Germany gam khuapi khat ah Sente laigelh siam mithang khat inn saap in hong om hi. Zingsang khat upmawh lohpi-in a manhaai khat hong kitam sak kha dihdih hi. Tua leh innnei nupi nu phone call in, avan kisiatsak thu genpah hi.
Innnei nu in, “Phamawh kei. Lung himawh ke’n, aki tua cithei mah hi! Zingciang in athak khat hong puak kik ning,” hong ci hi.
A zingciangin innnei nu zong haai thak khat tawh hong tung takpi-in, innsaap pa kiang ah, tua manhaai kitam pen hong kan leh, ninbung ah apaih khit lam hong gen hi.
Tua leh ninbung sung thakhat in hong en hi. Tua khit ciang hong nunghei kik in,
“Zingciang akipan in, innsaapna ding mundang zong in! Ka inn hong saapsak zo nawnlo ding hi ing,” hong ci geu hi. Tua khit ciangin munphiah khat, ball pen khat leh laidal khat hong la-in, tua aman kitam piahna ninbung hong bung khiagai hi.
Man (glass) teng atuam, adang ninteng atuam ah hong khen in, man kitam omna bag pen ah laigelh in, “ Kidawm un! Man kitam om hi.” ci-in laisuang hi.
Innsaap pa in zong thakhat thu in ahawlkhiat vatpen lamdang sa-in, innnei nu kiangah, “bang thu hang in hidan hivat mawk a? Zanni-a manhaai ka kitap sak hang maw?” ci-in hong dong hi.
Innnei nu in alupei kawm sa-in,
“ Tua manhaai na kitapsak hang hi ei.”
“Ahang in na lungsim sungah midang aom loh hang hi,” ci hi.
Aden a innnei nu in man kitam akhen vai leh, tuna agen kammal te hangin innsap pa zong amah leh amah hong kithei hi.
German nupi nu bangmah in ei zong nisim i hek i tatna ah midangte’ ading i ngaihsun kha hiam?
Ih nisim nuntak khuasakna, i hawh i ciahna, i sep i bawlna leh i vaihawmnate panin i lungsim sungah midang aom kha hiam? Midangte ading i ngaihsut pih kha hiam?
Midangte tuahtheih ding thu leh midangte thuaktheih ding thute i lunggel kha ngei hiam?
Ih liam khak ding i kidop mah bangin midangte liam khak ding i ngaihsut pih kha hiam?
Kisittel ni!
Hong zawn nuam ing!
Dimno’ Pa
May 5, 2017
Comment piaknop aomleh...