A gah muhpah loh (Unforeseen Fruit) ~ Tdkhen

A gah muhpah loh (Unforeseen Fruit) ~ Tdkhen

1921 kum lai-in Sweden missionary nupa David Flood leh a zi Svea Flood te Africa gam laizang Belgian Congo gam sungah lungdamna thu hilh dingin a pai uh hi. Belgian Congo pen tu-in Zaire kici ta hi. Scandinavian gam panin zong missionary nupa, a khangno lai tuak khat, Erickson-te nupa tawh a kimu uh hi. A 4 un-ah Pasian’ makaih ding lamen-in a om uh hi. A sepna uh mission mun pan paikhia in, gammial zaw lamah Pasian in hong sam hi, ci-in a ngaihsun uh hi.

N’dolera khua-ah pai uh a, ahi zongin a khua makaipipa in a khua-biak a pasian uh lungkim lo kha ding cih a lau’ manin a khua sungah lut sak lo hi. Tua ciangin nupa nihte in khua panin tai lang ki gamlatna munah giahbuk a sat uh hi. Tua lai panin, bangci lampi tawh lungdamna thu kihilh thei ding hiam, ci-in thu a ngenngen uh hi. Ahi zongin a lampi ding a mu thei kei uh hi.

Khua-mite tawh kimuh theih nading lampi om sun pen pasalno khat, kal khatin nihvei ta, ak leh aktui zuakin a kipai sak zel bek hi. Pi Svea Flood, nupi neu, pi 4 leh letmat 8 bek a pha mission nupi in, “Hih pasalno pen Africa mi i muhtheih a om sun ahihleh, Jesu ka mu sak limlim ding hi” a ci hi. Tua bangin a hanciam’leh a lawhcing takpi hi.

Ahi zongin tua bang hunsung nangawnah a thanop theih nading uh hun om thei lo hi. Khuasikpi-in khat khit khat a na toto uh hi. Hunkhat ciangin a na phadeuh Erickson-te nupa pen a mission munpi lam uh ah a kisuan ta uh hi. David Flood leh a zi Svea Flood bek in N’dolera khua gei-ah a nasep ngei uh a zom uh hi.

A sawt lo-in Svea in nau hong paai-in, gamlakpi-ah nau a nei ding hi ta hi. A nau suah hun a tun ciangin khua-uk pipa in a hehpihna a lat sakna in naudom siam khat a pai sak hi. Ta numei khat hong piangin, a min Aina a phuak hi. Khuasik veipi-in naupaai’ ahih manin a tha bei-in, a nausuah zawh ni 17 na-ah a nau leh a it a lawmpa a sihsan ta hi.

A zi a sih ciangin a pasal David Flood in zong, a lawmnu a phum nading lei to-in, a zi kum 27 bek a pha pan, Svea Flood pen lungsim na takin a kikha khia ta uh hi. Tua ciangin a ta-ngek pomin, lungzuang khua-ngai takin a mission munpi uh a zuan hi. A ta ngekno pen Erickson-te nupa khut-ah ap mai-in, hibangin thu a gen hi. “Sweden-ah ka kilehkik ding hi. Ka zi sih suah-in, ka ta-ngek lah keptheih ngap lo-in, Pasian in ka innkuan hong susia zo ta” a ci hi. Tua thu a gen’khit ciangin Sweden ciah dingin tembaw khawlna mun a zuan hi. Pasian in a mah a sapna thu bek hilo-in, a Pasian nangawn a nungngat san ta hi.

David Flood a paikhiat khit kha 8 ciangin a nau apna-te Erickson-te nupa zong natna khel nono tawh ni tawmno khit ciangin a nupa in a si tuak uh hi. A nau kep uh pen American missionary nupate khut-ah ki-ap-in amau a khoi uh hi. A min zong laih sakin ‘Aggie’ a ci uh hi. Kum 3 a cin ciangin America gamah ciahpih ta uh hi.

Hih numeino pen a innkuan-un it uh a, Africa gamah mission kuanpih kikleh gam mi hihna lamah haksatna tuahpih kha ding cih khalauna nei uh ahih manin, Africa mission ding khawl’lawhin, amau’ gamah, Pawlpi khatah sep ding a sawm zaw ta hi. Tua ahih manin Aggie pen Amrica gam, South Dakota state ah hong khang khia hi.

