Singapore inndawl 11 pan naungek kum 2 aphapan kia in silo bilbel

Singapore, Sengkang veng aom inndawl 11 pan naungek kum 2 aphapan kia in silo bilbel

Singapore, Sengkang vengsung aom Housing Board Flat innsangdawn dawl 11 na panin naungekno kum 2 aphapan khat kiasuk in silo cih Straits Times pan kiza hi. Zanni Sunday (Nov 25) zingsanglam in thupiang hi a, akiasuk naungekno pen pasalno khat hi in, silo bilbel ahih manin lamdang kisa mahmahliang hi.

Tua naungekno pen kiat tungah alumsa in vengsung aomte’n amuhkhak uhciangin amanlang in angeinai aom Clinic zato khatah paipihpah uhhi. Tua Clinic panin Doctor khatin huhna napiathei hi ci’n Shin Min Daily News te’n genkhia uhhi.

Tua naungek pen amin Ruan cihbektawh ki pulakkhia a, Doctor in agenkhiatna ah khuaphawk in ahi zongin amit aveilam bokgawp in, akhutzong ataklam kitan hi ci’n genkhia hi.

Zato mawtaw Ambulance atun ciangin Paramedics te’n Stretcher tungah akoihding uhciangin tua naungek a ngawng akitanloh nadingin dopmahmah kul hi ci’n genbeh hi.

Tua naungek ii anu in agenkhiatna ah padenpauk “Window” kongkhak pen kikhaklokha ahih manin, atapa pen inntung panin anuai ah akiasukkha hi ci’n genkhia hi. Ahi zongin tuazahval bangmah genbehnuamlo a, amin apuamzong ki pulaknuamlo hi.

Tuahsiatna apianna munlian pen Rivervale Crescent Block 182A inndawn tungpan akiasuk kici a, Police tezong 10am hunpawl in kizasak cihi. Tua naungek pen naupang zato KK Women’s and Children’s Hospital ah kipuaksuak pahhi.

More: Naupang kum 8 khat anu in tawng ahih manin inntungpan tuakin si

Athu akigenna ah tua naungek pen Window gei ah akikoih tutphah Stool tungkhat ah adingto hi a, tuapan in Window akihon ciangin anuai ah akiasuk kici hi. Inndawl 11 panin akiasuk hi a, silo bekthamlo, sibup cihzong omlo in khuaphawksa mahin anuai kiattung panin akimukhia ahihi. Police te’n athu hoihtak kancianding uh cih kiza hi. Naupang, naungek tawh akithuah te’n kidopsiam, kikepsiamding thupi cih hih tuahsiatna in hongphawk phasak hi. Sawltak #zomidaily