Leitung beima teng Zomite galkap i kisam dinghi

Leitung beima teng Zomite galkap i kisam dinghi

Galkap cih kammal I zakciangin Kawlgam galkap khutnuai a, a khangkhia mi a tamzawte lungsim khat hong lawndan tuamlak in I muhdan, I zakdan khat Democracy ki ukna a, a khangkhia mi a tamzawte tawh I omdan nangawn ki banglo hi. Bang hang hiam cih leh Kawl galkap te’n a sepding uh khengval semin mipi numei, naupang nangawn a utut un abawl hang hiding in lamet huai hi. Tua ahih manin Zomi Pastor a tamzawte leh Zomi Christian piangthak a tamzaw te’n galkap peuhmah thapialo, thupisalo uh hi. A hang pen atom in genleng I ki ukna ahoih loh luatman ahi hi.

A hizongin thu ngaihsun taktakleng, Zomite galkap kician I om kei leh nikhat niteh I biak-innte nangawn hong ki haltumsak in a mite mahmah zong, Christian I suahna hangin Islamic gam, Hindu gam, Communist gam, Buddhist gam etc, pawlkhatte danin hong kithat in a utut un hong bawlthei ding, ahih lam uh phawkhuai hi.

A hangin I kiangah Meitei tapongte leh Arakhan tapongte Christian hilo uha, tulaitak hong ukcip India kumpi leh Kawl kumpi zong, I theihsa mah bangin Christian hilo uh hi. I deih Federal ki ukna, Separated administration leh Zogam in suahtakna hong ngah kik in nidang, I pu I pate hunlai danin ki ukna ngahkha hi zenzenleng, galkap hong kisam tektekding hi. Galkap kician neilopi in suahtakna bang, ngahkha zenzenleng, Kawlgam in suahtakna a ngahteh galte’n thakhat thu in General Aungsan a suamlup giap bangun zankhat thu in I veng, I pam te’n galkaptha tawh hong ukcip thei na hi gige hi.

Tua bang hong piankei phial leh zong, galkap dan sinding in mi pawlkhat koimun, koigam hiam khat ah I sawlkhiat loh hong phamawh ding hi. Hih thute ngaihsunleng, mipi in tulai tak a, paltan nasemte tha I piak kei leh hunkhatteh kua mah in zong semnuamlo, utlo thei dinga, a tawpna ah I mibup in I thuaklawh thei ding hi.

Tua ahih manin tulaitak, Zogam leh Zomita dingin sun le zan cih omlo in thosi, thovai leh guahnuai, dainuai ah, na asem Zogam tangvalte neumuh huailo, simmawh huailo, vasuk nawngkai huailo hi. Gam leh minam I it taktak a, I tu, I tate mailamding, saupi I khual takpi leh thapiak huai hi. Lamkhat leuleu ah tulaitak a, asem, a bawl te’n zong mailamding, saupi ngaihsun in ei om nawn lohteh I maban khangthak te’n a zopnop na dingun mipite tungah gamhtat khagawplo in lampi limtak I sialsak kul ahih lam hong phawksak hi.

Tulai tak a, asem te’n go le gam hong nusiatlo in min le vang, sum le pai ngah nading ciang bek in hong sepkhak mawk uh leh a tunga I gen Kawlgalkapte muh danin khangthak Zomi pawlkhat in hong kimu dinga, nam khat leh namkhat ki dona nasia mahmah hong om kei buang leh Zomi paltan ding mi hong hamsa mahmah thei ding hi.

Hici bang thute I genciang in mipi leh paltan a semte limtak thu I ki kupkhop zel kul ahih lam hong phawksak ban-ah Pasian mi, Pasian thupha ngah a, aki ciamteh Israel mite zong, Abraham khanga kipan tuni tan, galdo zel leh galkap nanei den uh ahih manun Israel mite Pasian, Abraham Pasian abia Zomite I hih takpi leh leitung beimateng, galkap kisam dending hihang. Zomite 1894 kum pek in Chin Hills Battalion min tawh galkap dingkhin himahle hang, ki botsat zel hi.

Galpi nihna venkhit Pu. Tun Kho Pum Baite makaihna tawh CLA hong piang a, thahat khin mahmah hita leh I vengte I muanluat khak manin a tawpna ah “langbawm a-ek a awk,” I cih bangin eima pattah sateng mah in mulkimna, khasiatna neihetlo in hong buzial in hong vatmai uh ahih lam I theisa hi. Tua mah bangin Pu. Thual Zen leh a lawmte zong, mipite I ginat loh man hiam, hong beimang zel hi.

Tu-in Zomi te’n galkap kician leh leitung I hong theihpih ZRA I neikik a, lungdamhuai hi. A beisa a-te danin a tat nawn loh nading in tulai tak a, asemte leh mipi in mailam I gam leh I minam dinmun ding, saupi ngaihsun in limtak zunhuai, puahhuai hi. Bangh hang hiam cih leh minam kician khat, gam kician khat in galkap neih loh phamawh hi.

Tulai Kawlgam Arakan State buaina leh Rohingya te tung pan zong, I minam nasep na ah sinding, phawkding, kigin kholhding thu tampi hong musak hi. Zomite Christian I hihtakpi a, Abraham Pasian, Pasian in I neihtakpi leh Pasian mi ahi, Israel mite mah bangin leitung beimateng galkap I kisam ding hi. Khaibawi