Malaysia Refugee vai khualzinna thukoh (Report) ~ Pu Zokhai

Malaysia Khualzinna Thukoh (Report) ~ Pu Zokhai

Malaysia pan-in Feb 19 ni-in vaanleeng-tawh Melbourne zuan-a ka-leen hunsung khuasik guhgaw mahmah-in hongpha-a, tuni ciangdong hong sikcip, hong meekcip ahihman-in ahunzil-in thukoh kahong neizo kei-e, tu-in, “ziakaai lua veh-aw” ci-in puanzapi-tawh kituun kawm-in thukoh (report) hongbawl-ing.

Malaysia UNHCR-tawh kimuh nading-in Dr Susheela (nidang-in MSF-ah, tu-in UN-ah hunbup-a aseem)-in hong tawsawn-a, ZAM Makaaite-in hong panpihna ngah-in High Commissioner-tawh kimuhding ka-ngen masa-hi. Malaysia UNHCR te-in UNHCR aiawh-a kihopih ding-in Community Liaison Officer Joanne hongseh takciang-in ka’ tha hongdah simsim-a, Dr Pinu kagen ciang-in, “Pai-in kiho limlim in, UNHCR buppi’ aiawh hi-in, neuseek tuanken. Ama’ honggen dingteng-zong akihilh diudeu angeina hizaw, pai limlim in” hongcih ciang-in kamang-hi.

Chinese Kum Thak-sung kuamah muhpih nuamlo ahihman-in Feb 13 ziing nai 10 hongci-a, “Kei 14-ni ziingsang nai 6 Kuala Lumpur hongtung dinghi’ng” kacihleh Feb 14, ziing 11 hunciam hongpia-hi. Ngaihno’ Suunkhua-ah kimuhding hongsuak-a, lem bilbel cihding ahihi. Melbourne Vaanleengtual-ah 13-ni nitaak nai 9-in Pa Mungpi (ZAA Treasurer), Tg. Thawng Mung (Assistant: ZAA Music & Art Dept.) leh Tg. Lalpu (Zomi Lal: Zotaang MLS) te-in hongkha uh-a, zaankim 12:50 hun-a kipan khualzin kahong kipan-hi.

Vaanleeng tung-ah Saangpenpa-tawh holimna naakpi-in nei-in, Ama’ Khut-ah vaáiteng ka-aáp-hi. 14 ziingsang nai 6:10-in KLIA2 ka-tusuk thei-a, MLS Immigration Upate tawmlua mahmah ahihman-in nai 7 khitteh ZAM Lutangpi Sia Khoi Tuang-tawh khut kileen-in grab-tawh ZAM Phualpi ka-zuan uhhi. Tuaciang-in kisil-in Zopuan (Puanlaaisan-tawh akizeempha) silh-in laiphahteng veelcian khitteh UN Upaphual zuanding ka-kithawi pahhi. Lutangpi Sia Khoi Tuang leh Sia Kamtawng leh Zomi Pauneu te-in hong zuui-in ka-paito uhhi.

Petition khiat ngeina hileh Refugee-Gate lampan-a piakding hi-a, ahizong-in tu-a petition-pen ZAA Lailu-tawh President Pa Deny leh Vice President Pa Paukaang te-in “ZAA aiawh-a hongkuan ahihi” cihna laiphah, ZAM Lailu-tawh President Sia Khoi Tuang-inzong “ZAM aiawh-a hongkuan ahihi” cihna laiphah-tawh ahihman-in Ulian leengla luutna lampan-in ka-luut thei-a, lawmte-in nisapi lak-ah nai 1sung hongna ngak-in minam veina omkeileh abaih peuhmahlo ahihlam telcian kahihman-in ka-angtang mahmahhi.

Lolimna

Kongcingte khat-in phualpi innliim-ah hongpuak khitteh Joanne-in hongmuak-a, amah-pen community liaison officer khatlel ahihna-tawh ka’ thaneem kawmkawm-in kazuui-hi. Minute 30 kiim ka-holim khit uhteh, “Manlahlua, kei’ tang-in Joanne-tawh kihoding hiteh” hongci daidai Protection Officer Brittocia hong luutsuk-a, “Aw, Zokhai, hong telsiam o-maw!” cihleh I’ laiphah veel pampam-hi. Paikhia pahding-a mangpha hong khaaksa hong tusuk hiat-hiat-in information I-piakte hong lungluut mahmah-hi.

