Len Nupa vai muhna ~ Dr. Siambawi

Len Nupa vai muhna ~ Dr. Siambawi

1. Hih vai pen i theihsa mah bang in Tedim township leitang hong ki “sut” sak cih theih nading thu om lo hi. Bang hang hiam cib leh Tulaitak Kawlgam kiukna ah Township administrative area te pen kikhel thei pakpak lo hi.

2. Ahizong in Kumpi thupaizia ah Sungkung Logam (Forestry) vai te ah thukivaihawm ciang in township area kheng in District, State, Region thu tawh pai hi.

Gentehna: 1)Siyin Portected Forest Area pen Tedim township kheng in Falam township sung dong ah huam hi. 2) CF cih pen amun tawh tai 5 kuam sung ah a teng mipi te in a mau lunggulhna tungtawn in siau thei hi.

3) Kawlgammi khat peuhpeuh ii neih Private Company khat in Lokhawh sumbawlna ding in Leitang Acre 5000 ciang na ngawn Kumpi tung pan in ngen thei hi.

3. Community Forest (CF) le Land uses policy tawh kisai ei sung ah thutheihna tampi ikisam lai hi. Mipi a tamzaw ading lunglut huai thu hi khol lo ban ah hih dan vaite ah thukizaksakna “awareness” ki ngah kha lo zong hi.
A lungdam huai ah Foresty lam tawh kisai ei sung pan experience, panmun le theihcianna anei ki om aa amau te kiang pan thumuhna le lamlakna tampi i ngah ding kisam hi.

4. Zomi te neih munmanpha te hoih tak in zuun in i kep ipuah theih nading in i vekpi in vaipuak nei tek ihih man in hih dan vai te ah Election Politic, Party Politics te tawh kisai sak lo in Zogam le Zomi a deihsak tek hihang ci in ihih theih bangbang sumlepai, pilnasiam tawh ikihel tek ding kisam hi.

Hih mun ah mite hong deihgawhna tung ah hehna le thangpaihna tawsawn lungsim tawh kitom in gamtatna zangh leng a sang pen ah a beisa dinmun ciang bek kitung zo ding hi.

“I gam i leitang i itna” bulphuh in i Zumvai, Tualsung vai te ah lungduai tak le tawlnga lo tak in mainawt toto ding kisam hi.
Tua bang hih leh gitlohna kizosak lo in , a pha gamtatna tawh gitlohnate a zo i suak ding hi.

Len nupa bek hi lo in Zogam sung mun thupi mun manpga te thu le la tawh hoihtak kikem zo ding ban ah a mun a mual a om Zomi mipih te ading Sumngahna nam khat (CBT) zong hong hi thei ding hi. Hih dan hong pian nading in nasep ding tampi kisam hi.

Hih thu in Zogam ah ei le ei tha tawh khantohna Zomi te in bang zah ciang kithutuak in nasemkhawm thei uh hiam cih kisittelna Laivuan no khat tawh zong kibang hi.

More: GZA pan Len Nupa Leitang vai Taangkona

5. Kawlgam cih pen Thukhun bangzah ta in a om hang in Law Enforcement athanemna mun hi cih itheih sa tek hi. Thuneihna sangpi anei te, Milian te mai et zo sumbawlte, le sumtha a hat te in “thukhun sung ah bangbang akici zongin” cih tawh pum thuzawh thei uh hi.

Tua ahih man in Thunei khempeuh te tung ah Thunei ahi I Biak Pasian kiang ah i gam i lei hong dam sak nading thu ngetna kisam mahmah hi. Siambawi (Aug 27, 2018)