Samuel Gen leh Anna te pumkhat suahna

Samuel Gen leh Anna te pumkhat suahna

June, 20 2015 3:00PM Hun in, Berean Baptist Church, Pella, IA USA ah, Gen leh Anna te pumkhat suahna pawi ah, ZCF Marshalltown te ongsam ahih man ‘in, Marshalltown pan ahi thei zahzah in ka vamuak uh hi.

Marshalltown pan in, 1: 40PM pawl in kapai khia uh a, Pella pen 3:00PM in ka tung uh hi. Berean Baptist Church Biak Inn ka lut phei pah uh a, Biak Inn sung ka tun uh ciangin lenglado Tangval te in, Zonecktie awk sitset sa in kong khak pan ong dawn tuah pahlian in, ka tutna ding mun vuah ong puakpah uh hi. Biak Inn sung ah ki talo ahih man’in, kongkhak pualam na ngawnah tutna kigual zih ziah hi.

Mopuan

“Anna”, Numei lam tengin pen mopuan ngeina te mah silh in, Sia Gen leh pasal lam mopa zui teng khempeuh in, zopuan ong silh zihziah uh in, hibang a zopuan mikang te in ongsilh ka muh cingin kilawm lah kilawm kasa peuh mah a, kalungsim zong ongkhoih kha mahmah uh hi.

Ki ciamna

Monu leh Mopa ki ciamna pen, Pastor George Hatfield in ong neisak in, Mopa Gen ki ciamna a man khit teh Anna ong kiciam leuleu hi. Anna ong kiciam ciangin Zokam tawh ong pau in, apasal Gen mai ah a banban in zopau tawh ong kiciam ciangin, Gen kiangah nagen khol lo hi ding hiam mopa a khetui ong kia ka muh uh leh Anna zopau a ong kiciam na kamal te, biakinn sung dim a tu zihziah mipi te in ka zak uh ciangin, mi khenpeuh khitui muallam pilpial kawm le to dak hiehiai kawmsa in, Anna ki ciamna te ka ngai diediam uh hi.

Meel kila

Hunman ciangin min at na ding tengah min ka at khit uh teh, maan kizaih dingin Sia Sangpi in ongsam in Biak Inn sung ka lut kik uh leh, Marshalltown ZCF pan Nu Nuam in Anna zopuandum khat ong pia leuleu in, tua zawh ciangin, New York pan a ongpai David Khai in maan ong ki laakpih ziahziah hi.

Reception

Ni tak 5:00PM ong hi to ta ahih man in, Ann vaak na ding Cordova Park ( lengla dona) mun zuan dingin Biak Inn pan kapai khiat vua leh guah um a, bel a buak bangin ong zu ziahziah in lampi bang kimu zolo phial zah dong dingin, Thupha guahbangin ong zuziahziah hi.
Cordova Park ka tun ciangun guah beisiang leuleu in, nuam tak in lengla ong do zihziah leuleu uh hi. 8:00PM ong cing tota in, ni ongkai pian ta ahih man in, hun nuam sa pipi hocim zong om manlo in ka ki khen ta mai uh hi.

Sia Gen pen Marshalltown ZCF te a dingin, Frist Batist Church Pastor Randy in, kumkhat sung bang a pawlpi motor uh pia ( kawm) ngiatin le sathau man nangawn pia a Pasian na sem dingin ong bat cial saksak khat hi a, Sia gen mahmah in zong banghun banghun cih gen se lo in, a hunhun in Marshalltown ah Kum nih sung phial khasum sang vet lo in, Pasian a it na leh a Zomi pih te ong it man in ong pha zelzel a hihi.

Ko thuh kik zawh loh ding thupha te ih Biak Pasian in amau nupa kikal ahi zongin, atu ata te khang ah a hi zongin ong na thuh sak ta hen. Amen. Thang Cin Khai