Malaysia, Uptown Shah Alam sungteng ah Immigration te’n Operasi bawl, mi 67 mansuak

Malaysia, Uptown Shah Alam sungteng ah Immigration te’n Operasi bawl, mi 67 mansuak

Malaysia, Uptown Shah Alam vengsungteng ah Immigration Department te makaihna tawh Friday zankimlam akipan Operasi kibawl cih NST pan kiza hi. Shah Alam, Section 24’s Uptown sungteng ah Operasi akibawl hi a, akibawlna ahangpen tua kuamsungteng ah zanlam ciangin phalna Permit neilo gamdangmi “illegal immigrant” te omden uh ahih manin, tua vengsung aom te’n Complaints abawlman un Operasi akibawl cimawk hi.

Tua Shah Alam kuamsungteng ah gamdangmi “illegal immigrants” tepen van alei Customers bek thamlo, pawlkhatzong phalna Permit aneihloh uhhangin tua vengsung aom sumbawlna Premisese muntampi ah nasem in om uh cihzong kitheikhia hi.

Tuabangin vengsung mipi te Complaints zaksakna tawh kizui in Selangor Immigration Department leh National Registration Department (NRD) panin Officer leh personnel akigawm in mi 44 tak amanding in kuankhiapah uhhi.

Nitaklam 11:30pm hun akipan Uptown Shah Alam sungteng ah kumpi thunei te’n buluh kawikawi uh a, zingsanglam 2am hunpawl in Operasi mansiang sakpan uhhi. Tua hunsung ah gamdangmi “illegal immigrants” bekbek akigawm in mi 67 mankhia uh a, tuatepen thusitna bawlbeh tohtohding in kemsuak uhhi.

Hihvai tawh kisai in kumpi thunei ahi State immigration director Mohamad Shukri Nawi in agenkhiatna ah tua vengsung aom Malaysian gammi te’n Social Media tungtawn in Complaints hongbawl uhhi ci’n genkhia hi.

Tuabangin vengsung aom Malaysian gammi te zaksakna tawh kizui in Operasi akibawl hi a, akigawm in gamdangmi 120 te’n thusitna abanban in thuak ngekngek uhhi. Tualak ah mi 67 tepen Immigration thukhun tawh kizui in lahtheihding bangmah Permit kician neilo uh ahih manin akimansuak uh ahihi.

Tua akimante lakah numei pawlkhatzong kihel uh a, kum 20 panin kum 55 kikal vive ahi uhhi. Tua matsuak athuakte pen State Immigration Department’s Enforcement Division ah kipuak uh a, tuamun panin akisam bangbangin thusit thudotna kibawlding hi ci’n kumpi thunei te’n Statement ah genkhia uhhi.

State immigration director in agenbehna ah Operasi akipat ciangin gamdangmi pawlkhat pen taisimsawm, kibuksawm cihbangin omngeingai uh cihi. Ahi zongin Officers tepen munkhempeuh ah akigingsa in aki omdimdiam ahih manin, kuamah ki taisuahlo, avekin kimanthei hi ci’n kipaktak in genkhia hi.

More: Kuala Lumpur khuasung muntuamtuam Operasi bawlna panin gamdangmi 70 kimansuak

Akiman te Case khempeuh pen “Section 6(1)(c) of the Immigration Act 1959/63 for not having a valid pass/permit and Section 15(1)(c) of the same Act for overstaying” thukhun tawh kizui in thu kibawlding hi. Malaysia gamsung ah gamdangmi te alom omphatdiakna leh zankim zankhang in agamtatna, pawibawlna, gualnopna cih munte pen kidop huai phadiakleh kilawm hi. Tuaban ah venglepaam, midang te mitdongding, nawngkai hongsakding in ih omkhaklohding zong thupi mahmah hi. Sawltak #zomidaily