ci le’ng, Zeisu or Jesuh bek hi loin, LST sungah min tawh kisai kikup ding tampi om hi. Christ zong pen nidangin Khazih ci’n kigelh aa tu hun ciang’ Khrist aci tawh Khrih aci tawh ki om ahih manin, milak-ah LST ih sim ciang’ hong sim hak mahmah ta hi. A sim haksa hi loin ih sim dan a kiba’t loh ciang’ ei’ sim dan aa a sim lo khat pen a khial-in ki ngaihsun pah ahih manin, ki nuihsan hi.

Ka neu lai-in Kawlgam-ah khang ka hih manin Zolai kasin kha kei hi. Ahi zongin Zomi ka hihna tawh Zolai ka thei nuam aa, kum 7 ka phak-in ka nu’n LST tungtawnin Zolai hong hilh hi. Ka Zolai mal theih masakna pen Lai Siangtho ahi hi. Hih laimal teng kigawm leh Lai Siangtho kici ahih ciang’ ci-in Zolai alphabet ih zat khempeuh ka kawi gawmgawm aa lai tampi ka suah hi. Tua khit ciang’ ka pawlpi sung u’ah, la makai hong sem Sgt. Tuan Khan Dal in A, E, I, O, U tawh Zolai paizia hong hilh aa, tampi hong baih tuam mahmah hi.

Tua ahih manin tua hun LST kigelh dan-in ka sim aa ka zongsang hi. Mate, Maku, Luka, Zawhang mah ci tangtang le’ng, nuam ka sa hi. Topa Zeisu’ nu Mazih mah ci le’ng nuam ka sa hi. Zeisu Khazih mah ci le’ng nuam ka sa hi. Ahi zongin Tu hun ciang’ tua bangin sim le’ng, khangthakte’n hong nuihsan uh hi.

Tua ahih leh, a gelh masa-te a khial maw? A ki gelh masak banga a sim-te a khial maw? A thak aa a khel te a khial maw? Ahih kei leh, a thakthak kikhel napi’n a zang thei lo-te a khial maw? A taktak in ci le’ng, Zeisu lah man kei, Jesuh lah man kei. A gelh-te’n man a sak banga a gelh uh ahih manin a nih in man ci nuam le’ng zong man thei veve kawikawi hi. A sim-te’n zong a kigelh bangbang aa a sim uh ahih manin, man kawikawi aa nuihsa’t ding zong hi tuan lo hi. Tua ahih manin min lawhna tawh ki selsel ding hi het lo hi.

Thu khat-ah a man zaw zat ding sim dingin ih deih leh, man lo ih sak-te zat nawn loh ding cih bang khat thukhun a om kei leh, kizang suaksuak thei hi. LST bu lui khempeuh phiat mai le’ng, kizang nawn lo ding hi. Khanglui mi teng bei khin leh zong kizang nawn lo lel ding hi. Ahi zongin laibu puah phapha ci-in, min gelh dan a tuamtuamin ih khelkhel leh khangthak-te’ buaibuai den ding hi lel hi. Pawlpi pawl khat bang, min gelh zia huhau aa pawl kikhen bang om hel hi. A taktakin ci le’ng, min gelhzia tawh pawl kikhen zah dong ding pen a hoih het lo thu khat hi.

A khangto nai lo minam-te’n ih neih ngei loh, ih zat ngei loh na khat peuhpeuh pen, min thak ih phuah theih kei leh, ih lakna bangbang aa ih zat ding leh ih zatsuak theih ding kisam hi. A thei lo-te’n a zat theih kei leh, a thei te’n a man aa ih zat ding kisam hi. Gtn: ka neu lai-in, ka nute’n brush pen bulut na ci uh aa, lime juice pen lemzuut na ci uh hi. A khiatna om sa lo ka hih manin, ka kankan leh brush leh lime juice a cihna ahih lam ka theih ciangin, khel sak hi’ng. A khel theih kei uh leh phamawh loin, e’n a man aa ih lawh ding hi lel hi. Lo thei lo ci aa zong nuihsan ding hi tuan lo hi. Orange khawng zong pawl khat in lingmaw ci’n, pawl khat in lengmaw ci hi. Tua dan hi-a ih zak dan, ih sim dan aa ih lawh ahih manin kuamah khial khin lo cih theih hi lel hi.

A tawpna-ah pil a kisa a tam pian ciang’ lai tawh kisai buaina tampi hong piang semsem ding hi mai hi. Ngaihsut theihna lungsim tawh ih khentel theih ding bek a thupi ahi hi.

Genkhialh a om leh ngaidam!

Haukhek (Man Ngaih Hau)
Tokyo, Japan