Malaysia na dam hiam ~ Lian Tuang

“Ciimnuai a sa kibak, geltui ah kithuk. Lungdamna mangngilh ngeilo sawt vei taleh thukkik teitei” cih paunak thunamtui mahmah khat I nei khinkhian hi. Zomite pen lungdamna a ciamteh minam, lungdamna a thukkik minamte I hi hi. Hih pen minam picing khat I hih na zong ahi hi.

Nuntaklui nung hei na

Kawlgam Zomite nuntakzia a gamlalua khollo hunkhat nunghei kik pak leng, gam kiukna ginatloh luat manin mipite kizawm mahmah hi. Mipite zawn cih takin kizawng hi. Inn nupite in an a huan ciangin gilpi a dim baih ding bek kingaihsun hi. Duh maw duhlo, tha om maw om lo cihdan peuhmah kingaihsun zolo mai hi. Zinghuan nitakhuan ding kitasam in, nipi khat sungah buhciim siang le ci anpi in 4 / 5 ta bang kinei den hi.

Nik le puan zong a thak kilei zo peuhmah lo a, ute puan pen naute in kidawl toto hi. Ko unau bang pasal 4 ka pha uh a, ka u puan khempeuh keileh ka nau a neupen dongin silhkha hi. Ka u puante bek silh toto ka hih manin ka u lawmte in ong thei khial pahpah hi. Ken zong tua puante kum 3 / 4 bang ka silh khit ciangin ka naute in silh leuleu ahih manin kei lawmte in zong ka nau na thei khial zelzel uh hi.

Nik le puan kilei zo sunsun leh Second hand hi a, lawmte in “ tu ni meipi kai ka cihleh puanthak a nei om hi ven” ci in kiciamnuih hamtang ahih manin tua second hand a thak liklek pen kisilh ngam paklo lai hi. Kei bang zummawh thu ahi phial zongin thuman khat gen leng, tan X ka zawh khit kumpi na ka sep khit ciangin bombi sungten a teng zo pan ka hi hi. Ka tan 8 lai a ka lungsim tawnga ka ut mahmah thu khat om a, Jean bombi pen kawnggak tawh teng ding cih hi zen hi.

Nuntak zonna

Hih dan nuntakna pen keibek hi lo a, Zogam nuntakzia ahuampi ahi dingin ka lamen hi. Hih bangin nuntak hamsa lua ahih manin nuntak zong ding, an le tui zong dingin phul theihna khempeuh kiphul ngeingai hi. An taw in mun khempeuh ah kipai hi. Ahuampi in a kipaina pen Mizo ( India ) gam kitung ngeingai masa hi. Tampi nuamtuam hi.

Tua khit ciangin Malaysia lampi khat ong om kiukiau hi. Malaysia lampi ong om theih a kipan in mipite nisim nuntakzia damdamin kikhel toto hi cih theih ahi hi. Zogam Zomi gilkial dangtakin keu thilthial in a om laitakin Malaysia gam tungtawnin nuntak gim nam kik in no suah kik ding a kipan tawh kibang ka sa hi.

Tawlpi khat sung Malaysia sumtang tawh a kinungta hi phial hi ka ci nuam hi. Malay ah mikhat in na a va sep manin a innkuan sung nuntakna uh kikhel sak zo hi. A u le naute in sathau meh nezo zaw deuh pah hi. A u a naute in sangkah ding gel ngam zaw deuh uh hi. Inn le lo kizun zaw deuh hi. U sung nausung ah piakkhiatna tawh itna kilakkhia zo zaw deuh hi.

Pawlpi sungah sumpi kibehlap zaw deuh hi. Biakinnte sikkang kikhuh zo zawdeuh pah hi. I biakinnte ah Guitar, keyboard le tutphatte ong om zaw deuh pah hi. Ahuampi in gen leng Malay gam a I sanggamte khua-ul sisan hangin Zogam kimalh zawdeuh a, nuntak gim kinam kik hi a ci nuam ka hi hi.

