Lungkiat natna koici dalding ~ Sia Francis Kham

Lungkiat natna koici dalding ~ Sia Francis Kham

Leitungah mitampi takte natna tuamtuamte kibawl na dingin Zato hoih tuamtuam agamgam ah ki bawl aa, mitampi takmah inzong damna ngah uhhi. Ahizong in lungkiatna pen Zato pan aki bawl theilo natna khat ahih manin tuni dongin mitampi te in tua a lungkiat alungkham nate uh aveen nading in, amahleh amah ki gui awkna (suicide), Zu dawnna, Zakang tepna, Laithai kapna cih bangdan in lungnopna hong zong uhhi. Ahizong in tuate in lungkiat natna hong damsakzo tuanloh banah neih leh lam hong mangthangsak, apumpi hong siasak leh gamtatsia vive hong tun zawsop hi.

Leitung nuntakna

Na nuntakna khimbang zingin kamsia tuahsia kisakha nahiam? Na deihlohpen thute , na phulkhak noploh thute, gual lelhna leh daupai lohna, dammawhna leh dahna kahna te a lom atang in tuak kha ki sa nahiam?

Nidang in gualzo in nahauh naliat lai napaallai nite in hong mai etnuam a hong liaknuam liang nalawm nagual ten gentheih hamsatna na phul khak teh hongpom hongliah hongdaal nawnlo in, ka nuntakna aw, lam et beizensi ci in na khuisa khazel maw?

Lungkia ken zan khuazing meimai pi in khuaimei kivak kiukiau khat zong mit sak zo tuan lo hi. Na lungkiat masiah nang kuaman hongkhoih theilo dinghi. A tak tak in cileng hih leitung in ei hongbawlsia hi lo zaw in ei te lungsim puak dandan in thu hong khen nahizaw hi.

Leitung ah ii tuah khak , ii phul khak thu te in Sia hoih penpen khat ahhi. Tua in na mai lam kal suan zia ding hong lak ahihi. Na hanciamnate hongbawlsia, hong susia leh hongkhaktan thei nate pen tua na tuak kha thu te in khen sat na maan na ngah theih na ding in lam hong lak dinghi.

Leitung ah mikim tuak khak thu in a nuntak sungun thu haksa pen khat leh guallelhna lianpi khatta phul kha hamtang cih thu ahihi. Tuabang dan na tuak khak ciang in lungkiat ding hilo zaw in thasan ding hi zaw hi.

Tua ahihman in lawm aw, nangna lung a kia ngei hiam? Na lung akiatciang bang hih nahiam? Bang in nang lungkimna hong piazo pen hiam cih dotna khat hong dongh masa nuam ingh. Anuai aa bang in lungkiat natnate pan ki daal theihi.

1. NA NGAIHSUTNA TE KHEEL IN

Na lungkiatna thu kantel masa inla, bangin nang hong lungkiasakhiam cihthu kanmasa in. Na ngaihsut na te khel in. Mihingte lungkiatna pen hihthuteng hang hi thei pha diak hi. Midangte sangh ka tei zawk loh na, pilna leh siamna ka neih loh zawk na, Ka zawn zawk na, mite neu muh leh mite thusim khak aa omlo in misim mawh in nungta cih bang in ei leh ei thanem detnate pan lungkiat natna kingah baih pen hi.

Mitampi takte lungkiat na leh guallelhna thusimin “Nasep sibawl n ate ah se sum sila leh gilpi puah na ding bek in nasem kisakkhakna” ahihi. Tua hihman in tavuan khit na peuh aa, nasep in gual zawh na hong pia ngei lo khantohna ding zong hongkhaktan ahihman in khantoh zah ding ii khan toh loh teh kithanem in ki lungkia theihi.

Mihingte gualzawhna hongpiatheipen thu in ama sep leh bawlna te tung ah lungkimna angah mite ahihi. Gual zawh na pen khat vei vei , sum leh paai tawh ki tehkak thei hi hang, ahizong in gualzawhna taktakpen ii ngim ii tupnate ii ngah na leh ii tunna hi zaw hi.

