A cite tungh tuu ~ Pau Za Mung

A cite tungh tuu ~ Pau Za Mung

A sia zawhna sangin, A pha zawhna in, hawihzaw buang hilo ahi hiam!… Siapipa Pu Pau Za Mung

Thupatna: A cite tung tuu hen

Hihin, Zomite ngeina(culture) khatah, mi nih ki lungkimlo in thu ki nialin ki tawnguh; a tawpna ah ki hehsuah semsem in, aki tot uh hawwmthawhin khatpa in, ahih theih tawpna ahi, a lipkhap huai mahmah khat tawh hamsiat(pulsih, khansih, phaak, lol…etc…etc…)cih tawh a lawmpa a hamsiat leh, a lawmpa in zong, tua kaanaa asiazaw ding a theih tuanloh ciangin, tuabang aa a hamsiatna bang linnliann in ama tung a tunkik na ding a cihna tawh in, “ A CITE TUNGH TUU HEN” cihna tawh dawngkik thei ahih manin, a lung akim mahmah hi.

Lungsim thupi
Mihingte in, ih nuntaakna ah, ih lungsim puakzia mahmahin a thupi belbel ahi hi Lungsim puakzia ahawih leh asia, ci’n namnih in ki khenthei hi. Tuabang namnihte ah, en! ngaihsutin ih neih khakloh man leh aki telpak kei hangin, lungsim hawihin thuhawih thupha, lungsim sia in thuhawihlo, thusia suallo in ahong tun hi. Tuabangaa a hong tunciangin, Pasan siallneek bangaa a tungpah a om zahkhatin, kha khat kha nih, kumkhat kumnih, kum sawmaa ahong tung, khangkhat khangnih atung zong, a omthei leuleu hi.

Hih thuhawih leh thusiate panin a suakta thei leh a suakta zo, a penggzo kuamah aki omkei hi. Thuhawih thupha ahih leh, a kuamahtek ii ih deih ahih zahkhat in, tua tawh ih ki pelhna ding hanciam kullo in ih laak, ih sanziau ding ahi zaw hi. Ahi zongin thusia ahih leh, Pasian upna bek tawh aki nialzo, aki penggzo panbek ding thu ahi hi.

Tuabangaa Pasian upna bek tawh ih nialzawh, ih penggzawhna dingin aki sampi  bel in, kik siikkikna tungtawnaa ki puahphatna ahi hi. Tuabangaa ki siikkik theihna ding a haksatna, ahong dalpi belin, ki phatsakna ahi hi. Tua hilo diam! LST sungah, “ Mikhat  a puukma in ki phasak masa phot hi,” na ci hi.

Zogamaa thuthang
1950- kum beikuan lam huamaa Zogamah thuthangin, Nengg Thawng’ Challenge Shield thumah ahi pen hi. Tualai in, tulai aa bangin, Tonzaang, Thanhlang leh Kanpetlet Townshipte om nailo in, Tedim, Phalaam, Khalkha, Matupi, Mindat leh Paletwah, Township 6- bek a om hi. Hih Challenge Shield in, Zogam sungaa Township khat leh khat ki meltheihna ding, tua tungtawnin ki it ki ngaihna ding, tua tungtawnin, Zogam buppi ki pumkhatna ding tupna leh ngimna a hipi bel hi.

Tua Challenge Shield in, Zogam Inter-Township Challenge Shield aki cih hangin, Paletwa, Matupite aki hel zokei hi. Kalemyo leh Kalewate tawh ki mel theihna(fellowship) ahawih luat manin, Tedim, Phalaam, Khalkha, Mindaat, Kalemyo leh Kalewa Townshipte Football Tournament ki demin, aki thuhuh ahi hi.

Tua baanah, Tedim Township aki cih hangin zong, khuano khuata aa te’n, bang hi cih zong a theikei uhaa, Tedim khuapi sungaa a teeng, Tedim Tualsuak aki cite in, galkap, sangnaupang leh kumpi nasemte tawh ana gawmtuahuh aa bawlung suite ahi uh hi. Hih thute in, ka zaakngeingei thute ka leptuah ahi hi.

