Khango le Media ~ Lian Tuang

Khango le Media ~ Lian Tuang

2009 kum pawlin kum nih sung dektak Tongsan laihawm ah tanupi ka semkha a , tua tungtawnin ka tuakkhak le ka lunggulhnate pawlkhat le ka zakngei ka simngei thu pawlkhat hong gelhkhia ka hi hi. A masa-in Khangno thu i gen ding a, tua khit ciangin Media thu i gen ding hi. Tua zom ah lunggulhna ngaihsutnate i gen ding hi.

Thupatna

A masa-in ZYA kum 10 cin magazine sungah Khangno le Media cih thulu tawh thului khat ka kihelkhak manin ka angtang mahmah hi. Ka lamet hetloh laitak ZYA thuvanpi pa u E Mung in, “Lawm Tuang aw Magazine ading Khangno le Media cih thulu khat hong gelh lecin a ci hi veng” ci-in telephone tawh hong hopih ciangin lamdang sakawm, angtang mahmah le a thulu lian salua ka hih manin kihta mahmah kawmin, “Hong hanciam leng ai ve” ci-in na kisang ung.

Athupi khangno hun

“A picing Gam khangto khat le a kizomsuak lawhcinna a om theih nadingin gamvai thuvaihawmnate ah Khangno a tawmpen 35% kihel loh phamawh hi,” ci-in Khantohna lam thukantel mipilte in mukhia uh hi. Khangnote tha lo tawh picinna lawhcinna bucing kingah zo lo hi, cihna ahi hi.

Media

Media i cih pen a huampi in gen le’ng Nate khat le khat (mi le mi, nate le mi, Pasian le mi, ganhing le mi, …. ) kizopna a piangsak khempeuh Media hi pah hi. Hih lai ah i gennop media in thu kizakna /laihawm / lai nasepna lam a gen nuam ihih manin tua lamte mah genpah ni. Media pen a huampi-in khennihin kigen hi. Mass Media le Individual Media cih ahi hi. Mass Media i cihna sungah TV, FM Radio, laibu bawlna le laihawm tuamtuam cihte ahi hi. Individual leuleu ciangin Facebook, Gmail, Yahoo (social media) ci-in kikhen thei hi. Media pen a thupi mahmah cih ciang bek hi loin a phamawh thu ahi hi. Media thupi sa cih limlim pen leitung tawh liangko kikimna khat hi a ci nuam pah ihi hi.

UNO laipite le ei tualsuak mite tawh a kimemat diak ahi UDRIP (U.N Declaration on the Right of Indigenous People)te sungah Media vai nasia takin a kihel hangin a beisa ciangciang ah Kawlgam mipi in tua thute le media manphatnate kiciamkha mel lo hi. Ahi zongin 2008 thukhunpi Act 354 (d), Act 365te ah media suahtakzia ding le sepzia dingte hong om thei ta hi. Ahi zongin tua thukhunte bangin kikalsuan thei nai lo ciat hi ding hiam Media le mipi kikal, media le thuneite kikal ah kinawtna kikamtamna hong tam mahmah hi.

Tua bang kawmkal sung pan a thu lamdang phialmawk khat ah President U Thein Sein in kum nih cin mipi tung a thugenna ah “A picing gam khangto i suahzawh nadingin Thukhun bawlpawl (hluttaw), thukhenmangte le thuneite (kumpi) cih suangthu thumte in kilekkim takin na a septheih nadingin Media-te in itna deihsakna tawh thuman takin ma hong pan ding uh kisam hi,” ci-in tangko hi. Tua ahih manin media tawh kisai muhna pawlkhat kikum suk dih ni.

Kamsang nam khat

Media nasep pen mipi ading gam le lei adingin kamsang nasep khat mah ahi hi. Pasian kamsangte in maitang khual nei loin kumpite le mipite tungah a kisawl bangbang thu gen tawntung uh hi. Pasian kiang pan a ngah bangbang amau ngaihsutna, amau deihna kihel het loin gen kawikawi uh hi. A om bangin genkik uh hi. Behlap le paih tuam nei lo uh hi. Hih bangin a thuman a citak kamsangte hangin Pasian le mihingte kikal thu hoih hong piang hi.

