Leii le Ha zong ki petthei ~ Dong Mung

Leii le Ha zong ki petthei ~ Dong Mung

Tulai ZRA/E, Siamsin, Kim Tuang hiteng thum vai-in Zomi Social Media hong luah mahmah a, a neu a lian, a teek a khang, a pil a hai, a ciim a tei mikim phialin ei gup tek, ei pahtak tek, ei diksak tek, ei muhna tek i gen ngeingai, i ciak ngeingai uh hi. Ei Zolai bek hawmthawh in Kawllai tawh a gelh, a suahkhia zong ki om lai hi.

Hih thupiangte tungtawn in i sin ding thu pawlkhat

1). Kipawlna khat peuhpeuh akipat ciangin amau ii thubul let le thukhun pawlkhat om hi. Tua thubul let le thukhun tawh kituak loin amau a langpangte, amau a gensiate tungah daan piakna, gotna piakna(Action) a lak theih thu ahi hi. Tua action lakna tawh kisai in..First Warning, Second Warning, Last Warning…cih bangin om hi. Tua bangin Warning kipia, kitheisak gige hinapi-in kidawm lo-a, a gamtat teitei leh kipawlna sunga thukhun le thubul let om tawh kizui-in action kila hi, cih i phawk ding ahi hi.

2). Buaina tuamtuam kimemat in thukhenzia le action lakzia kibanglo hi. Innkuan sung buaina tuamtuamte pen khuasung hausa upate tawh kikum in kivaihawm a, kilemna a om zawh mahmah kei leh tungsiah lamah kipai pan hi. Ei innkuan sung buaina pen vengte theih dingin kitangko lualua masa khollo a, a tangko lualua mipa zong innkuan sungah haksatna a piangsak mipa suak zawsop thei hi. Ahi zongin tungsiah kohloh phamawh thupiang om veve hi. Luang le ban paina, khut khialhnate pen hausa upa bek, ei unau pata sung bek tawh lemsak ding hamsa thei ahih manin tungsiah kiko a, tuapan a hoihpen ding a kilekkim pen dingin thu hong kikhensak hi.

I gennop bulpi

Tutung i thuthang mahmah vaipen

1). ZRA-te lampan amau thubul let le thukhun om bangin gamta uh hikha ding ahih manin mawhsak luat theih omlo a, theihsiam ding ahi hi.

2). Siamsinte zong amau thubul let le thukhun om bangin maban a sawnto uh ahih manin va hawmthawh theih hituanlo hi.

3). Kim Tuang adingin zong hamsa mahmah ding hita leh ama thanemna a omleh pilna a sinna hidinga, mipite adingin zong pilna, thutheihna i kibehlapna khat hipah hi.

4). Ei innkuan sung vai pen veng le pamte theih dinga Kawllai, Manglai tawh i gelhsese pen i hailam kilatna khat ahi hi.

5). Ei innkuan sung vai pen veng le pam koin innsungah thuneihna hong neih theih nadingun lampi i honsak zong i thanemna lianpi khat ahi hi.

Tua hi-a, Zomite namdangte tawh liangko kikimin vangliatna i neih theih nadingin Siamsinte tungah kinga a, Zogam bit in namdangte’n hong luahloh nadingin a kembit dingin Zomi galkapte tungah kinga hi.

“Kam sunga om LEI LE HA zong kipet thei,”ci-in pu le pate’n paunak na nei hi. Zomi ading, Zogam ading veina, lainatna, hanciamna a nei unau sanggamte ihih manin kitheihsiamna le kimaisakna tawh kalsuan in,

“Buipi lei kei in zong khuangai,” a cih mah bangin i gamtat kampaunate ah khuangai kawm ni. PUMKHATNA in THAHATNA hi, a cih mah bangin kipumkhat leng i thahat in van nuai khuavel ah gualtung va bang i leng ding hi. Dong Mung