Tuabang Tournament ah, point system maw, round system cih zong ka theikei aa, Township khat leh khat nasia takin, hanciamin, bawlung a suihna uh ah, a tawpna ah Tedim leh Phalaam Township nih Final a kahtuak uh hi. Tuate nihin, Phalaam ah final a suihuh leh, aw!!! a tawpna ah Tedimte in Nengg Thawng Challenge Shield ahong ciahpih takpi uh hi.

Keimah teekteek tuak thu

Nitaak khat, kei leh lawmte pawlkhat sang tuakin, Sakollaam lam panin khua sunglam zuanin, ka ciahuh uh hi. Tedim khuasung Nok Ngin Ansai(NAIPI TAU) mai ka tunuh leh, Lawibual lam panin, bang thu ahiam theilo, hong ki awngphei zuahzuah, mipite in ahon ahon in delhin a zuih ngeingai uh, ka galmuh uh hi.

A sauveilo in, tuabangaa a awngte in ko kiang ahong naihtak ciangin, Jeep thum dimteekin, bawllung suiteng leh a makai tengin, aki langhthei thei ding, asang theithei in a dinsa uh tawh hi taleh, a mawtaw tuipuan buukzawl tungah tu in hi taleh, ki paaktak tawhin,“ Kuan zo! kuan zo!, Tedim! Tedim!; Kuan lel,! kuan lel; Sia-laam! Sia-laam! ,” acih lamtak uh ka teltheih lai hi. Tuabang awtna aw in hong khengpah vinghvenghin, Sakollaam lamah a awt uh aki zaphei tuaituai hi.

Tuate in Sakollaam panin hong ki lehkik hiding hiven, a sauveilo in hong khengvat leuleu in, Lawibuallam ah a awngphei vanghvangh leuleu uh hi. Tuabang danin, khua sung citeng zelin a awng kawikawi uh hihtuak hi.

NB:- Hihbang hihna in, tua hunlai aa, Tedimte ii ahi’…na( alungsim puaakzia) teng peuh, a sungtawngaa ki pan a puatham dong) aki pholaak laak ahi gige uh hi. Tua laiin, Leitawhtanh leh Lawibual ki kaal; Mualtuk leh Sakollaam ki kaalah inn ompha nailo in, Taaktaam vive a hilai hi. Sakollaam leh Palik kaat ki kaal  zong, inn a vanghlai mahmah hi.

Tuabang ka tuahkhakin, bang ahiam ka gentheihloh thukhat in, ka lungsim hong lawngin hong phawng ahih manin, ka ngaihsut kawmkawmin, ka omna Bawda ka tung hi. Anhuan kawm, anneek kawm, laisim kawmmahin tua thu mah ka ngaihsun sunaa, ka ihmut nelhkha liang hi. Tuabang kawmkaalah, hihbang thu in, keibek ka ki sak leh….’

A kahpau liang…, Siapipa

A ziingsang ciangin sangkah ding, sanginn ka tunphetin, ziingsang simaa sang tualzaangaa aki bawl tawntung, sangnaupang buppi leh siateng khempeuh in, Morning Assembly ah, Gambup Dialkhai ki paai in, Kawlgam lapi aki sak zawhciangin, Siapipa, Siapi Vul Za Thangin, thu ahong genna ah, a zaanaa khuasungaa thupiang teng ahong genkhit zawhciangin, a thu genteng khempeuh ii laaingeekteng a tom(essence)in, ahong genna ah,“ Kuan zo! kuan zo!, Tedim! Tedim; kuan lel!, kuan lel!, Sialaam! Sialaam! ci sese lawmlawm; asia zawhna sangin apha zawhna in hawihzaw buang hilo ahi hiam……! ci’n, kahpau liangin ahong gen hi.

NB:- Siapipa, Sia Vul Za Thang bel, lungsim hawih lungsimpha nei ahih manin, a mai taii kinkenh in, a aw azol mahmah khat ahi hi. 1958- kumin Tedim tan 10- sangpi ah, Pilna leh Hauhna koi thupi zaw cih Kamtungnun aki tuhna(debate) aki bawl na ah, Dr. R. Vungh Suan in Chief Judge asem hi.

