Aphawk huai mahmah Pu SB Len Cin Thang

Aphawk huai mahmah Pu SB Len Cin Thang

Hunkhat lai in Zomi suangbawl sung ah akithei mahmah khat ahi Pu SB Dai Cin (L) i tapa Pu SB Len Cin Thang in tuni (March 6, 2019) ni in Zangkong pan in hong nusia ta cih thu kazak ciang in Zomi te’n atheih huai leh aphawk huai thu pawlkhat ka lungsim sung ah hong suak dandan hi.

Adiak in Pu SB Len Cin Thang(a) SB Thangno in Zomite’ ading in apiakkhiatnate suut tham cing tam mahmah hi. Ka theih khak loh tampi omlai ding a, ka theih khak pawlkhat suut samsam leng:

ZNC Thugenna Ding
1990 kum May kha kawlgambup kitelpi ah akidem ding party te in TV pan in thugenna ding ah ZNC in agen zawhna ding in akisam sum leh paaite Pu SB Len Cin Thang in sik hi.

Pu Cin Sian Thang Panpih Den
Kawl galkap te’n hong ukcip hunlai dawi havang kal ah gamvai nasemte apanpih ding mi ahaksat mahmah hunlaite in Pu Cin Sian Thang leh alawmte Pu SB Len Cin Thang in panpih tinten den hi. Apanpihna katheihpih tam mahmah hi. Atawpna teh Pu Cin Sian Thang EBC pawlpi ah alutna vawt zong tua hang mah ahi hi.

Tuhun “Tender” ngahnop man a mi mai-et te dan hi peuhmah lo hi. Tua hunlai in gam nasemte panpihna hang in metna om peuhmah lo ban ah gilbem akitung thei lua dinmun ahi hi.

John William Yettaw Hun Lai
2009 kum May kha sung in American te John William Yettaw tuipek in Daw ASSK’ inn ah aguklutna tawh kisai in Aung San Su Kyi insein gilbem ah thu kisit hi.

Tua thu leitung i headline news ah suakden hi. Aung San Su Kyi panpihna in Insein gilbem mai ah va kitu zel hi. Tua lai paiding Zangkong ah Zomi kuamah kingah zolo hi. Tua kimlai Pu SB Len Cin Thang in a mawtaw tawh hong kha ziau hi. Mat leh hen thuak theih luatna ding dinmun himah tase leh laulo tak in keimah Mung Laan Thang leh Pu Cin Sian Thang te Insein gilbem mai dong a mawtaw tawh hong kha hi.

Zomi Movement Panpih Pa
Hun haksat mahmah laite in Zomi Movement apanpih ding mi haksa mahmah hi. Lau huai mahmah ban ah metna ding om hiaulo ahih man in ahiding mah ahi hi. Tua kawmkal ah Zomi suangbawl mihau khat ahi Pu SB Len Cin Thang in Zomi Movement apanpih tiilteel pen Zomi te’n ciapteh huai in phawk huai hi.

Thukhupna
Adam loh sung kava veh zel a thu zong kava ngetsak zel hi. Aki hopih theih lai in zong va hawh leng ih gam ih lei vai mah lung himawh mahmah ahih lam katel mahmah a mi pammaih mahmah khat in ka ciamteh hi.

March kha ni 8 ni kivui ding ci ahih man in lap zolo sawnsawn ding suak ing. Amah tawh kisai ka kithuah khaknate uh kagen nop kasuut nop bel tam mahmah lai.

Pu SB Len Cin Thang aw pammaih mahmah teh. Nang bang mi ding Zomi te’n kisam mahmah lai ung. Ong hong mahmah nung. Lungnuam takin na paita in, Dahna Lianpi Tawh, Mung Laan Thang, Tonzang, Zogam