Pawlpi makai te tavuan ~ Rev. Dr. Hau Lian Kham

Pawlpi makai te tavuan ~ Rev. Dr. Hau Lian Kham

Pawlpi makaite tavuan taktak bang teng ahi tam? Bang ci dan lungsim neih ding ahi tam? Tunitak i kikup ding thu pen Pawlpi makaiten bang teng taktak neih kul hiam cihthu hi in, makai khat nahih leh bel thupi simh kha niteh.Adiakdiak in bang ci lungsim nei ding cihthu hong thupi mahmah dinghi. Dingkhia them thumlo in limtak in na ngai leu teh cih hong hanthawn nuam ing. Pawlpi makaite tavuan bang?.. Pawlpi makaite ahizongin,siate ahi zongin bang ci lungsim nei ding?.. cih kikum ni in ah,

A KHATNA -AH:

Hih Pawlpi tavuan ladingin Pasian in hong koih hi,cih pen na telsinsen masak ding kisam hi. Zawhang 1:6 na simpak lehang, Zawhang kici mikhat Pasian in hong sawl hi. Tuiphumpa Zawhang ahi ve. Tua pen Pasian sawl hi a, Mihingte kisawl hilo ahi ve.

Khat veivei Pasian nasemte ki thupi muhlua in vantung mi zah donga,a kicing dingin kingaihsun kha thei hi.Tua bang hilo hi. Pasian nasemte zong mihing mah hi. Eimah bang tektek, zong lungdam thei, heh thei, hatlo thei mai, nailaplo thei,zong khial nemnum thei, kei bang zong khial pahpah thei ka hi ve. Tua hi in mihing mah hi-in kicing hetlo, ahihhang in, Pasian in sawl ahih manin hong kipia khia ahihna thu phawk ding kisam masa pen hi.Tua hi a, nang zong tavuan nei khat na hih leh Siate ahizongin, Upate ahizongin,gina het ta keimah leh Pasian’na sem hih cih na theih ding kisam hi.

Ahizongin kisak theih nading lam hipeuh mahlo hi.Pasian hongsawl, Pasian kiangpan hongpai khia hi a,Pasian mizat himawk ahihteh cihpen na sungtawng dongin na theihding kisam hi.Pawllu in tua pen na thei sinsen hi. 1Cor.1:1 na ah hibang in na ci hi.” Pasian deihna hangin Zeisu Khazih sawltak zaa-ah hong koih kei mah Pawllu” Hilai munah Pasian deihna hangin kei pen Khazih sawltak zaa ah ahihkeileh sila zaa ah hong kikoih hi. Pasian hong koih hi cih kitelcianna nei ngiat hi.

Kei leh kei in sia minthang ulian pianpianteng, aktui,aktak puak dingin Sawltak zaa ah hong koih un ci inah, hong koih sim in cih banga,hopih sim theihte himawklo in,ahihkeileh a zite hopihin a pasal kiangah a na gensawn nadingin va hiausim, ahih keileh letsong puak sim cih bangdante hi zenzenlo in ah, Pasian deihna hangin Zeisu khazih sawltak in hong koih cihpen Pawllu in na tel mahmah hi. Ahih keileh Pawlpi sungah party siizung zii (ပါတီ စည္း ရုး ေရး) sem a,Pasian sehloh Pasian koihlohpi a, nasem nahih khak ding lauhuai hi. Thukhatah Pasian koih ahihleh zong Pasian koih ahihna teltakin theih ding zong kisam leuleu ahi ve.Tua teh Pasian koih, Pasian deihna ahihkeileh zong tanau meltheih vai khawng tawh mideihsakna tawh vaihawm khak ding lauhuai hi. Tua ahihmanin Pasian in hong koih hi, cih kiteltakin i theihding a thupi pen ahihi.

A NIH NA-AH:

Siaten bang theiding hiam cihleh kei pen sila hi ing cih ki theih ding ahihi. Zawhang 13:13-15 hoihtak in na ngai unla,sim dih ni.” Note in keimah Sia leh Topa nong ci uh hi. Tua thu a man hi,nong cih bangin ka hihi.Tua ciangin keimah in note’ Sia leh Topa hinapi in na khe uh kong silsak leh note khatlehkhat na kisilsak ding uhhi.Banghang hiam na cih uh leh keimah in note tunga ka hih bangin note in na hih nadingun,lim konglak hi.” Hih laitak ah Topa Zeisu in a nungzuite kiangah khe a silsakna thu i theihsa ahihi.Den a i gen mah bangin nungzuite i cihpen mi mah hi in amaute zong a lian mah uttuak sam veve uhhi.

