Makai te tungah thum kikna ~ Pau Sian Lian

Makai te tungah thum kikna ~ Pau Sian Lian

Politic cih kammal khiatna genzeel lehang, Max Weber genna ah, a ki ciangtan sa gamhuang sung-a om mipi-te khuasakna ah (community) thuneihna hawmna (distribution of power), cih ahihi (distribution of power within a given community). Tua thuneihna (power) nuai-ah sum vai thuneihna (economic power) le tangpi vai thuneihna (social power) cih bangin khenpi nih-in kikhen kik leuleu hi. Sumvai power neihna hangin vanzuakna, sumbawl, sum zonna te ah suakta takin vaihawm, khensat theihna hi-in, tangpi vai thuneihna nuai-ah zong politik lam nunzia danding a kipan zumkong mangkong vai te-ah mipi te koicih makaih, panpih, huhding cihte geelin sem, khentat theihna thuneihna kinei suakhi. Tua ahih manin politic kammal cih lawh simin thuneihna (power) in a zuih loh a phamawh hi.

Thuneihna ngah nading in galkap ki-ukna (dictatorship) le mikhat khantawn ukna/ ukpi ngeina (monarchy) ki-uk zia cih lamte-ah gal-le-sa, thagui-thatang hat, thauvui thautang hauh kul-a, thuneihna panmun ngah lehang lah ut bangbang in ut tantan ki-uk theihi. Thunei-te’ kampan a paikhia bangbang thute in thukhun hipah ziauhi. Thukhun zui-a ukna (rule of law) hilo-in thukhun zang-a ukna (rule by law) a hihi. Democracy ki-ukna ngeina ah thu neihtheih nading ahih leh thatang hat, galvan hauhthu hi masa lo-in suakta takin kiteelna (election) ah kidem-a mipi te’ deih, mipite’ lungkim takin a khiat meetang a tampen ngahte-in thukhun zui-in ukna ahihi.

Hih bang ih gen miatmuat na-in politic banghi-a, koicih kigamtat hiam?, cih phawksak kiknopna hizaw hi. Politic ah a kihel, politician khat ahih nakleh thuneihna ngahna ding pen ih ngimna (end) hi masa-a, tua ngimna tun nading-in kizang lampi (a mean to an end) pen kiteelna ah kihel-a demna ahihi. Ahi zongin politic ah a lutlo, mipi te’ ngimna (end) pen a tuamdang khat hi leuleu hi. Democracy ngeina-ah, mipi in lunggulhna khatpeuh tangtun nadingin a kiteel palai te sawlna in mipi-te’ ngimna tangtun nading lampi tampi lakpan a muibun diak lampi khat (a powerful mean of many) hong suakhi. Mipi te-in ih ngimna tangtun nading politician te kizang hizaw hi. Tua ahih manin tangpi le politician te dinmun kibang lohi.

Mipi meetang tawh hongkah politician te’ thuneihna te zatkhiat na dingin Zomi te’ lunggulh sunmang taktak (goal, end) bang hi-a, banghang taktak in kiteelna peuh buaipih zeelzul mawk ih hiam?, cih ngaihsut zeel huai kasa hi. Zomi te’ ngimna in ih deihsak mimal khatpeuh, party khatpeuh thuneihna ngah limlim leh, cih ngimna nei ih hihleh kiteelni meetang khiatkhit phetin mipi lampan septheih, kinluat ding bangmah omlo hi. Ih ngimna (goal) a ki tungkhin hiziau hi. Tua hilo-in Zomi te in lunggulh diak hamphatna khatpeuh nei-a, tua lunggulhna tangtun mateng, kiteelna ah sawm vei, za vei meetang ih khiaphial zongin ih kung (end) a kitung hinai peuhmah lo hi.