Kalsuan tohna

Hih bangin Malay gam ah I sanggamte pawlkhat in lunglen khuangaihnate kitheihmawh bawlin sun le zan cih om loin khitui le khua-ul luangkhawm in hanciam takin na a sep manin Zogam le Zomite nuntakzia kalkhat a kisuan to in ka ngaihsun hi. Tua bek hi loin a kuamaciat nuntakzia a hoih zaw ah a kilapsang theihna dingin amauteng mah in Malay pan in leitung mun tuamtuam ah kalkhat na suan toto leuleu uh hi. Amaute khantohna tawh kizui in Zogam zong kilam toto zel hi.

Tua tawh kizom in tulaitak mahmah in zong Malay le leitung mun tuamtuam a om u le nau a kuamaciat pen Zomi Zogam gilkial dangtakin a om laitakin a kisam bangin an le tui a zong leh a piate na hi uh hi. Khua le tui, u le naute ading a kipia khia, a zahtakhuai mahmah, upi dinmun, nu le pa dinmun a late na hi uh hi.

Mapanzia tuamtuam

Pianna Zogamnuam leh it le ngaihteng khualna hangin Zomite leitung gam tuamtuam a tung kawikawi I hi zaw hi. Hih bangin Pasian hehpihna tawh mun tuam gam tuamtuam ah I om na pen Zotu Zota Zomi le Zogam in gualtawh tanbang a kim theihna dingin gam tuamtuam panin ahanciamte na hita uh hi. Hih bangin omna kibanglo gam tuamtuam pan ahanciam sanggam u le nau akua maciat nong cidam thahat nading uh pen innngak ko na nu na pa, na ni, na gang, na pi napu, na u na nau, na veng na pam, na khua na tuite in nisim naisim in ka thungetna uh ahi hi.

Hih bangin Pianna Zogamnuam le innkuan ading nuntakna pia ngamin a kuankhia khempeuhte aw, na om na ciat peuh uh ah na damkim tek uh hiam. No adingin zingsang simin I Pa Pasian kiangah hehpihna na ngen den ung. Zingsang ka thawh uh ciangin ka zanmangte uh ngaihsun kik in no ading mangpha ka man uh hiam ci in ka na lungngaingai uh hi. Khualzin a vak a ciah khat a om ciangin ka u ka nau, ka tu ka ta tawh na kimu uh hiam ci in na thu uh ka na kankan uh hi. Khuahun khantohna zui in phone le van hoih tuamtuam tawh na thu na la uh ka na kan zel uh hi.

Lunggulhna

Hih bangin thu le la ka na kankan uh ciangin abeisa hunkhat lai a,nu le pa tha dawnin nu le pa dinmun sawt veipi a la ngei ahi, Malaysia pen nidang tawh kibang nawn loin khat veivei hamsa thei cih na za ung. Hih thu pen I minam bup ading vai lianpi khat hi mawk lo hiam na cici ing. Unau sanggam khat I hih manin a citheite in a hamsate a kipanpih diamdiam dingte I hi hi. Khua le tui leh minam ading nasem vive I hih manin khat le khat I vangikte a kipuakpih dingte I hi hi. Khat le khat kiho tangtangin a hamsa a dongtuak a om hiam ci in kivil tek ni.

Thukhupna

Hih bangin khat le khat I kizop ciangin a diakdiak Malaysia a I sanggam u le naute hopih dih ni. I panpih theih a om leh hanciam dih ni. Tua bang I gamtat ciangin sanggam u le nau cihna ciang bek hi loin hunkhat lai a, Nu le Pa tha dawnin innkuan sung, khua le tui azun a puahte tungah itna tawh lungdamna a thukkikte zong I hi pah ding hi.

“Ciimnuai a sa kibak, geltui ah kithuk. Lungdamna mangngilh ngeilo sawt vei taleh thukkik teitei” cih paunak a nuntakpihte zong I hi pah ding hi.

Lian Tuang