Makai – Nungzui Revival kisam

Makai – Nungzui Revival kisam

A haupente makaipi a sem pahpah ding hileh Bill Gates in US President kum tampi sem ding hi. A hatpente in makaipi a sem pahpah ding hileh Mike Tyson in US President tawlkhat mah sem ding hi. A pilpente in kumpi a sem ding hileh Socrates, Aristotle cihte in emperor na sem ding uh hi.

Pasian’ zat penpente in makaipi a sem pahpah ding hileh Billy Graham in US President sawtpi sem ding hi. Ahih hang hih a tung a i gente khatbeek in Kumpi leh President na semlo uh hi. Makai nasep pen a haupen, a hatpen, a pilpen, Pasian’ zatpen … cihte’ nasep hilo hi cih ong lak hi.

Tua ahihman in neihman, hatman, theihman leh biakna nasep siksan man peuh a makai mun lading, mikhempeuh in i thu ong mang a, i mai ah kun duamduam ding a i ngaihsut leh psychiatrist va ki-etsak huai kha ding hi.

Tua hi a, Makai sem cih hang neipen lo, hatpen lo, pilpen lo ahihman in a panpih ding ahaute, ahatte, apilte leh mipi mahmah huaikhawm a pankhopna tawh mazang daupai in gualzawhna mual ong suahpih zo bek ding ahi hi. Tuate a huailo, a gawmkhawm lo a a khaattat makai pen makai picing hilo bek thamlo in makai mun lakei leh hoihzaw ding hi. Midang a semthei omding ahihman in munkhak a tut tentan loh ding deihhuai hi. Cing lo, hithei lo napi luai tentan a midang mun a piak noploh uh ciang kikhenna piangsak thei pahpah hi.

Tuabang mah in mipi in zong makai i cihte nakhempeuh ah a kicingpen, a haupen, a hatpen, a pilpen ding bek a ngaihsut loh ding leh tuabangte bek in makai a semthei bek ding a i ngaihsut loh ding kisam hi. Khat pan neipen lopi mah, hatpen lopi mah, pilpen lopi mah a makai panmun leh vai lianpi a pua ahihman in panpih a kisap hun tampi om ding cih theisiam sa a, kisam leh kul bang a panpih ong zot uh leh nungthuap siamna tawh i nungzuih ding kisam hi. ( bangmah genlo pi lah ki-kausiphum theih om samkei naven maw )

Tuni ciangciang Zomite i thanem penpen na makai leh nungzui in kimawhsak zawsang ding omlo a, Kawlte leh Newin’ makaih zia tung pan a i sin, i panmun ciat pan a panlak zia ding i zawhloh man hi mahmah pen ding in ka ngaihsun hi.

Mipi tawh kisai, Nam leh Gam tawh kisai mapanna peuhmah ah angsung leh mimal vai khiam a, khaattat zia i nusiat ding leh khutkuak dim khat kithutuahna peuh mikhempeuh i sak khak nawnloh ding thupi mahmah ding hi.

Ka ommuan a ka ngaihsutsut ciang Zomite kimakaihna leh kinungzuihna ah pian’thakna revival kisam ihi diam… ci’n ka ngaihsun hi. Pau Khat Suan