Gentehna in, Scientist Albert Einstein in asepna tungtawnin sum leh paai bangmah mulawh lo ngahlawh lo himahtaseleh amah pen aguallelpa kici theituanlo hi. Einstein pen ama dinmunpan in asangpenmah natungaa, ama ngaihsutna leh muhsa thute in leitung kilumlet sak zohi. Tua ahihman in ama min pen tu ni dongin mangngei nawnlo hi.Hih bangdan in a gualzawhna pen khentatnamaan aneihhang ahihi.

2. NANG LEH NANG KI MUANG IN

Amah leh amah ki muanna a neimite in anuntakna sung ah thuhaksa khat peuh tuakkha ta leh phullah lo uh hi ci in; German mi tumgingsiam Beethoven in hangtakin genngamhi. Ngimna nei mikhat peuh in ama nuntakna ah haksakna gentheihna tuamtuamte tawh ki pelh theih tuanlo aa, tuakkha veve dinghi. Ngimna lian semsem leh haksana tam semsem hi.

Amah leh amah ki muanna neilo te in haksat na aphul khak uh ciang in pukin a ngimna uh tunglo in nung tolh theihi. Ahizongin amah leh amah ki muanna anei mite in bangbang haksatna tuakkha ta leh lampi tuamtuam zongin a phulkhakzawhna ding hanciam hi.

Pawl khatte leuleu in leitung ii cih pen ei nekkaam dandan hi; peuh ci kha theihi.Tua bangmite pen amah leh amah ki muanna anei mello mite ahihi. Haksatna khat leh guallelh na khat peuh tuakkha leh hanciamna neinawnlo aa, ei nekkaamloh hi peuh ci ziau theihi.

Apicing nuntakna ngahtheihnadingin ei leh muanna kisamhi. Midang te agualzawh mah bangin ei zong agual zo thei pa/nu hing. Hih pen kei zong; sem zo, mapang zo ning ci aa ki muanna hi. Mitampitak alung kiat pahpa na pen amah leh amah ki muanna neu lua, amah leh amah ki neu muh luat khak man ahi hi.

Tua ahih leh ei leh ei ki muanna neihzawhna ding in bang ci sepkul hiam cih leh, Amasa pen in ii lungsim ngaihsutnate khel masak phot ding ki sam hi. Kei amau bang aa pil na siam na nei lah hi lo pha zo kei ning, ban zokei ningh cih lungsim te paaikhia in kei zong amau mah bang in sem zo, bawlzo ning ei ci aa hangsantak in ki pat khiatna hi.

Nis kei zong mibang in gualzawhna angah zo ding pa/nu hing. Kei din munpan asang pen atung zo dingpa hingh. Tua bang ka tun zawhna ding pilna siamna aneipa hing ci in, na lung sim te liansak in na ngim na om mah bang in ha ciamna leh cihtakna nei leh cin nang leh nang ki muanna lungsim te ni khat sangh ni khat ong khang semsem ding hi.

Tua bang in nang leh nang ki muanna lungsim te hong liat semsem ciang nidang in na kihtak thu te pen maingap huai leh sep lah ding thute ahihloh lam muding hi teh. Tua gualzawhna nangahtoh khit teh nang leh nang ki muannate na neih semsem nang han ciam le cin agol zaw, alian zaw gual zawh na ngah ding hi teh. Tua hi leh mipil misiam te mahbang in nang zong milakah vaang nei in, mi thu siim khak in om ding hi teh.

3. TUPNA LEH NGIMNA NEI IN

Hih leitung ah mihing te nuntakna khat veivei ka ngaihsut ciang Maan( glass) sung aa, ki khawi ngasa te dingin nei thei zel ingh. Tua ngasa te tui bual in lengleng ta leh atun ngei na mah atun veve mah bang in mihing te zong a pua lampan enlengh nasep buai in, aman lah buai buai bai tawh akibathangh tua maan sung aa ngasa te mahbang in a tun ngeina mah, a din munngei na mah ah om det pen ngimna neih lo pi a pheng lenlen man ahihi.

