Apaikhawm liailiai innkuan mi 6 mawtaw in anawkgawp laitak Video

Innkuan mi 6 apaikhop liailiai laitak mawtaw in nawkgawp in mi 5 si, naupangno khatbek suakta

Innkuan akigawm in mi 6 lampaikhawm liailiai kimlaitak, anungpan in Four-wheel mawtaw khatin anawksuk laitak Video pen nungsungteng Social Media ah ki limsuahsak mahmah hi. Hih tuahsiatna Accident apianlaitak pen CCTV panin Video Record akibawlkha hi a, cikziat huai leh mulkimhuai mahmah hi.

Tua CCTV Video sungah nupi khatleh papi khatin akhut aveilam leh ataklam tuak uhah atate uh nihta akhut lenkawm in, pailiailiai uhhi.

Tualaitak in anunglam panin mawtawkhat hathawl mahmah in, tua innkuan mi 6 kilenkhawm in apai liailiai te phusukmawk hi. Mawtaw pen hathawl mahmah ahih manin, tua innkuan mi 6 te amailam ah kilawnzak uh a, kitheh kekgawp uhhi.

Anu leh naupang 3 tepen mawtaw in aphut ciangin huihlak ah kilawngawp in gamlapi kidenna hi. Apa uhpen mawtaw peikawm in ki zialcip in, mawtaw akhawlcipdong ki taalkaihgawp hi.

Tua innkuan mi 6 lakah naupang pasalno khatbekbek suakta in, tuapapen mawtaw in anu apa asanggamteng anawkkhit ciangin amathu in thoto liamliam hi. Tuaciang in anunglam enzel, amailam enzel in, lamdang saktuak mahmah hi. Tuakhitciang a innkuahpih te akilotkhiatna mawtaw lamah zuanin pailiamliam hi.

Hih innkuan mi 6 lakah tua naupangno khatbekbek suakta in, adangteng si cimawk hi. Tua naupang pen amahguakbek hi a, kapvangvang kici hi. Bangzah in khasiat huaihiam?

Adang Video khatah tua mawtaw tawh anawkkha Four-wheel Driver papen mipi te umcih in, amahpen lukunsa in, khutdin in mipi te tungah mawhmaina ngen kici hi.

Video: 4WD driver ploughs through family of 6, leaves toddler lone survivor

Hih thupiang pen October 02 ni in China gamsung ah thupiang kici a, Social Media tungtawn in amukha Netizens te’n Comment tuamtuam pia ngeingai uhhi. Pawlkhat in hih Driver papen zukhamsa in ahawl hiding hi, innkuanbup dekphial athatlum ahih manin, amawhzong ki khailumhen, sihdan kipiahen acitawh. Pawlkhatin akhialkha hiding hi, amawhna maisak huaihi acitawh. Nang e, bangdan in thu kikhenleh hoih nasa a?

More: Yangon khuasung YBS Bus tungah damiah ataih mi 2 kiman

Zukhamsa in mawtaw ahawlmaw, hih innkuan te ngimna tawh ataihlum ngiatmaw cihbel theikhangin, ahi zongin atano mahmah, innkuan tawh akhangkhiading laitakpen tagah suakziau mawk hi. Sawltak #zomidaily