Tawmvei holim khitciang-in, “Malaysia UNHCR-ah petition vaái leh kikheelna vaái limlim-ah alianpen leh mawhpuak neipen Richard Towle hi-in, amah-pen MLS UNHCR’s Representative ahihi. Na’ Submission-ah ‘High Commissioner’ na-address-pen “Submission to the Representative, Richard Towle” cih-tawh honglaih inla, email-tawh hongkhaak kiik in.” hongci-hi. Tualaaitak-in kongbiang-ah, “Kei Chin State pai-ing, Deputy Vice President Van Thio leh Chin State Chief Minister Hung Ngai-tawh kiho-ing. ‘Gaalkaap kumpi-tawh buaina neikei-ung’ ci uhhi,” pasal khat-in hong cisuk bokbok-a, “Richard acihpa hilian inciai” ci-in anuai-a bang-in ka-dawnghi:

“Deputy Vice President Van Thio-pen gaalkaap Sr. Major khat ahihlam na-thei-hiam? Mr Hung Ngai-zong gaalkaap Jr. Major ahihlam na-thei-hiam? Gaalkaapte-in amau’ tote-tawh buaina neileh atote-in panmun piading na-umhiam? Tua baan-ah amau te-nih Laimi akici Hakha Chin te hi-in, Chin State sung-a Hakha, Falam, Thantlang, Matupi lam-ah bitna a-omphial zong-in Zogam kacih-uh kampau nam hualpi khat azangh Zomite’ munteng-ah phalammanawh kikheelna bangmah omlo-hi. Na’ kimuhpihte kuabang-mi ahihiam cih-tawh khinkhai lo-in Chin State-pen peaceful na-cih ko’ social work concept-tawh genlehang, contextual-transparency omlo mapanna hithei khading-hi”, kacih ciang-in

Amaaitang hongsan beubau-in akhut honglaam-a, “Bang daan-e, tu-a?” ci-in I’ laiphah veelsuk pampam-hi. Brittocia-pen phone ho-in na-kiheem khiankhian-a, Joanne ahihleh khuadaak lo-in I’ laiphah sal lela-in nuam saktuak hetlo-hi. Minute 5 sungkhawng laiphah veel-in, “Hmm, maaikaal lam-ah Geneva-ah Malaysia Refugee vaái-mah apulaak ding kahih man-in, hih nong’ laipiak-uh lungdam. Reference hoih-khat anei hipah-ung. UN Representative, Richard Towle hong address in” hongci-hi.

“Na’ gam-uh akoici daan peuhmah aleh?” ci-in maaiziing liang-in hongdong-a:

“Ka’ gam-uhpen Gaalkaap Kumpi mah-in ukcip laai-hi. NLD Government-pen amaaiguan pakbek hi-a, Daw Aung San Suu Kyi inzong asunglam pan-a damdam-a zolzawhding lametna-tawh 2008 Constitution a signed man-in thaáng-awk suak-in taang theilo-hi. Namneu vaatmaaina nasia tak-in zom uh-a, Rohingyas te thahna, Arakanese dogawpna, Kachin dogawpna cihte online news khempeuh-ah kimu zihziah-hi. Ahizong-in UN Palaai khatpeuh apai ciang-in tuabang munte paisaklo uhhi. Tuabang news te akhahkhia journalist nihte amatcip-uhzong za ding-in kong umhi. Tua baan-ah, Thei Sein Government akahma nangawn-in UN Palaai-in Razali kisawl-a, tuapa-in Yangon khualaai tengbek mu-in, “Kawlgam-ah buaina omkei” acihmiau-zong mikim-in athei-hi.” kaci-hi.

Lamdang saktuak simsim-a, tua ciang-in amau’ dinmun anuai-a bang-in hong hilhcian-hi:

“MLS UNHCR-in refugee te deihsak mahmah kahih-uh hang-in UN-in refugee-a saan theihding-a thuguipi 5 te’ lak-ah khat teeiteei-tawh akinahvawh keileh refugee hilo cih ahih-tawh kituak-in refugee te’ bit nading ngiimna-tawh case assessment (athu-ala telgehna) bawllo-a card kipia masa tam mahmah-hi. Tuate akitelgeh ciang-in refugee-a saantheih nading ataangpi lampi omlo-hi. MLS-ah a-om laaitak refugee za-ah 90 vaal-pen UN Case hilo-hi. UN Case lote UN-tawh kinahvawh dingpen UN’ ading-in thumaan hilo baan-ah vangikpi suak-hi.

“Tua ahihman-in UN Case himaw hilo cih veelcian meengmeeng-a ahilo khempeuh card lakiik-in UN-tawh kizom nawnlo ahihna akibawl saan laaitak ahihi. Holland, Netherland leh Sweden pan-inzong hih Telgehna honghuh ding-in sum-tawh akicial ahilo, volunteer hongseem tampi omhi. Hih case teng kitelgeh ding-a, siansuahna kibawlding cihpen tungsiah pan-a thupiakna ahihi.