Vai khatpeuh ah ngimna (aim, goal, end) a kineih teh tua ngimna pen piciang nga ( 5 criteria) tawh kiteh masa hamtang hi. Gam tuamtuam a sumbawlna, gamvai sepna kipawlna tamzaw te-ah ngimna kinei te pen a taksuak theih nading in S-M-A-R-T cih piciang nga tawh teh masa denuh hi. Tua piciang te teng enpha kikni.

(1) S – specific: a kician sitset ngimna neihna a hihi. Na khempeuh huamgawp nianua hilo in a kitel siang thei ngimna neih ding kulhi.

(2) M – measurable: a kiteh thei ngimna hihding kisam hi. Kician ngimna ahih leh tehtheih, sit theih ngimna ahih kul hamtang hi.

(3) A – achievable: a kisem khia thei, semzo thei ngimna ahih kulhi. Sunmang pawlkhat te lunggulh huai na pin cikmah hunin kisem khia zolo ding lunggulhna pawlkhat omthei hi.

(4) R – relevant: eitawh a kilawm, a kituak ngimna neihna ahihi. Ei ading kisam taktak ngah nading ngimna ahihi.

(5) T – time-bound: sep-hun, ngak-hun cihte huntawh kician sitset in ciangtan na ahihi. Kum 5 sepding, kum 10 sung a ngah zawh ding cihdan hun ki ciangtan nasep ahih ding kisam hi.

Galkap ki-ukna pan democracy ki-ukna ah kikhel buang, ei hong makaih ding ei meetang tawh teelkhuan ngahbuang Zomi te-in bang lawhtak (Zomi national interest) ih neihiam?, Gamvai, minam vai-ah bang lunggulh na hangin democracy deih ngaungau-a, kiteelna ah buaipih keei mawk ihhiam?, cihte kidot kik zeel kulhi. Tua ih lunggulh (end, interest, goal) teng gawmtuah, lomkhat suahin ngah madong hanciam zo den lehang ut huai mahmah hi.

Tu tadih ahih leh Zomi bup lakpan a tawmpen 90% peuhmah in thukim dingin ka up, Zomi te makai Dr Do Suan Mung in 30 March 2016 ni-in a gelh thului ah makai MP te tung-ah Siapa thu vaikhak pawlkhat kong sungkhia kiknuam hi. Kiteelna a ngah Zomi MP te in kum (5) sungin sepkhiat teitei ding thumna in Siapa-in a gelh, Zomi te leh Kawlgam kumpi thak, cih thului sung pan ih theih gige ding thukhat le sepkhiat ding thu (4) te hih thului ah kong suahkik hi.

Theih gige ding: “Federal State cihte pawl pen sep ding thupi mahmah ahih hangin eikia sep theih hi loin gambup tawh kisai dinga, hih anuai a thute ahih leh ei septheih ahih banah e’n i sep keileh mi ten hong sepsak lo ding hi.”

Sepkhiat ding:

• 1. Zomi peuhmah kumpi in official a minam khat a hong ciapteh nading.
• 2. Tedim, Tonzang, Cikha, Khai Kam township teng kigawm in District khat i ngah teitei nang.
• 3. Zogam khuapi khempeuh ah lampi (paved road) hong tun nading leh,
• 4. Mei (electricity) nai 24 i ngah na ding.

A masa in hih lunggulh na teng pen ih ngimna kung (goal, end) ahih lam kong phawksak kik phapha nuamhi. Hih ih lunggulh ngimna pen S-M-A-R-T piciang (criteria, checklist) tawh sitpha kik dihni.

Hih tengpen a kician (specific) sitset ngimna te ahihi. Khiatna dangin laktheih gawpding a hi nemnum khatzong omlo hi. Kician bek thamloh tehtheih, sittheih (measurable) thu-te ahihi.