A hong nungak’ ciangin Minneapolis khuapi-a North Central Bible. College-ah a kah hi. Tua a sangkah sungin tangval Dewey Hurst tawh kithei-in a kiteng pah uh hi. Hun hong pai zelin a Pasian nasepna uh hong lawhcing toto hi. Aggie in tapa khat nei-in, tua khit-ah tanu a nei leuleu hi. Hunkhat ciangin a pasal pen Seattle gam-a Khristian College President hong hi ta hi. Aggie in tua lai mun-a Scandinavian mite’ piankhiatna kan’ nopna a nei hi.

Tua mah bangin nikhat ni-in laito ah Wedish

lai tawh kigelh biakna lam tawh kisai lai khat hong om ngiau hi. Kua’ hong khak hiam cih, ngaihsut theihna zong nei lo-in, zong a sim thei kei lai hi. A laidalte phenin a etleh, thakhatin man (photo) khat mu-in, tua man pen, han a ginalo-a kibawl, a tunga Singlamteh kiphut, tua singlamteh baanah SVEA FLOOD cih kigelh a mu hi. Tua a na muh in kidai’sakin a lungsim a linglawng hi.

Aggie zong a mawtaw ah lutpahin tua lai kigelh a simthei ding College sangsiate khat va zuanin, “Hih in bang thu gen hiam” ci-in donga, amah in zong tua lai kigelh om dan hibangin a hilh hi.

“Sawtpi hikhinin, N’dolera khua-a missionaryte hong pai na thu hi. Mikang naungek hong pianna thute, a ngek lai-a a nu a sih thute, Africa pasalno khat Khris kiangah a paipih thute, mikangte a ciah khit ciangin tua pasalno hong picingin, tua khua-ukpipa’ tungah, tua khua-a sanginn lam ding a ngetna thute ahi hi.

Tua mipa in sangnaupangte Khris kiangah damdamin a tunpihna thu-te ahi hi. Tua sangnaupangte in a nu leh pate uh Khris kiangah zuatpih-in, a khua ukpipa nangawn Khristian a suah sak thute, tu-in a khua-buppi-in Khristian suak hi, cih thute ahi hi. Hihte khempeuh pen David Flood leh a zi Svea-te nupa kipiakna hang ahi hi, cih thute ahi hi” ci-in a sim’sak hi.

Hurst (Aggie’ pasal) te nupa kiten kum 25 a phak kumin a College panin lungdam’pihna letsong kipia a, tua a kipia pen, Sweden gamah hunpi khat sung tawlngak theihna ding ahi hi. Sweden gamah a pai uh ciangin Aggie in a pa taktak hong zongin, a pa David Flood pen puteek na hita a, zi dang nei kikin, ta 4 a nei hi. Ahi zongin a nuntakna pen zu in sia sak khin a, a neihsa sikhang tawh kithuahin a hong gim ngiau ahi hi. Pasian’ tungah lungkim lohna na nei den lai-a, a inn sungah, “Pasian in na khempeuh hong suh sak khin ahih manin kuamah in Pasian’min lawh loh ding” cih thupiak ahi hi.

Aggie leh a sanggam thakte hong kimu uh a, hunkhat sung a holim khit uh ciangin Aggie in a pa a muhnop thu a gen hi. A naute in zong tua thu a zak uh ciangin kisuan’ ngaihsut sim uh a, ahi zongin, “Gim lua lai ven, kimu thei niteh, theihding thu khat bel om hi. Pasian’min ki lo a zak nakleh sin so mahmah hi cih phawk in” ci-in a naute in gen uh hi.

Aggie ahihleh a ngaihsutna a kilamdang sak zo ding a dang om lo hi. A pa’ lupna khansung buahthakpi leh zu gim namsiapi mun-ah a va lut hi. “Pa aw” ci-in sam a, a tanu a hihna thu kithei sak hi. A pa zong hong kihei-in hong kap a, “Ania, mi’ tungah kong piak pen ka tup, ka sawm’ taktak zong hisam lo hi” a ci hi. Ania in a pa kawicip a, “Pa aw, na khial het kei hi” a ci hi. “Pasian in kei hong kem hi” ci-in a dawng hi. A pa in zong a tha hong saanin, a khituite hong kang sak a, “Ka tanu no aw, Pasian in hong mangngilh khin hi. Ama’ hangin hibangin i piang khin hi” ciphet-leh a kihei’ phei ziau hi.

