Manglai leh Zomite

Manglai leh Zomite

Misionary te Zogam hong tun (1889) ma khawng in belh Manglai izaakna tam lua nai khol lo kha ding hi. Mangkang tote ii expedition khawng Zogam ah hong pai lai un, Zomi ten Mangpau izaak masak hi pan ding hi. Tua ma khawng in, Mangpau, itheih loh hang, a poimawh luatna om het lo hi. Kawl kumpi te ii hong uk taktakma nangawn in, Mangkang te’n, a Pasian thu upna uh hang tawh un, Pasian thu hong phawksak a kipan, Mangkang te pau leh lai pen, ei zomi ta ding in- izaak masak a kipan a thupi phadiak lai leh pau te, na hi khin hi. Tua pen, tun kum 2nd. centuary sung luut ta hi. Zolai taktak pen, i mansuah khit ciang in, Pau Cin Hau lai hong piang a hih hang, Cope topa hong bawlsak lai pen kizangh suak zaw ta hi.

Second World War (1939-45) lai in, German te leh Japan te’n na gualzo leh uh ei Kawlgam khawng ah tu hun in Japan pau kizang ding in, Nitum na lam te ah belh German pau kizangh ding na hi hi. Ahih hang, Galpi nih na pen, British leh American te’n na gualzo uh a hih man un, galpi nihna khit ciang in, leitung bup ah Manglai leh mangpau pen ki thupi zat seemseem ta hi. Nidang hun aa, a kithupi zat German, French, Spanish, Potogal pau te, amau colonial hun thahaat lai zah in, leitung ah hong ki piizat non lo hi.

EU luut na pawi:
European Union ah 2004 kum in, gam 10 a ki behlap hun in, a luut thak gam 10 te a welcome na program te ah German pau ta, na zangh uh a, tua pen Europe gam sung ah nidang German te thahaat lai un, amau gam huam na a om gam honkhat te ah tudong in German pau na limzat lai uh a hih man na hi hi. Second World War (1939 – 1945) lai in, Germany te ii hong gual lelh tak ciang in, German pau pen a kizatna hong toi seemseem hi. Manglai leh Mangpau pen leitung ah hong thupi seemseem ta hi. Leitung ah Pau nam tampi om te lah ah, Manglai pen, a kizangh pen leh kapau thupi pen hong suak ta hi. Seente pau pen, a ki zangh pen nih na khawng in ki ciamteh hi.

Manglai promotion:
Mailam hun in, Zogam ah zongh Mangpau hong ki limzat mah mah ding kisam hi. Zomi te i, official language khat aa, hong kizat ding pen lunggulh huai peuhmah hi. Mizoram dan in Mizo/English pen amau i official language a hih khop mah bang in, East Zogam ah zongh Zopau/English te gel pen official language aa izat ding kisam hi.

Kawlgam ah 1978 lai pawl khawng in, manglai khantoh theih naang cih ngiimna tawh, cartoon story ki aat na, news sung khawng, cartoon laibu te sung khawng ah Kawllai leh Manglai tawh suaksak khawm uh hi. Kawllai tawh tel baih zaw a hih man in, naupang te’n Manglai column teng en nuam tuan lo uh hi. Ahih hang, manglai adeih te’n a haksat phial hang in, manglai column mah sim tangh tangh uh hi. Tua bang aa, a sim tangh tangh te pen sawt lo in, cartoon column teng manglai tawh hong sim to ziau thei ta uh hi.

Ki mawk ngah lo:
Na khat peuh ideih ciang in, seplo a, baih no tak in ki ngah khol lo a, Kampau khat isin ding ciang in zongh tua bang lian mah hi. Lungkia khol lo a, theihnopna taktak tawh haksa sa pipi, isin ngiat ciang in, itheihna hong khang pan hi. Sin khol lo a, theih sawm dan, Sin ngiat lo aa, siam ding ngak cih dan ih hih kei buang aa leh lamzin om lo hi.

India, Thailand, Malaysia tung tuung te’n Manglai tawh ki aat te, Zolai tawh hong let sak un, na ci zeel thei hi. A tun zawk kum 2 pha sa te’n zongh, tua mah na ci a, kum 5 pha ta in, tua mah na deih lai, kum 7, kum 10 pha ta in, ei thu a, Manglai theih ding isawm sang in, Manglai thei sa te’n, baih no tak in hong pheen sak ding ki lung gulh gulh suak lai hi. Manglai thei sa te zongh, a mawk theih ziau uh hi saam ding a maw, a theih na ding un, seppi, sinpi in a sin ciat uh hi ven, en zongh sin sawm buang sam lo ding i maw, theih sawm lo a, mi hong letsak ding ngak sawm zaw ding ihiam?

Spoon feed:
Ih neu lai in, inu ten ikam ah an hong baak mah uh hi, igol khit ciang, ikam ah an kibaak sak saam non lo hi hang. Kawlkai i neek ciang in, mikhat in, a hawng hong kheh sak lai leh neekbaih zaw kan lai mah ding hi ven. A hih hang, kawlkai duh peuhmah in, Pumpi, khut le khee kicing a neilo te lo buang, a hawng akheh thei lo, om in ka ki um saam kei hi. Gamdang aa, nasem aa om te hi ta leh, gambel ding in a om te hi ta leh Dictionary khat pen, lei zo ham tang ding in ka um hi. Manglai sim baih ding in, a ki aat laibu khat leh nih lei zo buang ding uh hi. Lei kul loo pi in zongh, a mawkna kingah na mun tam peuh mah ding hi. News paper luisa, manglai aa aki aat te bang, kimawk paih lel hi. Tua te tawh zongh, a kin taktak te’n sim sim thei lai ding hi.