Bangtawh tehding? Kumpi vai sepna ahih mah bangin official takin kumpi lampan theihsakna (official announcement), tawh ahi zongin, lampi, mei cihte a kipan a vek-in ol takin sittheih vive ahihi. Hih thute pen a kisem khia theilua (achievable), midang tampi in zong a sepsep uh, tu mahmah inzong a gah a ki lolo theilua ngimna te vive ahihi. Census vai themkhat nawngkaina lobuang a vekin 2008 constitution inzong gak peuhmah lohi. Hih tengpen kum tampi sung ih ngakngak, ih kisap luat (relevant) vive teng hi-a anval mehval ding bangin ih nget khong khatzong omlo hi. Mipi te ip sung sawk-a kizo namzong hilo-in palai te hanciamna tawh kumpi vaihawm bekteh kingah theite vive hise hi.

Hih ih ngetna (4) tengpen 2015-2020 kikal sung aiding (time bound) a kingen, 2015-2020 kikal sung thu neithei te kiangah ih thumna hi-in, a hunzong themkhat bek omta hi. 2020 kiteel khitteh huntawh kituak in ih kisap zawkdang le lunggulhthak hong om ding-a tua te ahih leh bel 2020 ah meetang ihpiak palai te vaipuak hong hiding hi. Hih thu (4) tengpen party khatpeuh, mimal khatpeuh tungbek ah vaipuak suat nopman, sitnop, mawhsak nopman hizaw lohi. Zogam sung-ah, a diakdiak in Tedim le Tonzang khuapan kiteel palai te en lehang ZCD, USDP le NLD cih party (3) pan hi-uh-a, tua party (3) pan-a kiteel palai MP tetung-ah thumkikna ahihi.

Federal gam hih nading mapan kawm mahin zong a ki semkhawm thei lua, thuahkhop loh a pelmawh thu-te hong hi zawpsop hi. Zomi bupin makai dingin a teel MP teng le tu lian laitak in Myanmar gambup hong uk party te tawh kizop kithuahna ih etteh a ki ngah pakpak loding hunhoih tu laitak aki ngah hi gige hi. Tu sung lian mahin a tawmpen pen hih thu (4) teng nong phut gawp kei uhleh mailam ah hihdan hunhoih hun manpha (opportunity) ngah ding hamsa zaw semsem tathei dinghi. Na thuneihna uh mipi te lunggulhna te ading hong zatsiam un, ci-in ih ki thum nuam phapha hi.

Tua bektham loh Zomi kipawlna le Zomi makai khempeuh te tung-ah thumnop dangkhat ih neihi. 2017 kum-a kipan tudong in Kalay le Khai Kam khua kikal gamgi vai nawngkaina hong om cipcip hi. Tu mahmah in zong Kaptel khua-a om Lennupa vai nawngkaina hong om leuleu hi. Zogam in ih neih sunsun munhoih le leitang hoihna khua te-ah gamgi vai-in mailam hun-ah kibuai beh mahmah khathei dinghi. Hih vai-te ah thu ngaihsun thei Zomi mipil, makai kipawlna te mahin kisam bangbang tangthu, gamgi lim kician cihte hun lapin kan, geel, kiging-in mipi-te honghilh, thu damin nong makaih kei uhleh mailam ah kisum, kibuai gawp khathei dinghi.

Tuhun company neuno khat na ngawnah zong na ih septeh sepna, thu vaihawmna, geelna khat peuhpeuh-ah ma tut le tutloh tehna in result-based management, key performance index (KPI) cihte kilim zat mahmah tahi. Ma tut le tutloh kiteh tangtang tahi. Bang sawm?, Bangciang ma tun taktak?, Bang hamsatna tuak? Tua hamsatna te om tase mahleh manawt veve theihna ding koicih sawm?, cihbang kigin, ki-etphat den kul tahi. Mipi lunggulh ngimnate tangtun nading, result hoih tam semsem muhkhiat zawh nading inzong mipi lampan hanciam tawpin panpih ni, cih zong ih ki hanthawn nuamhi. ~ Pau Sian Lian