Indonesia ah biakna gensia ci’n Christian Governor kingawh

Indonesia ah biakna gensia ci’n Christian Governor kingawh

Nov. 16, 2016: Jakarta khuapi-a Christian governor Basuki Tjahaja Purnama in Pasian (Allah) gensiatna kammal hoih lo zang (blasphemed) hi ci-in ngawhna tuak a, hih thu sawtpi police ten a kan (lengthy preliminary investigation) khit ciangun tu-in Basuki Tjahaja Purnama in thusitna thuak ding a, thukhenna mai-ah kidingsak ding hi kici ta hi.

Basuki Tjahaja Purnama pen Chinese minam hi a, Ahok ci-in kisam hi. Jakarta governorship ding kituh lai-in a vote zonna ah Muslimte Lai Siangtho Quran gensia hi ci-in kingawh a, tua thu hangin Jakarta khuapi a lungphona leh thagum suahna nakpi takin piang hi.

Indonesia pen leitunga Muslim tamna pen gam ahi hi. Purnama in a vote zon lai-in Quaran sunga tang/kammal pawl khat (verse) zangin ama’ langpang ten Muslim vote a ngah theihna ding uh leh mi a khem theihna dingun Muslim mi ahi lote makai in teel kei un ci-in gen uh hi ci-in ngawh in, a mawhpaihna thu na gen hi.

Purnama in Quran gensia cih ngawhna thu thang ngeingai a, Muslim ten a zak uh ciangin Nov. 4 in lungphona mi 100,000 val in nei uh a, nitak in lungphona neite ngongtat gawp uh hi. Hih thu hangin moderates leh conservative Muslimte nangawn lungkim lo Nipi kal tampi sung thukanna (preliminary investigation) kinei a, biakna thu lamsang siamte leh phychological experts-te zong thu kidong a, Purnama’ tunga ngawhna pen thukhenna innpi ah sian’sak dingin pha kisa hi ci-in thukanna sunga kihel National Police criminal investigation department chief Ari Dono Sukmanto in ci hi.

Purnama in hih ngawhna tawh kisai September kha-in maisakna a nget hangin politics lamsangah a lang ten Purnama’ Quran kammal zatna mun pansan lo zaw in, Quran gensia hi ci-in ngawh hi. #Thu-ummi ten I thungetna tawh huh in, phawk tek ni. Source: Al Jazeera News And Agencies/ Thang Khan Lian