Aggie in zong a pa’ mai nul’sak kawmin, “Pa aw, thu tawmkhat gen’ding hong nei ing. Kong gen ding thu pen thuman ahi hi. Africa gam-a na pai’na uh a mawkna hihetlo ahi maw pa, ka nu zong a mawksih hihet lo a hi. Pasalno khat Topa’ kiangah na paipihpa uh pen, hong picin ciangin, a khuabup-in Jesu Khris kiangah a tunpih hi. Na khaici tuh uh pen hong khang zelin, tu-in Africa mi 600 Pasian’ nasem a om ta hi. Hih pen Pasian’ hong sapna thu na manh-na hang uh ahi hi. Pa aw, Topa Jesu in hongit-in, hong hua ngei lo ahi maw” a ci hi.

A pa zong hong kihei kikin a tanu’ mit hong en-in, hong ki zia-in, hong holim thei ta uh hi. Tua ni annek khit kikhop sung mah-in, kum tampi a nusiat zawh Jesu’ kiangah hong kileh kik ta hi. Hun sawt lo sung a pata-un hun nuam tak hong zang thei uh a, ahi zongin Aggie-te nupa ahihleh America gamah a ciah kik hong hun ta hi. Tua zawh nipi kal tam lo sungin David Flood zong tawntung mun a zuan ta hi.

A pa a sih zawh kum tam lo hunkhat ciangin, Aggie-te nupa in London khuapi-a Pasian thu taangko-na lam khawmpi lian khat, a va siim uh hi. Tua lai-ah Zaire (Belgian Congo) gam mi, member picing 110000 val a nei, National Church makaipa in a gam-a lungdamna thu a kithehthaang dan siam takin a gen hi. Kikhop tuah ciangin Aggie in tua thuhilhpa va zuan a, a nu leh a pa (David Flood leh a zi Svea) te’ tangthu a theih leh a theihloh a va dong ngiau hi.

Amah in zong, “Pi aw, thei peuhmah ing ei, Svea Flood pen keimah Jesu’ kiangah hong paipih nu ahi ve” ci-a French pau tawh a gen’ pen English pau’in kiphen’sak hi. Na pian ma-a na nu leh na pa’ nekding a pia-pa ka hi a, tu-in na nu’ han leh amah phawkdennate pen, ka vek-un thupi ka sak uh leh ka zahtak mahmah uh hilo hiam” a ci hi. Lungdamna khitui luangin kikawi uh a, “Africa-ah hong pai unla, na nu pen ka gam tangthu sung uh ah zong a kilang mahmah ahih manin, na nu’ nasepna gam nong muh dingin a kilawm hi” ci-in a zawn hi.

Tua mah bangin Aggie-te nupa in Africa gam va pai takpi uh hi. N’dolera khua a tun uh ciangin mite in mu nuamin nakpi takin a na dawn uh hi. A nu a sih khit-a, mission mun zuan a, a pa in amah pua dinga a cial’pa nangawn na dam lai-in a kimu thei uh hi.

Lungsim hong khoih pha deuhdeuh om a, tua in a nu’ han-a singlamteh kaang en dinga Pastorpa in a paipih laitak ahi hi. Aggie zong lei-ah khukdin sukin, a nu’ tungah khitui tampi kia-sakin Pasian’ tungah lungdam’ a ko hi. Tua ni a nitak ciangin biakinn-ah Pastorpa in John 12:24 thu simin hanthotna a nei hi.

“Kei’n a mantakpi kong cih inah, taang tangkhat in lei-ah kia a, a sih keileh amah bek a om ding hi. Ahih hangin a sihleh tampi a gah thei ding hi” John 12:24.

“Khitui tawh khai a tuhte in lungdama kikona tawh an la sak ta in. Kap kawmin kuankhia-in a tuh ding khaici a pua mi in lungdam-a kikona tawh buhlomte pua-in inn-ah hong ciah ding hi” Late 126:6. (Khristian tlangau-August 2010. Mizogam Synod panin a kila sawn hi) Agelh: Jim Cymbal/ Tdkhen