Lawi ek lakpan apiangkhia lungno tetawh Burger limmahmah kibawl

Lawi ek lakpan apiangkhia lungno tetawh Burger limmahmah kibawl

Germany gamsung aom mipil misiam te’n lawi ek lakpan apiangkhia lungno tetawh nektheih Burger bawlkhia uh cih Reuters News pan kiza hi. Germany, Aachen City sung aom Supermarket khatah tua lungno tetawh akibawl Burger pen ki leitheita hi.

Tua lawi ek lakpanin apiangkhia lungno te ii aminpen Scientific Name in “Alphitobius Diaperinus” kici a, English in “Buffalo worms” kici hi.

Tua Buffalo Worms kici lungno te sungah Protein tampitak kihel ahih manin, nekding in hoihmahmah “highly nutritious due to their high protein content” ci uhhi.

Tuabang Buffalo Worms tepen Netherlands gamsung ah kipiangsak in, tuakhit ciangin nektheihding in hoihtak in akibawlkhia ahihi.

Netherlands leh Belgium gamsung ah hoihtak in aki zuakkhiat khitciangin, tu’n Germany gamsung aom Aachen City sungah Supermaket te ahzong aki ngahtheita ahihi.

Tua Buffalo Worms lungnotawh akibawl Burger tepen angeina Burger te mahbangin akikal ah mehthuk, lothangsan, anteh (Tomatoes, Onions, Lettuce) cihte kitep in, nektheihlian dingin kizuak khiata hi.

Buffalo Worms lungno tawh akibawl Burger pen anekha te’n limsa mahmah uh a, sa kullo, sa taangin aki nethei hi a, lim mahmahhi ci’n genkhia uhhi.

Hihbangin lungno tawh Burger bawltheih nadingin hong pankhia pen “Bug Foundation” kici Company khatpan hong patkhiat uh ahihi.

Company Founder khat ahi Baris Oezel in agenkhiatna ah kum 4 sungbang hoihtak in kankhia in kabawlkhiat, kaki patkhiat uh ahihi ci’n genkhia hi. Company co-founder Max Kraemer kicipa tawh semkhawm in hoihtak nektheihding in abawlkhiat uh ahihi.

Hihbangdan lawi ek sungpan apiang lungno nektheihding in idea angahkhiatna pen Asia gamsung azinna panin amuhkhiat uh ahihi. Adiakdiak in Southeast Asia gamsung aom te’n Insect lungno tuamtuam pen kihdingin ngaihsunlo uh a, nektheih an bangdanin ngaihsun uhhi.

Baris Oezel in agenkhiatna ah hih Buffalo Worms lungno tepen nektheihmel apuading, alimciding in zepkul a, Insect tawh akibanglo dingin bawlkul hi. Tuabangin lungno tawh kabawlkhiat uh Burger tepen agim namtui mahmah in, mite cilphulsak in kiduh mahmah hi ci’n genkhia hi.

Zogam ah khuaino pen mehlim mahmah in akituak ahihi. Khuado ciangin khuai kilakzia, khuai aihla cihte ki pulakthei zelzel hi. Khuaino anethei, lim asa te’n hih lawi ek sungpanin apiangkhai Buffalo Worms akici lungno tawh akibawl Burger pen nekngamlah omlo khading hi. Khuaino leh Buffalo Worm tepen alimna kibang pianlel khading hi.

More: Khuai Khawi A Thupitna ~ Thang Suan Mung

Zogam diakdiak in sa nekkhakding pen hamsa mahmahlai, sa kinezo hetlo hi. Hih lungno tepen Protein tampi kihel ahih manin, sa mah abang hipah hi. Zogam ahzong lungno tuamtuam nektheihding in bawltheileng, sa kingawllo khading hi. Khuaino pen ataktak in lungno “Worms” namkhat mah ahihi. Ahi zongin Zogam ah nidang in mehlim mahmah in aki ciamteh ahihi. Khuaino akineklam atheilo te’n Khuado tangthu te simkikleng….. Sawltak #zomidaily