LZI Kipawlna: 2016 Zomi Nam Ni Thupuak

LZI Kipawlna: 2016 Zomi Nam Ni Thupuak

2016 Zomi Nam Ni Thupuak: February kha 20 ni in Zomi Nam Ni ahi hi. Hih ni thupi ni in, Kawl gam (Myanmar) leh Vai gam (India) sung a kipan, leitung muntuam gamtuam ah a teng, “Zomi” kici tualsuak mite (Ethnic/Indigenous People) in minam kician, minam picing khat a hihna a kikipsak ni, a kiciapteh ni, a kitaangko ni ahi hi.

2016 kum, February kha 20 ni in Zomi Nam Ni ahong piankhiat zawh kum 68 cingta hi. Kumsim February kha 20 atun’ simin, Kawl gam sung hi taleh, India gam sung hi taleh, leitung gam tuamtuam a om Zomi khempeuh in “Zomi” min suangin, minam picing khat hihna tawh Zomi Nam Ni dawnna, muakna leh pahtawina pawite kibawl tawntung hi.

Tu kum inzong, Leitungbup Zomi Innkuan Kipawlna huam sung a om Zomi Innkuan kipawlnate leh Zomi-te khua leh tui kipawlnate (Community Based Organizations) in a munmun ah Zomi Nam Ni dawnna, muakna leh pahtawina pawipite kibawl ding ahih manin Makaipi Pawl (Executive Council) in tha kingah mahmah a, kilungdam mahmah hi.

Kawl gam sung leh India gam sung a kipan, tuipi galkhat a om Zomi khempeuh in cidam lungnuam takin Zomi Nam Ni thupi simin lamsang a, minam khat, si khat, sa khat, sanggam unau laizom khat hihna tawh kipumkhat in, Zomi Nam Ni thuphate a sangkimciat dingin anungta Pasian tung ah thu ka ngen uhhi.

Zomi Nam Ni in ahong piankhiatna in;

· Gam leh leitang anei tualsuak minam tuamtuamte thuneihna (The Rights of Indigenous/Ethnic People) zahtakna, thusimna ahi hi.

· Mipi thuneihna tawh ki-ukna leh mipi deihna zui a kivaipuakna (Democracy) kipsakna ahi hi.

· Tualsuak minamte in a gam a leitang tung ah suakta takin thu khun theihna (Self Determination) a ngahna ahi hi.

Tuaban ah, Zomi Nam Ni hong piankhiatna thu in leitung gambup kipawlna United Nations in a kipsak; “Universal Declaration Human Rights” leh “Declaration on the Rights of Indigenous Peoples” thubulpite tangtung sak hi.

Kawl gam in suahtakna angah ding ciangin Zomi-te in minam picing khat dinmun pan minam tuamtuamte tawh liangko kikim in, mipi deihna zui a ki-ukna leh a kibelpawl (Federal) Gam khat a lamkhawm dingin thukim hi. Tua tawh a kizom, Zomi Nam Ni a piankhiatna thu tawh kituak in, Zomi-te in tualsuak minam kician khat hihna tawh Zogam ah suakta takin thu khun theihna (Self Determination) angah ding ahi hi.

Ahih hangin, tu ni tu hun laitak in, Kawl gam sung a om Zomi-te in Zomi Nam Ni ahong piankhiatna thu tawi kituak minam hamphatna leh thuneihna ngah nailo uhhi. Tua bangmah in, India gam, Manipur gamkee (State) sung a om Zogam tualsuak singtang minam tuamtuamte (Tribal/Indigenous Peoples) in Zomi Nam Ni a hong piankhiatna thu tawh a kituak hamphatna bukimte ngah zo nailo uhhi. Tualsuak minam hihna tawh a neihsa singtang gam sung a hausa thuneihna nangawn a taan dingin Manipur Gamkee Innpi (State Assembly) in 2015 kum in thukhun bawlzo hi.

2016 Zomi Nam Ni hun sung ah Zomi Nam Ni ahong piankhiatna thu bulpite manlang takin ahong tangtun theihna dingin, Kawl gam leh India gam a om Zomi-te a kipan, sim leh mal, tuipi galkaai Zomi khempeuh in kithutuahna leh kipumkhatna lamkik-in, Zomi Nam Ni Maban pankhopna kipatpah ding kisam mahmah hi.

Tua ahih manin, Zomi Nam Ni tawh ahong piangkhia Minam Hamphatna leh Minam Thuneihna Bukim manlang takin akingah zawhna dingin, leitung kiuli a om Zomi khempeuh in 2016 Zomi Nam Ni hun sung ah kithutuak takin anungta Pasian tung ah thu ih ngen hi.

Kawl gam (Myanmar) sung ah, 2015 Gambup Kiteelpi pan mipi deihna takpi tawh a kiteel Gambup Kumpi in Zomi Nam Ni tawh ahong piangkhia Zomi-te hamphatna leh thuneihna bumkimte manlang takin a kipsakna dingun, 2016 Zomi Nam Ni in kithutuak takin ih ngen hi.

India gam sung ah, tualsuak singtang mite in singtang gam sung ah suakta takin thu leh la vaihawm theihna aneih theihna ding, mipi deihna tawh kituak in ki-ukna leh kivaipuakzia a kilam zawhna ding, Zogam sung ah Zomi-te in Zomi Nam Ni tawh ahong piangkhia hamphatna leh thuneihna bukim manlang takin angahna dingin, India Kumpi tung ah ih ngen hi.

Manipur Gamkee Innpi in asuh singtang gam sung a singtang mite thuneihna pen mipi thuneihna zahtak in, mipi deihna bangin manlang takin a piakkikna dingun, 2016 Zomi Nam Ni in ih ngen hi.

Zomi Nam Ni ahong piankhiatna thu bulpite manlang takin tangtung tahen.
Zogam ah Zomi-te in thuneihna bukim manlang takin ngah tahen. Executive Council, Zomi International Communities Organization (February 16, 2016) Tulsa, Oklahoma, USA.