“Tua baan-ah, US President-in refugee 20,000 alaakden-pen 500-in khiamsuk-a, tua-inzong naakpi-in refugee-intake (gaaltaai laakluutna) hong susia ahihi. Tua ahihman-in tualsung kipawlna (community organisation) naakpi-in thahaat sak un, UN-in hongkom honghuai zo nawnlo khading ahihman-in tualsung kipawlnate naakpi-in hong thupi dinghi. Tuateh muhlehtuah (experience) sung-ah UN thuguipi lak-a khatpeuh-tawh kinahvawh napi-in interview-ah agen khalote a-case-uh puahphatna, new information leh support letter (tawsawnna laiphah) cihte na’ mipihte’ kiang-ah pulaak in. Alemleh tuate card kilakiik lo kha-maithei dinghi. Tua simloh kong lamlah nading leh kong huh nading alampi atheilo leh a-omlo ahimai-hi”, ci-in khut hongleen-in pusuak-hi.

Tawmvei Joanne-tawh kiho-in, “hong kivaaikhaak tengmah na-pulaak inla, amanlaang theipen-in hih petition address na-kheel zawhteh hongkhaak pah in” hongci-hi. Melbourne pan-a ka-puak AUD 20 tak-a ka-lei Aktui Sokleh gol mahmah pheiicia khawng ka-piakleh, “Ko UN Staff te, hihbang letsong cent khat nangawn asaang loding-a thukimna limkaih abawl hi-ung, hong telsiam in” ci-in kisuang pipi-in hongsaang ngamlo-hi. Tua ciang-in, “Aw, himah-ei. Lung nuamlo kei-aw, poikei” ci-in mangpha kikhaak-in ka-kikhen uhhi. Aziingteh Dr Pinu’ kiang-tawh Sia Khoi Tuang-tawh Mirama Hotel-ah suun-an nekhawm-in Hihthu kagenleh, “Nuvaw lawmlawm, Joanne-in nang refugee hong salaai hizen lodia…” ci-in ka-nuui uhhi.

“Tualsung kipawlna thahaat sakding” thuguipi khat hongsuak ahih-tawh kituak-in ACTS aphutkhia leh atawsawnpi Rosemary-in kimuhkhop nading hongnget-pen amasa-a ka-kin meelloh hinapi, hong call kiikkiik ahihman-in 18 Nikaai Nai 3-in ZAM Lutangpi Sia Khoi Tuang leh ZAM Health Coordinator Sia Khuppi-tawh vapai-in ka-holim uhhi. Rosemary-in Chin leh Zomi vaai-pen abeisa hun-ah ei athuduh mawkmawk ciang-ahongseh hi-in Chin-mah hongcihcih ahihi. Ahizong-in tu-in Zomi dinmun akician zawdeuh-in thei-a, refugee te’ ading Richard Towle-zongtawh ana-kinial thapaai khat ahihman-in Current Myanmar Issue-pen naakpi-in lungluut-in hongdong ciatciat-a, ka-gencian ngiatngiat-hi.

ACTS-pen UN hong thakiam suksuak takpileh Zomite’ kibuk nading kipawlna thupi khat ahihi. Nidang-in Rosemary ka’ thusim kholkei-a, ahizong-in asanggampa Matt bang-pen Sir lukhuneelkaai angah Malay-Seen hi-in, asanggampa’ tawsawnna mah-tawh NGO phungcing khat asuak ahihman-in thupi sa-in zahtaakna kapia-hi. 2002 kiim-a kipan-in dammawhna-tawh amau’ kiang azuante ataangpi UNHCR-in humbitna (protection) apiak nading phuutpihna nasiatak-a anei kipawlna hi-a, tu-inzong (gentehna-in) UN-in angeina-a nausuakte huhna apiakloh cihte-pawl Human Rights pansan-in naakpi-a aphu thapaai Numei Ngalliam khat ahihi. UN-ah ka’ gen khempeuh ama’ kiang ahzong kagen-a, “information thak na-ngah bangbang hong hawmsawn pahpah in” ci-in hongngen-hi.

Malaysia-a Sisanpihte’ kiang-ah Zomi Crusade-a ka’ pulaak mahbang-in:

Na’ taangthu uh-ah –

• Namneu hihna hang-a khentuamna leh simmawh bawlsiatna
• Biakna hang-a khentuamna leh simmawh bawlsiatna
• Minam hihna hang-a khentuamna leh simmawh bawlsiatna
• Tualsung kipawlna (minam kipawlna, biakna tuamtuamkipawlna, khangno kipawlna…) cihte-ah kihel man-a khentuamna leh simmawh bawlsiatna
• Kiukna lamsang nang’ lungdeih sinthu ziak-a khentuamna leh simmawh bawlsiatna (lpd: Democracy deihna hang-a……)

Hihteng’ lak-ah khatbeek akihel keileh hongsap kiik ma-in:

“New Information” ci-in ZAM-ah hitaleh ZRC-ah hitaleh, Biakna Makaaite’ kiang hitaleh English gelhsiam-a taangthu zuunsiam khat peuhpeuh kiang-ah gelhsak/puahsak-in UN Mailbox-ah khia un. Laiip tung-ah tungthuh ding-in:

To UNHCR Malaysia

“New Information” of (na’ UN Min)
UN File No………………….

