A theihhuai upna laang (No. 10) ~ Langh Khan Mung
Prosperity gospel leh hauhna (the gospel of wealth) :: Peek 1 upna nei-in tulsawm man ding van leh naa na nget leh piang hiaulo ding hi. Zeisu in nang ading kong deihsak bangin hong piang ding hi cilo-a, na up bangin hong piang ding hi. Morto Cycle upna ka neih leh Motor Cycle ka nei dinga, Motor upna ka neih leh Motor ka nei ding ci cih pen hauhna tawh kizom a thuhilhna uh ahi hi.
Pasian in a um khempeuh ahauh ding hong deihsak hi. Tua ahih manin a um mi khat zawng cih pen Pasian hong deihsakna huam sungah nungtalo cihna hi. Pasian a umte ihih manin hau ding, nopsa ding. Tua hileh Pasian’ minthang pan ding hi ci uh hi.
Hih a tungate pen LSTho a khiatkhialh manin a hilhkhialh uh ahi hi.
Johan Thumna 1:2 Ka lawm it Gaias aw, nang na ci damin na vai khempeuh zong na maa pai ding hi, ci-in ka lamen hi. Kha thu tawh kisai lamsangah zong bangmah lungkhamna om lo ding hi, ci-in ka thei hi.
Hih LSTho mun pen a bulphuh phatdiak uh hi. Johan in Gaias a hopihna, a deihsaknate a pulakna ahi hi. Hih bulphuhin hau-in nopsak ding pen Pasian’hong deihsakna hi cih phawk ding kisam hi. Hinapi-in na san kei-a, na lak kei leh haivai mahmah ding hi ci uh hi. Johan in Gias a deihsakna hi-a, mi khempeuh ading hipah zenzenlo hi.
Johan 10:10 Gutate pen a gu ding, a that ding, le a siasak ding bekin hong pai hi. Kei ka hih leh tuute a nungta maimai bek hi loin nuntakna cingtaak a neih theih nadingun a hong pai ka hi hi.
Hih zong a siiksan munmahmah khat hi. Leitung neih leh lam tawh kizomlo hi. “Nuntakna cingtaak” acih ciangin “nuntak tawntungna” ahk “Pasian’ukna gam sunga nuntakna” aci nuam ahi hi. A hong tung ding nuntakna akawk nuam ahi hi.
Hihte in a thuhilhna khempeuh uhah, Pasian pen thu-um mite deihna, lunggulhnate a tangtunna dinga nasem suaksak hi. LSTho’ hong hilh Pasian pen na khempeuh a piangsak Pasian hi-in, sep ding bangmahdang kullo hi. Na khempeuh tungah thunei Pasian hi. Pasian in khat peuh pen adamsakloh phamaw, a hauhsakloh phamawh hizenzenlo hi. Hong damsak zenzena, hong hauhsak zenzen lehzong i kilawm man hilo hi. Langh Khan Mung
Comment piaknop aomleh...