Malaysia gamsung ah Beer pawi kibawlsawm ahih manin buaina piang

Malaysia gamsung ah Beer pawi kibawlsawm ahih manin buaina piang

Malaysia gamsung ah “Better Beer Festival 2017” cih Beer tawh kisai pawipi khat akibawl sawmsawm hi a, ahi zongin agammi leh adiakdiak in gambiakna kipawlna pawlkhat te’n phallo uhhi.

Hihvai tawh kisai in tuni Malaysian NGOs Coalition chairman Datuk Seri Jamal Md Yunos makaihna tawh lungphona khat kinei hi. Selangor state secretariat building’s (SUK) ii amai Gate ah Beer honkhat sekpi tawh semzan in nusiat uh cih NST pan kiza hi.

Jamal makaihna tawh alawmte mi 20 valding khawngin Beer tawingeingai uh a, SUK Gate panin asungah lutsawm uhhi. Tua Beer tepen Selangor Menteri Besar Datuk Seri Azmin Ali ii azum sungah kapuaknuam uh cicitciat sese uhhi.

Ahi zongin Gate panin Security Guards te’n lutsaklo ahih manin, lungkim hetlopah hi. Banghang in asungah lutding hongki phallo hiam? Hihlai ah buaina apiangsakding in hongkithawi hilo hing. Hih Beer te Azmin’s Office ah apuakding in hongpai hi ung. Malaysia gamsung ah ahoihlo, aki lawmlo gamtatna leh phattuamna aomloding te tha piakei hen.

Hih Beer te adawnnop leh SUK zumsung ah dawnhen. Ahi zongin SUK zumpua lamah zukhamsa in omkei hen. Azmin in aduhleh dawn, akhamnop leh khamcip, asih noplehzong azumsung ah sisuk hen cin lungphona makaipa’n genkhia zikzek hi. (theihding: gammi biakna te’n Beer leh zu limlim dawnkhual aomlo hi a, hih Beer apuaksawm pen akhelbawlna ahihi)

Malaysia gamsung ah akibawlsawm Better Beer Festival 2017 pen amanlang in Cancel mengmeng hen. Haivai mahmah, ngaihsutna beihuai hi. Ziakai hetlo in amanlang in Cancel mengmeng hen ci’n genkhiatbeh hi.

Tuakhit ciangin tua Beer te leilak ah koihsuk uh a, sekpi khattawh khawngsukgawp hi.

Hihbang in agamtat pen SUK enforcement chief Misnun Ramli lungkim hetlo hi. Lungphona aneih nopleh adang ah lungpho hen. Hih Gate pipen mi tampi alut, apusuahna hi a, tu’n lamzikpi tungah thawlkitam tampi kithehzak in, lauhuai mahmah hi. Amanlang in hong siansuahkik uhhen cikik leuleu hi. Hong thudonkei uhleh Police Report kibawlding hi ci ek leuleu hi.

Video: Jamal Yunos smashes crates of beer at SUK entrance, leaves others to clean up mess

Sunlam ciangin Police mi 5 khawng tua lungphona aneihna phual ah tung uh a, tua Beer thawl kitamteng pen SUK Cleaning Contractors te samin ki siansuahsak hi.

Kuala Lumpur City Hall te’n Malaysia gamsung ah akibawlsawm Better Beer Festival pen a Cancel sakkhit uh ahihi. Ataktak in Publika Shopping Gallery ah zingleh thai ninihsung akibawlsawm hi a, ahi zongin IS te nangawn in Beer pawipi akibawl leh ka buaisakding uh cihkhawng dongin buaina tampi kiza ahih manin, Security lunghimawhna tawh aki khawlsakkik ahihi.

Related: Vanleng tawh khualzin khatin Beer bungkhatbek Check-in bawlsese

Tuaciang in Klang vengsung aom Centro Mall ah October 12 ni in bawlding in akisawmkik leuleu hi a, tuavai teng alungkimlo in lungphona anei uh ahihi. Police te’nzong Klang vengsung ah bawlding pen Security Concern hangin phalna pianailo cih kiza hi. Tua Beer pawipi pen German Food and Beverage Festival zong kici hi. Sawltak #zomidaily