Siavuanpa in opening speech a genna ah, “ University ka kah lai un, Siapipa bel, thudik mahmahin, anunh anem hiithiat, a aw-neem ngii-ngeii, khumin zoldiik deek ahihman in, ko! uu Thangkhuai ci ungh,” aci hi.

Tua tungtaangin, ka ciapteh theih laiah, proposition or opposition maw cih ka telnawnkei hangin, Tg, Kham Suan Pau(Kham Boih-late), Tg. H. Cin Khen Mang (Dr. H. Cin Khen Mang-Tulsa, USA)te zong tua debate aa aki helte pawlah, a haat(active) mahmahte pawl ahih lamtak ka tellai hi.

Tedim! Zomite Khuapi!

Gamkhat leh minam khat ii khuapi in, tuabangte ii thupha namkim( Pilna, siamna, hauhna, letna, hawihn, phatnate aa kipan, ngeina hawih, ngeina phate) aki tuahna leh aki zeekkhiatna mun, All roads lead to Rome, aki cibangte ahi hi. Zomite aa dingin Tedim in zong Rome khuapi bangkeek ana hingei hi.

Taanglai ih pu sawnsawnte hunlai khawngin, Tedim in ana pha mahmahaa, kuamah nuai-siah zawh dingin ana om ngeikei hi. Tuhun lai nangawnaa dingin zong, a luii nailo, aki zanghthei lai, Leitung buppi tanh azil, Kam Hau Upadi na bawlin, tua tawh ana ki ukte ana hiuh hi.

Tedim in, kiam hong ki panta

Ahi zongin, a diakdiakin, Japan galzawh ciangin Tedim khua in siat leh kiatlam a manawh hiai-hiai ta hi. Tuabangaa ahih theihna a hangin, a tungaa bangdante, TEDIM TUALSUAK te ii lungsim hawihlo, lungsim siate hang a hipi bel hidingin ka um hi.

NB:- TEDIM TUALSUAK a kici laibu min ka laak baanah, tua laibu sungaa aki gen, a lungsim puakzia leh a character tengmah bulphuh aa aki genkik ahi hi. Tua lai bu in, ka genngam ngeiloh, lungsim sung zongaa ngaihsut dingaa ki lawm ka sakloh, pawlkhat ahong suahkhia hi. Tuabangte in pawlkhat bek hiaa, a genkhak  loh zong tampi tak a omlai hi.

Hih laibu in, a thupi, a hawih mahmah khatin ka ngaihsun aa, a diakdiakin, tulai khangte aa ding bangin, thunung thuma, thucin thutang kimtakin a omna ahih  zahkhat in, a manpha mahmah khat ahi hi.

Lai-at dan siam mahmah ahih manin, simnop, telnop mahmah hi. Tua baanah, thu iim, phualsel cihbang omlo(frank) mahmah lai hi. Thumasa thulu bang, aki gen thute tawh ki tuaklo, hawwmthawhhuai ka sa hi. A taktakin tua a thu masa aa aki  gente in, thu masa hilo in, Chapter khat tawh thu bulpi( feature) khat bangin ding  lai leh ki tuak ka saliang hi.

Tedim khuaTualsuak aki cite

Tedim Tualsuak ih cihte in, Zomi a kici te ii, a ma-hliang( elite), a thupitna teng khempeuh uh ahi hi. Tuabangaa ahihna dingin, amau uutthu, amau hanciam zawh thu tawhaa ana hite ahi kei uh hi. Apu apate uh khang panin Pasianin, a mipih a sapihte ahi, khuaneu, khuata mite akhual, avaan, ahuai, akeem, acingh, a makaih, lam alak dingaa ana teltuam ngiatte ana hi uh hi.Tua ahih zahkhat in, khuaneu, khuata aate in zong, amau uutzawkaa a teelzawk uh ahi kei uhaa, Pasian laaitanhna mah tawhaa tuabangaa ana hite ana hi uh hi.

