Malaysia, Sungai Buloh ah inn kicim in nupi naupaai khatleh pasal 3 si

Malaysia, Sungai Buloh ah inn kicim in nupi naupaai khatleh pasal 3 si

Malaysia, Sungai Buloh vengsung aom inn kilamsan laitak ahi Construction Site khatah inn kicimsuk in nupi naupaai laitak khatin sihlawh cih theStar pan kiza hi. Tua nupi naupaai pen inn kicim in adenkhak amuh ciangin ahuhding in adelh pasal 3 tezong Electric mikhau in sukha in, datlaih (Electrocuted) in sihlawh sawnsawn uhhi.

Hihvai tawh kisai in kumpi thunei ahi Selangor Fire and Rescue Department director Norazam Khamis in agenkhiatna ah tua akicim innpen aki lamsan laitak hi a, inndawl 2 apha cihi. Zanni Sunday sunlam in thupiang hi a, inn kilamsan ii akahlei Staircase aki cimsuk cihi.

Hih tuahsiatna thupiang aom ciangin nitaklam 12:57pm hunpawl in cimawh dongtuak huhngetna hongki zasak in, amanlang in meiphelh mawtaw Fire Engine khatleh mi 7 aphual ah ki delhsakpah cihi.

Nupi naupaai pen kum 27 aphakhin khat hi a, Construction Site ii kahlei akibawlsan pen aki cipsuk ciangin adengkha ahihi. Tuabangin kahlei kilamsan aki cimsuk in nupi naupaai adenkhak amuh ciangin ageinai aom pasal 3 in amanlang in delhpheipah uhhi.

Ahi zongin ageinai ah Electric meikhau akiasuk omkha citciat in, tua Electric meikhau in nupinu ahonding in adelh pasal 3 te sukha ahih manin, tua pasal 3 te inzong asihlawh sawnsawn uh ahihi.

More: Malaysia LRT meileng sikzawn tungah nupi naupaai khat kiasuk, gawilum khalodeuh

Hih Construction Site tuahsiatna hangin mihing luang 4 in aphual ah thakhatthu in sihlawh uh a, Fire Fighter te’n aluanghawm uh aphual panin aki lakkhiattheih nadingin huhin hepkhiatpih uhhi. Hihbangin tuahsiatna akipatna ahang taktakpen kumpi thunei te’n akansan laitak uh cih kiza hi. Sawltak #zomidaily