Ahi zongin ama deihna, ngaihsutna le lunggulhna khat pen Pasian deihna bangin thu a gen thei mite om zel a, tuate pen KAMSANG ZUAU THEITE kici hi. Hih bang kamsang zuautheite hangin Pasian tawh kigamlatna hong kipan a, buaina, kisiatna, manthanna piangsak hi. Tua bangmahin Media nasep zong itna, cihtakna, deihsakna siangtho tawh i sep leh van thupha lei thupha a bawlte ihi a, ngimna khatpeuh tawh deihkaih tuamtuam i neih khak leh mipi adingin kamsang zuautheite mah tawh a kibang ahi hi.

Langnih hiam temta

Media i cih pen langnih hiam temta tawh zong kibang hi. Hih Media pen hiam mahmah ahih manin ahoih lamin i zattheih leh a muibun mahmah Hiam namkhat ahi hi. Adiakin kum zalom 21 sungah media pen manlang semsem le hiam semsem a, gamte kilokin kumpite nangawn kikhelsak ziahziah zo mawk hi.

Cycle chain khau

Media pen ngeina le laite kepna bek hi lo-a, tuate a nungtasak le a khangtosak cycle chain khau tawh kibang hi. Leitung nuntak khuasakziate le eima nisim nuntakzia hong kizomsak hi. Gtn: TV, Video, Magazine le News tuamtuam sung pan midangte nuntak khuasakziate i mu a, tuate tungtawnin ei le ei ki-etkikna, kipuahphatna kibehlapna-in i nei thei hi.

Pilvang ding kisam

Pilna khangto-in Thu kizaknate (Media) manlang mahmah a, tam semsemta ahih manin mipite zong i pilvang mahmah ding kisamkha ding hi. Media khat peuhpeuh-a thusuakte pen Lai Siangtho kammal bangin bullet ding hi zenzen lo hi. Media pana thulengte pen Theih ding ciang bek hi phot a, i lunglut leh ei le ei in kanbeh ding ahi hi.

A tawmpenpenin laigelh pa/nu ahih keileh Laihawm (media) pen kua hiam, muanhuai hiam, muantaak hiam, ama’ lunggulh taktak bang hiam, ama bulphuh taktak bang hiam cih pen a hemlam ciang beekin i tel ding hanciam sawm hamtang leng Media zatkhialhna pan tampi i kikem theikha ding hi. Gentehna-in Myanma Alinn pen kua media hi a, bangci lam thupisak hiam. Tua mah bangin Eleven journal, 7 day, Flower, Democracy, The Voice,…le laihawm tuamtuamte in zong amau’ thupisak le deihna ngimna le bulphuh a tuamtek na nei hamtang kha ding uh hi.

Lung hihmawhhuai thu

Leitung khuahun paizia dungzui-in ei Zomite zong social media ahi, handphone, Email, facebook, …, cihte ahun zui-in i zang thei hi. Hih bangin khuahun zui-in i khantohna pen a lungdamhuai thu ahih hangin a langlam ah a lauhuai thu tampi zong na om zel hi. Kum zalom 21 khit leitung gamte kikhelna a tamzaw pen Facebook, Email (social media)te tawsawnna hang ahi hi, ci-in kiciamteh hi. Mite in Facebook, Email-te pen mipi kimuhna tualpi, gualnop pawlzonna, sumzon pai zonna le khantoh nadingin galhiam hoih mahmahin a zat laitakin ei Zomite in thukhenmang, zum bangin i neikha mawk hi. Khat veivei ciangin zunekna phual bangin i ngaihsunkha hi. Hih thupomziate i khel keileh mailam ah buaizaw kanlai ding hi hang.

Thukhupna

Hih bangin a huamkim thei pen dingin i gen ahi Media pen a thahat mahmah khangthak momnote in langnih hiam namsau bangin zang siam in, Pasian kamsangte bangin thuman citak takin i hanciam kawmin kitheihsiamna lungduainate tawh i gawmkhop theih hun ciangin Zomite mailam ding pen lawphuai-in cidamhuai dinga a bucing khantohnate a mukha ding ihi hi. Lian Tuang Ref: – Dr Siambawi’ presantation, 2008 Thukhunpi