Lungkia ken

Lungkia ken

I nuntakna sungah, i nopsak hun sangin,i haksat hun tam zaw a,i lungdam hun sangin,i lungkham hun tam zaw hi.I gualzawh hun sangin,i guallelh hun tam zaw a,i nuam hun sangin,i dah hun tam zaw hi.Hih pen mihing khat in i piankhiat nak leh i tuahkhak thu hi-a,i ut kei zongin,thuak kul-in,a kipelh thei thu hi lo hi. Ahi zongin,hi bang lungkham haksatnate bangzah takin tuak mah ta leh,lungkia het loin,ana thuak kenkan zo teng mah a tawpna-ah lawhcingin,hong gualzo uh hi.

Thuakzawhna hangin,gualzawhna leh matut zawhna ki ngah a,lungkiatna hangin,supna leh guallelhna ki ngah hi.Leitunga mipil,misiam,mihau,miliante leh mi lawhcing i cihte pen olno takin,tuate a ngah uh hi zenzen lo a,haksatna leh lungkhamna tampi kawmkal-ah,lungkia het loin,thuakzawhna tawh a na nungta/kalsuan kenkan te ahi uh hi.

Tuni-in,mite bangin pilna,siamna lah neilo,sum leh paai lah nei loin,na maban ading lungkhamin na om kha hiam? Na mailam kalsuan zia ding leh na mailam nuntak khuasak zia dingte na ngaihsut ciangin, lungkia thanem in na om kha hiam?Tu laitak a,a niam na dinmun tawh na ki-et ciangin,na nuntakna pen lungkham huai-in,lungkiat,thanem huai kha mah ding hi.Ahi zongin,na lungkhamna leh na haksatte sung mah ah,lungkia het loin,thuak kenkan lai leteh,nang adingin gualzawhna nai mahmah ta-a,a sawt loin,na dinmun hong ki lamdangin,nopna zingni hong suak ding hi.

Mual sang dawn panin,a etlawm mahmah zingnisuak masa mu nuamin,mi pawlkhat mual tungah kah dingin hong pai uh a,lampi-ah khuamial ahih manin,mi pawlkhatte tawlnga-in,lum hithiat phot uh a,pawlkhatte ahih leh bangzah takin khuamial in,bang zah takin lampi haksa mah ta leh lungkia lo takin mualtung lam zuanin hong paito veve uh hi.

Zingsang khua hong vakin,zingni hong suah ciangin,lam kaal-ah tawlnga-in, a lum hithiat photte in,a khualzin maban uh hong zomin,mual tungah hong kahto uh a,ahi zongin zan thapai,khuamial lak pi mah-ah haksa pipi-in,lungkia het loin,mual tungah a na kah tote in ahih leh zingnisuak masa nuam takin na mu hithiat khin ta uh hi. Lungkia het loin,thuak kenkan na tawh haksatna tampitak ana kantan mite munsan’na tung in,nopna zingnisuak a muh uh ciangin,thuakzawhna nei loin,lungkia pahpah a,haksatna sungah a na tawlnga mite pen a niamna mun mah ah kipei pei lai uh ahih manin,nopna zingnisuak mu kha lo uh hi.

“Zan hun sung teng,thumna,tauna,buaina,lungkhamna leh haksatna tuamtuamte om kha mah ding a,ahi zongin zan hun sung mah-ah,lungkia loin,thuak kenkan a,a mainawt mite adingin,gualzawhna khua hong vak in,nopna zingni hong suak ding hi.”

David Tuang