Zopau maakngilh khak ding a lau lua maw:
Zopau pen, ih theih ding, isiam ding, imaakngilh loding a kisap mah bang in, gamdang om khin sa- Zomi te’n zongh, Manglai itheih kim naang leh, isiam kim theih nang zongh hong kisam seem hi. Gamdang tungsa, mi ngaihsun thei khat aa ding in, Zopau leh Zolai belh ki mansuah liang non kei leh kilawm kasa hi. A hih hang, theih ding a kisam pha diak Manglai cih bang te pen, isin ciat hamtang ding kisam hi. Awl mawh lo a, i om khak ding, hoih het lo hi. Zolai mangilh khak ding lau lua zaw dan maw, Manglai theih khak ding a laulua zaw dan maw?

Kawlgam ah Manglai:
India tawh hong ki ukkhop hun 1800-1937, Colonial hun 1937-48, democracy hun (1948- 1962) leh U nuh hun bei dong ciang (1962), Manglai pen kilim zat lai hi. Tan 7 te bang in, Manglai lim zat theih kim ta uh hi. Kawl lai khawng na tawm theih zaw uh hi.

Masahlah hun khit in belh, Sangkah ngeikhat in, tan 5 a tun ciang in, Manglai basic sin sak pan hi. Tu hun in ci leng, primary pan aa kipan in Manglai subject khat, sinsak ta ci in kigen hi. Manglai a thei lo pen khat in zongh, Manglai achiikhan (basic) pen kisin ngei khin kim zaw kha ding hi. Tua ahih ciang in, gamdang tungsa Zomi te, ei leh ei Manglai isin theih nang lampi tampi tak om ta hi. Gamdang koi koi aa, om phial ta leng, Manglai lo tawh hong nopci gai nawn lo, Manglai lo tawh apian theih gai non lo na ciang zongh tampi om cih pen, mikim in, kimu thei kha ding hi.

Mi konlawh sang:
Zolai tawh mi dang khat i, hong let sak ding, ikhan tawn tung aa, ingaak nilo sang in, ei mau mah in, Manglai pen lim theih sawm ciat zaw leeng, itheihna tung tawn in, thupha tampi ki ngah beh zaw ding in ka um hi. Leitung aa, lai thupi ki aat khempeuh Manglai in, a tam zaw ki aat gai hi. Zolai in, kua mah in letgai zo ngeilo ding hi.

Mikhat ii Zolai tawh hong letsak ding, ingak sawm mawk aa leh bel, iteek aa, isih phial dong in, Manglai tawh lai ki aat kuamah in, hong let sakgai zo ngeilo ding hi. Manglai theihsawm in, sin sawm leeng baih zaw tham lai ding hi. Bek thamlo in, thu i theihnop luat khat, manglai tawh zong leng, imuh ding hong baih zaw tham lai ding hi. Zopau/Zolai tawh izon tha paai hang, kimu zo khol lo kha ding hi. Tua hang in, Manglai theih sawm kim zaw leng aa, mailam hun sung in, Zogam aa ding, a kua mapeuh in contribution/ mite phat tuam nading sepkhiat theihna tampi ki neih beh zaw lai kha ding hi.

Gamdang tung sa peuhmah in, Manglai/ Mangpau hong theih sawm zaw ta un, na theih- na siam ni un, Zolai/Zopau mangilh pah tuan lo ding hi uh teh. Na nasepna uh, na khualzinna uh, na laisin na uh te ah hong nuam zaw tham lai ding hi. Tua man in, Zonet pen itheih sa Zolai sim na ding bek in, izat sang in, Manglai zongh official language khat in zat theih ding hong hoih veve hi. Mailam hun Zogam ah khanto naang khempeuh te ngaihsun leeng, Manglai mah hong hi zeel hi. Social- education- economy- technology- politics aa kipan nadang tampi te en beh le hang, Manglai/Zolai anih in promotion ineih khop theih niciang bek in, ki puahphatna tampi te hong om zo pan ding hi. Zolai/Manglai zatkhop ding, Zogam ah ideih aa leh tu mahmah in zongh, Zonet ah izat sa mah bang in, izat to suak na in, phat tuam na tampi hong pia zaw tham lai ding in, ka um zaw hi.

A diakdiak aa, gamdang om sa peuhmah in, Manglai pen, Zolai aa midang khat i, hong let sak ding ingak tha paai, inget tha paai sang in, ei mau kutai in, isiam sawm, itheih sawm zaw ding hi. Zolai/Zopau pen na theih sa hi, na mangilh khaak ding lau het kei zaw in, mangilh non kei peuhmah ni teh. A hih hang, Leitung khempeuh ah, a thupi pen kampau leh lai a hi, Manglai/Mangpau pen ih theih beh, isiam beh sawm ciat zaw ding hi. Mangpau na siam khak ding aa, minam mangthang khat na suak khak ding lau het ken.

Pu Tongseal