Amau nuntak zia ana enteh gige, khuata’ te, itna leh ngaihna takpi tawh, nu lungsim, pa lungsim, uu lungsim, nau lungsimtakpi tawh ana pawlbawl ding, ana sanggam bawl dinguh kimlai, a tungaa Tedim Tualsuakte zia leh dan leh, lungsim puakzia tawh ana hihuh ciangin, lau in kihtaakna in ana nei uh hi. Tuabang dan hihnate in, ahong gawmtuah ahong ki pawlkhat, ahong ki pumkhat sak ding sangsikhin, ahong khenhkhamh zawthamh hi.

NB:- Hih Tedim Tualsuak aki cih ciangin, a vekpi aki cihna hilo, hihpa hih nu hi, aki  tangh cihna hilo, tuabang dan leh zia anei khat leh nih maw, pawlkhatte maw bek  aki cihna ahi hi. Tua hiaa, hih thu tawh kisai in, keimah ahong ki cihna hi, ci aa  aki suangte bek, ahi pahlel uh, ahi ding hi.

Tuun sungkhat panaa piang hi ngeiingeiite

Hunkhat lai pekin, sulsung khat panaa piang ahi ngeiingeiite ahi kimlai, Zomi  hihang, aki ci tawh; Tedim-Chin hihang, aki ci tawh; ko bel Pu Zo’ suan hi ungh aki  tuamcih tawh, khat leh khat ki midang suahin ih om hi.

Tuabek thamloh, minam puanin,, minam dangte neihma in aki neih masak liang hangin, minam puan takpi, a tuunggial, a pheigial, a sukgial, a togial, a sawigial tawh; a tomaa khui, asau aa khui, a bungbu lamaa khui; puanaa asilh, dialaa akhimh lel bek, a ngawngaa a awkhlel bek , a kawwngaa vialaa a baatlel bek tawh a tuamtuamin ki zangh hi.

Hihbang lungsim tawh ih pai laileh, mailamah zong, nam bangzah hong pianglai ding cih, ka genthei nawnkei hi.

NB:- Minam puan takpi, Evan: Sia Langh Do Khup in, GZA khawmpi, Kawlpi ah thu a genna khatah, “ Minam puan hikei, puansilh a lamdang nono ki demna ( Fashion Show) puan hi,” acih in, hi kasa mahmah hi.

Atak takin, tuni aa a tungaa ih hii-na te khempeuh ahong gawmtuah ding, ih khuamuhna ding, ki khuazaakna dingte ahi, ih Rome khuapi’ tate, Tedim Tualsuakte ahi hi.

Thu khuphna

Mihingte in, ih nuntaakna a buppi phialaa ki pia aa ih hanciamna in, khantohna ding a hipi bel hi. Tuhun ciangin tua khantohna in, Zomi aki cihte in ih ngah a omnai  kilkel loh laitakin, hunkhat laiaa Sia-laam ih cihliang, Phalaamte in ahih uh leh, khan tohna a kici peuhmah adeih dinguh a omnawn kei dinguh hi.

Aki genthei pak in, District, Airport, Power Grid line, New Town, Phalaam Water Supply, Var Dam, Phalaam Agricultural Institute (Vocational Trainning-Diploma Course) aa ki panin, Hrihkhuadar-Phalaam Highway aa dingin, 2019-20 fiscal yr in, K  1,890 millions a ngah baanuh ah, a nuntak a khuasak ziate( Social life/ welfare) mah  mah uh zong, kamaa aki genzolo ding zah dongin modernised sak uh hi.  Hunkhat lai aa ih lungsim hawihlo pan ahong suakkhia, pausia, kamsiate guu in  tuni in eimau tung heuh ahong tungkik (A CITE TUNGH TUU) takpi mah ahih lamtak aki telthei hi.

Siapipa in hihbang dan ding thute, hia hunlai peekin mukhol gige ahihna tawhaa, thuaklah mahmahin, kahpau liang hikha ding hi, ka cisim sim hi. (Excerpt from Pau Za Mung’s Memoirs)