Malaysia Hypermarket tungpan Plaster kiasuk in mawtaw dengkha

Malaysia Hypermarket tungpan Plaster kiasuk in mawtaw dengkha

Malaysia, Subang Jaya ah mawtaw hawlkhat atungpan innlamna in akizang Plaster kiasuk in dengkha ahih manin, liamna ngah cih NST pan kiza hi. Zanni Tuesday ni nitaklampawl thupiang hi a, USJ1 sung aom Hypermarket khatah ahihi.

Selangor Fire and Rescue Department panin thunei te genkhiatna ah USJ 1 aom Hypermarket ii atungpan in Plaster akiasuk hi a, nitak 3:40pm hunin thupiang ahihi ci’n genkhia uhhi.

Mawtaw hawlpa pen kum 52 aphakhin khat hi a, mawtaw akoihnading Parking zongin apailaitak in atungpan innlamna in akizang Plaster bakpikhat kiasuk cihi. A mawtaw dengkhasuklian a, ami inzong liamna ngah cihi.

Mawtaw hawlpa pen University Malaya Medical Centre ah zatui kibawlding in kipuaksuak pahhi.

Malaysia gamsung ah innlamna Construction tawh kisai Safety omlua khollo, hoihlua khollo ahih manin, inn kilamna Construction khatpeuh nanawkkhak ciangin kidawm mahmah in.

Tuahsiatna tampi kizaza khinhi. Tulaitak diakdiak in muntampi ah meileng lampi zikbeh, bawlbeh kawikawi uh a, leisung thukpipi tosuk uh ahih manin, tuagei kiimte kidop huai hi. ZD Sawltak #zomidaily