Lau Kei In

Lau Kei In

(Be not Coward)
Lau kei in (Be not coward) bang hangin ci sese ihi hiam cihleh, tu hun ciangin Pawlpi sung ahizong, kipawlna sung ahizong, ahi le ahilo pen mipi atam zaw in, gen ngamlo in ki ommawk thei hi. A hihleh ahi bangin apau ngam ding pen kitawm mahmah lai hi. Tua ahihman in, a man (justice/right/truth) thu te genkhia ngam, pulakngam, sihpih ngamding icih nopna ahi hi. Bang hangin Zomi te kipum khat thei lo cih pen theihna pi gen ngamlo, dinpih ngamlo a aom mitampi kiom ahih manin, hangtak in, ahile ahilo laulo takin pulakhiat hun hita hi. I it mahmah lawm, makai, sia te in, ahihlo amanlo thu tawh akal suankhak leh i kuppih genpih ngamding hi.

Zomi te banghang in, ki pumkhat zolo ding ihi hiam? Zomi te minam khat ihihna, Paikhiatna (3:10)10 Hong pai in, nang in Egypt panin ka mi Israel-te na paikhiatpih theihna dingin Faro’ kiangah nang kong sawl ding hi,” na ci hi.

Pasian in ka mi “Israel” te naci tektek hi. Hih mun ah, Israel suan “ZOMI” te cileng kikhial lo kha ding hi.

Zomi te haksatna, lungkham thanemna, lungzuang khuangaihna, kipumkhat lohna tepan hongmakaih ding leh hong gawmtuah ding in, makai te hongpia hi. Makai te cihciang in, ZOMI Innkuan Makai te, Biankna Pawlpi makaite, kipawlna tuamtuam pan makaite aci kahi hi. Tuahileh kua kipawlna makai in, atung a igen, haksatna, lungkham thanemna, lungzuang khuangaihna, ki khenkhap nate pan honghon/honglemtuah pen hiam cih ngaihsuthuai kasa mahmah hi. A ngaihsun khanailo te zong kisittel in, makai te akipuah phatsawm kehzong ei mimal nungzuite kipuahphat in, Zomi sungah Minam khat, Unau khat ihihna te, kilungtuak, kithutuak tak in, leitungbup theihding in, itangko ding hi.

Corin Masa (1:10-12,17)
10Sanggamte aw, note khatlekhat kithutuakin, pawl kikhenna omkha loin, na lungsim, na ngaihsutna uh leh na ngimna uh na kikhatsakna dingun i Topa Jesuh Khrih min tawh ka hong thum hi. 11Bang hang hiam cih leh sanggamte aw, note lakah kitot kiselna a omna thu, Khloe’ innkuanpih mite in kei kiangah hong gen uh hi. 12Tua bang ka cih ciangin note pawlkhat in, “Kei, Paul’ pawl ka hi hi,” cihna ahi a, pawlkhat in, “Kei, Apollos’ pawl ka hi hi,” cihna ahi a, pawlkhat in, “Kei, Peter’ pawl ka hi hi,” cihna ahi a, pawlkhat in, “Kei, Khrih’ pawl ka hi hi,” cihna ahi zongin na kampaunate uh ka cihna ahi hi.

17Khrih in tuiphum nasep a sem dingin kei hong sawllo a, Lungdamna Thu a hilh dingin a hong sawl bek ahi hi. Ka thuhilhna-ah zong thugen siamna leh pilna a nei ka hi kei hi. Tua bang hi kei hen la, pilna leh gensiamna a nei hi leng, Khrih in singlamteh tunga a thuakna thu in vangliatna a neihna hang kisalo khading hi.

(Kofi Annan) Biakna/pawlpi tuamtuam, kampau tuamtuam, ci le sa kibatlohna tuamtuam neikha mah ni, ahih hang in, mihing hihna ah pumkhat/namkhat ihi hi.

“We may have different religions, different languages, different colored skin, but we all belong to one human race.”

(Martin Luther King) bangna ci hiam ci leh, Mihing te in, khat leh khat aki kihtaak man in, kipawl khopthei lo hi. Khat leh khat aki tellohman in, ki lau uh hi. Khat leh khat ki zop/kikupna om loh ahihman in a ki tello uh ahi hi.

“People fail to get along because they fear each other; they fear each other because they don’t know each other; they don’t know each other because they have not communicated with each other.”

(Nelson Mandela, former president of South Africa and Nobel Peace Prize winner) bangna ci hiam, Pilna in leitung kikhel sakna ding in, athahat pen hiam/vanhoih pen ahi hi.

“Education is the most powerful weapon which you can use to change the world.”

(Roma 12:9)
9Na ki-itnate uh lungsim takpi tawh hi sak un la, a siate mudahin a hoihte lenkip un. 10Unau ki-itna lungsim nei un la, khatlekhat kizahtak bawl ding lamsang kidem un.

(Jackie Chan) Ei te in, leitungkhuano khat a teengte hi hanga, innkuan khat ihi hi. Mun tuamtuam pan in ki itna, kilawmtaakna te ineih ding pen ei mawhpuak hi a, khat leh khat lungnoptak in omkhop ding zong imawhpuak mah ahi hi.

“We live now in a global village and we are in one single family. It’s our responsibility to bring friendship and love from all different places around the world and to live together in peace.”

(Abram Lincoln) Demzo ding cih kagen thei lohhang man hing kaci ngam hi. Gualzo ding kacih loh hang, ka neih khuavak tawh nungta cih ka kitel hi. Thuman nei mite lam kapang ding a, thuman mi ahi laisiah ama lam pang dinghing. Thuman mi ahih nawnloh teh amah tawh ki khen inding hing.

“I am not bound to win, but I am bound to be true. I am not bound to succeed, but I am bound to live by the light that I have. I must stand with anybody that stands right, and stand with him while he is right, and part with him when he goes wrong.”

Piancil (12:1-2)
Topa in Abram kiangah, “Na gam, na beh, leh na pa’ inn panin nang kong lah ding gamah pai in. * 2Thupha a ngah dingin minam lian khatin nang hong bawlin, thupha hong pia-in, na min kong liansak ding hi.

(Nelson Mandela, former president of South Africa and Nobel Peace Prize winner) I sep/zawh masiah pen, haksa le kilawm mahmah hi.

“It always seems impossible until it’s done.

Lau Kei IN (Be not coward) thulu pen, Zomi sung a man (justice/right/truth) tawh khangthak te in, alungsim tawng ah nei in, Zomi hong lapsang nading, mimal in thathak la in, kikup khop theih na ding ahi hi. Hangsan in laulo in utbangbang gen ding cihna hi lo hi. Ki galmuh in, gamgii bawl ding hilo in, ahihloh lam ki theisak in, kipawl khawm in nasem khawm ding cih phawksak nopna ahih lam hong theisak ingh, thalak sawm tek ni.

Gregory Lianpu

May 24, 2015 (Sunday) ni a PZCC te tawh hunzatna ah ka thugen