Malaysia gamsung ah naungek kha 3 bek aphapan khat naukem te’n bawlsia leuleu

Malaysia gamsung ah naungek kha 3 bek aphapan khat naukem te’n bawlsia leuleu

Malaysia gamsung ah naupang kha 3 bekbek aphapan khat naukepna “Babysitter” te’n bawlsia hidingin ki ummawh leuleu cih thuthang NST pan kiza hi. Tua naupang pen akhut aban ataklam kilawi ahih manin, zato ah amanlang in kipuaksak cihi.

Hih thupiang pen nungkal Wednesday ni in Perak State sung aom Manjung District sungah thupiang ahihi. Zato akipuakna Seri Manjung Hospital panin thunei te genkhiatna ah naupang ii ataklam akhut pen kilawi in, tuapanin akhut akitan hiding ci uhhi.

Manjung Hospital panin Doctor te’n hoihtak avelcian khitciangin hihpen akibawlsia “Abuse” hiding cih kimukhia ahih manin, tua naukem “Babysitter” nupinu pen kimansakpah hi. Naukem nupinu pen kum 42 aphakhin khat hi a, Seri Iskandar ah ateengkhat kici hi.

Athu akizakbehna ah tua naungek pen anu apa te nasem ahih manin, naukepna “Babysitter Home” ah akikha ahihi. Babysitter te’n tua naungekpen kapkap in, tawptheilo hi ci’n apa kiangah zasak uhhi.

Apa zong lunghimawh in amanlangin Babysitter Home ah delhpah hi. Aphual atun ciangin ata ngek uhpen akhuttaklam aomzia amuh ciangin lamdang samahmah hi.

Naukemnu ii apasal in agenna ah tua naungek pen akhut taklam ki heksakkha hi ci’n genkhia hi.

Tuaciangin apa in amanlang in zato ah puaksak a, Doctor te’n aki bawlsia “Abuse” hiding cih agenkhiat uhciangin Police Report abawlpah uh ahihi.

Naungek ii anu inzong ka tapa akhut taklam avekin abawkgawp kamuh ciangin ka lungtang namahmah hi ci’n genkhia hi. Ka tapa pen hihbangin kamuhpen khasia mahmah ing, ahi zongin tulaitak in Police Investigation akibawlsan laitak ahih manin adang bangmah ka genkhia nuamkei cihi.

More: India ah numeino kum 11 aphapan khat abuanhuan pasal mi 17 kiman

Naungek khat hihbangin abawlsia tepen athuakding thukhun ombangin aki thuakkik sakdingpen ki lunggulhtek hi. Perak Tengah district police chief Superintendent Mohamad Zainal Abdullah in agenna ah Babysitter pen ni 4 sung kikemcip photding a, tuakhit ciangin thusitna kineiding hi ci’n genkhia hi. Sawltak #zomidaily