Ngeina leh Christian Upna (7) ~ Rev. Fr. Damian Dal

Ngeina leh Christian Upna (7) ~ Rev. Fr. Damian Dal

Minam khatciat ii ngeina i etciangin, amau te upna in amaute ngeina bulpi ahihna thu kimu thei hi. Ngeina atuam, upna atuam a akoih minam khatzong na omlo hi. Hih thu hangin, ngeina cihthu khiatna anei sak thu in, upna ahihi. Minam khat in amau te upna tawh kizui in zuihding ngeina na bawl ciat uhhi. Pawi bawl na, dahna te ah ki uapna ngeina khempeuh in tua minam khat ii upna thutungah zung naphut tawntung hi. Ngeina pawi te in minam khat ii a up uh thu tungah zungkha in aho pokhia ahihi.

Minam khat ii upna in tua minam ading “Ngeina” naubang suakkhia sak in, tua mahbangin, minam khat ii “Ngeina” in tua minam te ii upna thu hongpo khiasak hi. Joseph Ratzinger in bangci nagen hiamcih leh, “Minam khatsung ah, amau te ngeina leh amau te upna thunih in, khauhual bangin kihualkhawm tawntunga, tua thunih sungah khat lakhia leng, anih in siatlawh hi.”[1] Tua ban-ah, “minam khat ii ngeina pen, minam khat ii upna tawh nakhenkhiat leh, tua minam ii ngeina apiankhiat na ahi anu tawh akhenkhia nahih man in, ngeina ii alaigil leh athupi’t na khempeuh apaai khia na hihi,”[2] ci in nagen hi.

Tuhun ciangin, mitampi te in “Ngeina” leh “Upna” khenkhia in, minam khat ii ngeina bulpi ding, ngeina zungpi dingin, mihingte theihna leh mihingte pilna tawphah zaw uha, mihingte siamna tuamtuam te masak ta uhhi. Minam khat ii upna in tua minam ii ngeina sungah munnuam ngah nawn lo, innteek nawnlo ta hi. Hihthu akhangto gam akici Europe gamte ah teltak in kimu thei hi.

Amau te ngeina pan in, amau te upna lakhia ahih manin, tuhun European te ngeina in “Keithu” cih ngeina (a culture of individualism) hi in, mihingkhat ii nuntakna sungah, athupi penpen in “Kei” bek kahih mahbangin, “Keithu” in nakhempeuh te tungah azalianpen, avanglianpen, athunei pen hiding hi cih ngaihsutna nahihi. Hih thuhangin, “Kei” cih pen amau a dingin a pasian uhhongsuak in, “Kei” cihpen amau te upna hongsuak hi. Hih thu hangin, ngeina leh upna khenkhiatna in, thuhoih thupha leh leitung ading phattuamna apia nuntakzia te piangsak lo a, mihingte in amau le amau pasian kineihna ngeina sung hong lutpih zaw ahihi.

Ngeina pan in upna ihepkhiat ciangin, ngeina ii apiankhiatna nu ahemkhia ihihi. Ahi zongin, ngeina in nunei lo tanggah in nungta thei lo hi. Hih thuhangin, ngeina in ama ading “Nu” zongtawm a, tua in, “Kei” cih ahihi. Upna tungah zung akha lo ngeina in, “Kei” cih tungah kinga in, bulzong a, kilam ahih manin, tua “Kei” cihtunga akilam ngeina in, mihingte phattuam nading, minamkhat ii kilapsang nading thuhoih leh thupha hongtun zolo hi. Banghanghiam cihleh minam khat apiangsak, minamkhat abawl, minamkhat asuaksak pen “Kei” hi loin, upna bek ii atheih ahi “Pasian” ahih man ahihi.

“Kei” hangin minam piang hi loin, “Kei” hangin ka minam a om hilo in, kaminam sungah “kei” cih “mikhat” hong kipiangsak ahi bek hi. Hihthu hangin “Keithu” (individualism) cih in mite lungsim zo in, mite lungsim sungah teengin, mite in “Keithu” cihna pan apaikhiatnop nawnlo uhciangin, minam khat ii “Ngeina” in tua minam ii upna pan apaikhia hi a, Pasian tawh akizom nawnlo, “Kei” cih tungah akilam “ngeina” suak in, Pasian tawh ngeina khat a nuntakkhopna Eden huanpan in, Pasian tawh ngeina khat a nuntak theihnawnlohna mun ah apai khia ihihi.

Hihthu hangin, minam khat ii ngeina in tua minam ii upna tawh kikhenkhia thei ngeilo hi. Tu in Zogam Zolei ah Christian upna hong tunzawh kum zalomkhat hongcingval hitamah leh, Zomi Christian te upna leh Zomi Christian te ngeina tonkhawmthei nailo in, Zomi Christian upna in Zomi Christian te ngeina puahzo nailo hi cileng ihkhial hetkei dinghi.

Pupa hunlai ahi, Christian upna hongtun ma in, Zogam Zomi te khua te ah, khuazang ai dingin, biakpiakna munkhat nanei uh a, tua mun pen “Tual” kici in, khuazangin kumkhat khatvei “Tual” kithoih hi. Tuhun ciangin, Christian kici in, khuasung khat ah biakinn tampi om a, kumkhat khatvei nangawn khuazangin Pasian a bia khawm, a phatkhawm thei nailo minam in ih omlai hi. Ih Christian upna hangin, i Zongeina bang kipuahpha ahi hiam? Ngaihsut ding athu pi khat ahihi. Rev. Fr. Damian Dal

• [1] Cardinal Joseph Ratzinger, “Christ, Faith and the Challenge of Cultures,” Speech Given in Hong Kong to the presidents of the Asian bishops’ conferences and the chairmen of their doctrinal commissions during a March 2-5, 1993. Available online from https://www.ewtn.com/library/CURIA/RATZHONG.HTM [7 June, 2015].
• [2] Ibid.