A taktak in ci le hang ;leitung nuntakna ii cih pen kaam( Fortune) sin na hi lo hi. Kaamphat leh tua ci ding kaamsiat leh tua ci ding cih bang in kaam tungah ki ngak dinghi lo hi. Nuntakna hong khelsak thu pen kaam hi lo zaw in ei ii hi zaw hi. Tuah phat kaamphat ding pen kei bawlthei hi ci in, muanna nei le cihtakna ka nuntaksung in kei bang suaknuam ka hiam cih khensatna na nei thei dinghi.

Nanuntak sung in bang suaknuam na hiam? cih nang mah man teel thei dinghi teh; midangte hong teel sak theih hi lo hi. Kum 30 ka phak ciang bang dinmun tung ding, kum 40 ah,kum 50 ciang cih bang in kei bang dinmun koi dinmun tung ding cih leh min leh zaa bang ciang nei ding, neih leh laam bang zah ciang nei ding, beh leh phung u leh nau, veeng leh paam ten nang bang hong ci muh le lut na hiam? Nang leh nang maan (mirror) aa ki et bang in ki sit tel in,kei tua ci ding, tua tan tung ding ci in khensatna ki cian khat nei in, sem khia le cin hunsau pi aa ding ngimna leh tupna ki cian nei thei pan dingh hi teh.

Tua na ngimna leh tupna te na lungtang ah pom den, paai den ding hi teh. Thu dang na lunggulhna te sang in lian sak zaw in, tua hi leh na theih tham loh in na gamtatna leh nasepna bawl te in na ngimna hong zuidingaa hongtunpih dinghi.

Hih leitungah kuamah tek paasan sialnek bangin sunkaal zaankal aa, hauh na, nop sakna leh zaa khan na a ngah ki om lo hi.Tua thusimpen akiimapaam aa om ten thei khalo ahihman in eengin laamdawt tawn in hauhsawm aa, khamh theih guihtheih zaa vom za kaang aakipan, na hoihlo tuamtuamte sem in sum ki zonghi. Ahizong in tuate tuitakhan pak bek aa, huihmut bangin tomkha kaalsungbek khom uhhi.Ahihhangin lampimaan tawnin tupna ngimna tawh akalsuaten aphulkhak, anawk khak thuten amaa khosak zaw ahihman in lungkialo in sem teitei aa atupana uh tungvevehi.

Tua ahihman in hunsaupi aa ding na ngimnate na tun zawh nadingin ngim na neu, ngim na bul pi cih bang dan in khen in. Bangbang nasem zongin a sepdan abaih ding leh a ol dingin ama munsantek ah sep ding te abanban in gualh sa in koihinla sem in.Na khantawn aa ding na ngimna bulpipen kumkhat ai cih dan leh khakhat ai sepdingteng cih bang, nipikaal khat ai sep ding teng ;ni khat ai sepdingteng khensuk diu deu in semden le hang damdam in ii ngim ii tupnate ki tung dinghi.

Leitung ii nuntaksung in hong piangtawm thute in ei ngimna hong hong susia zolo ding hi. A hi zong in ngimna lian khat leh ii zuihding lampikhat ii neih ding ki sam hi. Tua lampi in na ngimna, natup na sawmna bang in semin na gamtat nak leh agual zo denpa na hi dinghi.

Leitungah mihing alungkiat det na in ngimna tupna kician neiloh man in haksakna aphulkhak the alungkia ahihzawk lam ki muhi. Tua ahihman in lungkiat natnadaal na hoihpen in ii nuntaksung in ngina lianpi tawh nasep ding leh ngimna maan neih ding kisamhi. Sia Francis Kham

[Sia Francis Kham pen laigelh a uk mahmahkhat ahih mahbang in laibu pawlkhat gelhkhin a, Pasian thugen zong akiva mahmahkhat ahihi. Lai agelh ciangin Pasian thu leh leitung thu kopkhawm in gelhkhawmthei ahih manin, asim nuammahmah bekthamlo a asim khapeuhmah lungsim onglawng mahmah hi. Asawtlo in Siapa laigelhte ZomiDaily pan aban aban in ongki suaksakto dinghi. Zomi Daily]