Khatvei bek khiat-tawh khamuang lo-in akibang sitset-mah kaalnih halta bang-in na-khia zaw un. Pasian-in lam hong honsak nopleh na’ laikhiat hoihtak nasim ding-a, na’ taangthu kisenna data sung-ah naguangleh card hong lakiik lo-in damdam-in gam thumna-zong akipai thei veve ahihi.

Case Veelcianna:

1. Kawlte’ kiang-ah leitawi-in tuulza 10-pen kum 1 hongciang-in tuulza 15 hongngen-a piakding neilo-in hongthah sawm-uh ahihman-a hongtaai hing……..

(Leiibat-pen sum leiitawi na-laak limlimleh na-piakding na’ mawhpuak ahihman-in mimawh cihna kilangh-a, hong kisaang hetlo dinghi)

2. Zu gallon golpi khat ka-puak laaitak gaalkaapte’n hongman-a, “ka’ kivaakna-hi. Ka’ human rights hong susia kei un” kacihleh hong vua uh-a, hongtaai kahihi…….

(Malaysia bang hizenzenleh gapsum leh thongkhiat thuakding nahih man-in hong kisaang hetlo dinghi: rights cihpen uutbangbang hihtheihna hilo-hi)

3. Kikhawm pai or Zaanvaak (carol) or Crusade thungai-a pai, gaalkaapte-tawh kituak, hongman, matpongten hongsut, ….. tuapan hongtaai…..

(Kikhopna, Crusade siimna, zaanvaakna cihte-ah matpongten kipua lo-hi. Tuabaan-ah nang teekteek abanghang-a hongman? Bangteng honggen, cihte-tawh puahphat kisam-hi.)

Hih atung-a case daante-pen “Kawlgam-a om-in Kawl Biakna zuuilo, Gamkeek Mikaangte’ Biakna na-zuih limlim-uh Kawlgam-a omding hikei uhteh……” cihbang-in gaalkaapte’ kampau dingdaan-a behlaptheih ahihi. Zu-puak vaái-bel idea neipak keihang.

2012 Kawlgam Gamukte’ Thusuah-ah, Porter om nawmlo, Gaalkaap kaihkhopna om nawnlo, 2015-a abehlap-uh: Yangon-a ILO-in refugee hong ciahkiikte nasep silbawl vaaihawm sakding acihpen-tawh hongkaap ding uhhi. UN Uliante’ kiang-ah tutung I’ pulaak-pen:

“ILO peuhmah ko Zomite-in azaak-in za ngeilo hi-ung. 2015 Kiteelna-ah NLD-in zo-a, “Refugee Ciahkiikte Muak-ung” acih ciang-in kilungdam mahmah-in Zomi khenkhat vaciah takpi-hi.

“Yangon pan-in NLD Government ahilo gaalkaapte-in min malsiam la ciatciat uh-a, hihpen naakpi-a alunghihmawhhuai thu ahihi. Gamdang khempeuh-in Daw Aung San Suu Kyi amuanna beileh gaalkaapte’n thuneihna-tawh hong gawtkiik peelmawhding cihthu akithei ahihi.

“Khenkhatte tuulza-2 pia uh-a, ‘na khuavauh ciah un’ cise-hi. Khua ciangdong lamsaap asik hi bilbel mahhi, ahizong-in munlehmual nei nawnlo, sepding omlo ahihman-in social isolation-tawh depression naakpi-in khang-in gui-awk mi-zong 2017 sung bekbek-in 4-bang om-a, adang khangno tampite mental health problem(khuaklam dammawhna)-tawh mihing ahihna asuplawh tampi omhi.

“Kawlgam-pen democratic kalsuanzia-tawh kalsuan peuhmah lo-a, tu-a NLD Government-zong aminpua bek hi-in, akamkaih aleenpi-pen gaalkaapte mahhi. Arakan gam-a thupiangte, Kachin gam-a thupiangte….. amau-tawh State kibang ka’ hihloh-uh hang-in ko-zong tribal or nationalities hi-in ko’ State-a thautawi CNF om sunsunte Kawl Gaalkaapte-tawh kiguulluuk ahihman-a ko’ State-ah thau-tawh hong kaapgawp lianlo bek ahihi. Akilanghlo khentuamna, simmawhna cihte abeisa kumdangte-tawh kidang lo-hi.” cihdaan-a theihding, dawn siamding amansa-in omding hoihhi.

Gelhnop tam taleh gimlua laai ka-hih man-in thukoh hihteng hongbawl hipak-ning. Note-tawh, Zokhai