Lenlai Tanlai lakhui bawlpa Haupi tawh holimna

Lenlai Tanlai lakhui bawlpa Haupi tawh holimna

ZQ : Nang leh nang nong kigen thei pak phot dia?

HP : Kei pen Haupi ciin hong kisam, ka minpi bel Jerome Dal Hau Kap hi. Ka pianna khua pen Zozaang hi. 1979 kum in suak ingh. Ka pa pen (L) Kiim Khaw Gin hi. Neekgen beh hi ungh. Ka lungdam.

ZQ : Music leh la huang sungah bang hunin lut kipan na hia leh?

HP : Music leh la pen ka neu tunga kipan ka uuk leh nuam ka sak mahmah khat hi. Ka lawmte tawh 2005 kumin Dragon Music Band khat na kipan ungh. Hih band sungah a kihel teng pen a nuaia teng hi.

1. Piang Lian, 2. Kai Kap Pau, 3. Dal Kap Sang, 4. T L Muangpi, 5. Ngawn Khai, 6. Thang Khen Lian Mang leh khangno pawl khat. Khatvei khua ah nasia takin Stage Show bawl ungh. Tua khit ciang Falcon Band tawh kithuah in “Lenlai Taanlai” lakhui pen 2008 kumin bawl ungh.

ZQ : Tua na lakhui uh ken zong na lei kha ingh. Zaaknop sa mahmah ingh. La na phuak ngei hia?

HP : Phuak kawmkawm mah ingh. Tam bel phuak nai keng. Lovesong = 20, Gam itna la = 5, Gospel song = 60, Choir la = 10, Nulehpa ngaihna la = 4, Secular song = 10 cih dan teng hi.

ZQ : Na laphuahte nang sa pah maw?

HP : Kei sak zong om, mi sak zong om, kei theihpihna om lo a hong kisak sim sak zong om. Midangte hong sak sak teng pen a nuaia bang hi.

• 1. Kapno – Nong sang zo diam?
• 2. Nu Toih – No No No
• 3. Zambawi (US) in dawng 4 hong sak sak:
• a. Nung hei ken,
• b. Itna khah khia in,
• c. Suan neelkai,
• d. Na deihna hong hilh in,
• 3. Idol Cinpi – Etlawm Zogam

ZQ : Tua leh tua nong gen tengin nang tungah ngetna omlopi in sa uh cihna maw?

HP : Hong ngen zong om mah uh e. Hong ngen lo zong om. Nget lohpi a hong kisak sim sak ciang ahileh na sa giugiau ingh. Kisimmawhna leh kibawlsiatna in ngaihsun ingh. La phuah pen baih lo hi. Dawng khat bek zong nitampi zan tampi kibuaipih hi.

ZQ : Tua bel hi peuhmah inteh. Ci dihdih leng nang bang Music lam uuk pen?

HP : Rock Music mah nuamsa pen ingh. Dragon Music band ah a lead tum kha zel ingh. Nuamsa ingh.

ZQ : Tulaitak lakhui thak na bawl laitak cih thu na za ingh. A lakhui thulu bang a hia?

HP : Hi mah. 2019 beima teitei in zawh sawm ungh. A lakhui min pen Dikna leh Hoihna hi. Ko nupa leh Znemcing in sak sawm ungh. Hih lakhui thak bawlna ah hong buaipih SK Pianglian leh TL Muangpi tungah ka lungdam mahmah hi. Mipi inzong tha nong piak ding uh lamen ingh.

ZQ : A dang gen nop na nei lai hia?

HP : Nei lai mah ingh. Studio vaiah hong makaih masa leh hong pantah SKPianglian tungah lungdam ingh. Sumlehpaai akipan a hun tampi hong pia in hong buaipih hi. Ama tungah ka lungdam mahmah.

ZQ : Aive, amah zong Bass tum siam a minthang khat hi mete.

HP : Hi mah. India lamah Mizote in limzat peuhmah uh hi. Ei Zomi sungah zong kinaakzat mahmah hi. Topa’n zangh semsem ta hen. Lungdam, Zomi Quavadis