Tua kumpi dingmah inah a nute hawng in na huau sim inah,kumpi na hih tak teh ka tapa khat pen natak lamah a tuding, khat pen na veilamah tudingin hong vaihawmsak hamtang dih oh! ci-in va hopih sim thualthual zawzen uhhii. Leitung mit in en ni ci leeng, tua pen a tei sim tham pawlkhat ahi ve! Ih nute bang hi leh bel tate ading hong vai hawmpihzo hong vansak zo ci a, aki lungdam mahmah deep dinghi.A taktak in cileeng ama ngaihsutna ah Zeisu pen leitung kumpi ding himawk ahihtak ciangin, ka tate alian pen hiding, sia hiding, Ulian hiding, mite zahtak khat hiding cih amau deih lam vive hanciam uh a,tua pen Topa Zeisu deihna tawh kituak lo hi.

A dangte zong heh mahmah uh hi. Banghangin heh mawk uh hiam cih leh amaute zong tua munmah uttek uh ahi ve.Mun deih in kituh nuam tek uh ahi ve.Zalian nuam ulian suak nuam tek uh ahi ve.Topa Zeisu in zong khat vei teh lak ngiat inah, na na en phot dih vo leh ci-in a nungzuite khe a banban in silsak ngiatngiat hi. Zudahte ngeina ah khe silsak cihpen silate nasep ahi ve. Tulaitak i siate bangzah in a pawlpi mite khe a silsak nuam tam? Ahih kei leh kei sia khat in ka pawlpi mite khe bangzah ciang ka silsak nuam tam? Lungsim a gen i hi maw. Pawlkhat ten silsak ngam pong mawk mah ven, ahizongin lungsim takpi mah tawh ahi tam.Sila i hih lam thei a,kiniam khiat na takpi tawh sil ding hi a,Tua pen Topa deihna ahihi.

A THUM NA:

Teci hoih hiding.Kha lamah hitaleh leitung lamah hitaleh sumlehpai lam hitaleh innkuan ading hitaleh teci hoih hingiat ding Topan deih hi.1 Cor.11:1 na ah Pawllu in hibangin na ci hi.” Kei in Khazih bang ka gamtat mah bangin note zong kei gamtat bangin na gamta un.”Mi pawl khatten bang ci hiam cih leh kei hih bangin hih kei unla,kei gen bangin na hih un.”cih ahihi.Ahizongin Pawllu in tua bang na ci peuhmahlo hi.Kei hih bang in na hih un ci ngiapngiap hi. Siaten ahizongin,Upate ahizongin, Pasian nasemten ahizongin tua bang i cih ngam ding kisam hi.

Tu hun siate pen den a i gen mah bangin sia ki ut mahmah napin sila kiut hiaulo hi. Gospel pai ciangin zong mite anlim tui lim lamen hipah phot mawk ahi ve.Ak khawng hong kigawh ding lamen hipah phot mawk ahi ve. Tua bang a lamet ding hi peuhmah lo hi,hi vetvetlo hi.Pawllu in kei hih bangin hih un,ci hiau mawk hi.Kei hong etteh un ci hiau mawk ahi ve.Makaiten ih pawlpi mite tungah tua bang icih ngam ding kisam hi.I ci ngam ding hiam?

A LI NA AH: Pawlpi Upate leh Siampite

Pawlpi khat leh khat Doctrine tawn dan ki banglo hi. A kibang kei zongin i theih ding thukhat ah Pawlpi lutang pen Mihingte hilo in,Zeisu Khazih ahihi. Topa Zeisu in “hih suang tungah ka pawlpi ka lam dinghi. Hell khua kongkhak te in tua pawlpi a zo kei ding uhhi” ci hi. (Mate 16:18) Tua ahih manin Pasian nasem Siampite leh Pawlpi Upate kipum khat a,Khazih ading bek mah bul phuh ding ahihi. Kha lamah Siampiten makaih ding uh a, Pawlpi vai tuamtuamte ah Upate tavuan ding ahihi.Pawlpi sungah panmun deihna tawh pawlkaihnate om thei hi. Tua in pawlpi sung buaina piangsak in,pawl kikhen na dong piangsak thei ahihmanin a hunlap a, siansak pahpah ding Upate leh Siampite tavuan ahihi.

A NGA NA AH:

Tuucing i hihlam kithei tawntung ding kisam hi. Zawhang 21:15-17 sung enpak lehang -Tua ahih ciangin an a neek khit uh ciangin Zeisu in,” Zawhang tapa Simon aw,hih mite in kei hong it sangin nangh nong it zaw hiam.”ci-in Simon Peter dong hi.Peter in,” A hihi Topa aw,nang kong it na thei hi, a cih ciangin, ka tuute na vaak in ci -in thu a pia hi.Topa Zeisu in ka Tuute na vaak in ci hi.Tuucing i hih lam kiphawk ciat ni. Rev. Dr. Hau Lian Kham (Late)