Athokik Topa’ ni
Christian ahi Jesu Topa a um, Topa nung azui te in Sunday (Nipini) asiangthosak Pasian Minam thakte ahi uhhi, ci in AD 120 pawl in St. Ignatius of Antioch in nagen hi. Bangci bangin Christian te in Sunday (Nipini) thupisak hiam ihcih ciangin,
(i) Eite honghonpa Jesu, honpa leh gumpa in sihna zo in hongthawhkikni ahihi;
(ii) Athokik Topa in anungzuipi te tungah hongki lah sialsial in Sunday (nipi ni) sialsial in hong kilak hi.
(iii) Christian masa te in tua Sunday ahi Nipini pen “Athokik Topa ni” ci in naciam teh uh a, tua ni in, kikhopna, Topa pahtawina, Topa mintawh biakpiakna te nabawl tawntung uhhi.
(iv) Topa thawhkikni ahi Nipini (Sunday) ni pen Christian masa te in “Athokik Topa’ minam te ni” in naciam teh uhhi.
Laisiangtho Lui honghilhna tawmkha in ensuklai dinghi. Jew minam te adingin Sunday (Nipini) pen, nipikal khat sungah nimasa penpen ni ahihi. Tua nimasa penpen ni ahi Sunday ni (Nipini) in Pasian in “Leitungah khuavak piangta hen” cihni ahihi (Piancil 1: 3). Sunday in nipikal sungah nimasa penpen ni ahih mahbangin, Pasian in van le lei nakhempeuh apiansak masak penpen ni zong ahihi. Topa Jesu hongthawhkik ni in, nakhempeuh te kikhel in, aluina te kikhel in, athak apianthak ni ahihi. Mawhna hangin asi, mawhna hangin hoihna leh etlawmna khatzong anei nawnlo, sihna khuamial sungah a om, akipiangsak sa leitung vantung nakhempeuh te in Topa thawhkik ni in, Khuavak mukik in, athak in kipiangsakkik ni ahihi. Topa thawhkik ni in, nakhempeuh te kipianthaksak kikni ahihi. Hih thu hangin, Jesu Topa sungah nuntakna thak angah mite, mawhna ii gu ahi sihna pan nuntakna thak khuavak sung alut mite adingin Nipini (Sunday) ni in niman pha penpen ni ahihi.
Hih thuhangin, Jesu Topa pen honpa gumpa leh athokik Topa taktak a asangte ading Nipini (Sunday) in;
(a) Athokik Topa’ ni hi in, athokik Topa’ ni siangthosak ding ahihi.
(b) Athokik Topa’ ni (the Day of the Lord) ci in, Nungzuipi te hunpek pan in naciamteh hi.
(c) Nungzuipi te leh Christian masa te in athokik Topa ni in, athokik Topa phat in, bia in apahtawi mahbang un, ei Christian te in zong athokik Topa’ ni in, tuabangmah in ih hihding ahihi.
(d) Mawhna hongpiak sihna nuntakna pan in, Jesu Topa hongpiak mawhmaisak na hangtawh nuntakna thak angah teni ahihi.
(e) Jesu Topa in “Keimah in Leitung khuavak ka hihi”(Jn 8: 12) ci hi. Sunday ni ahi, nimasa pen ni in, Pa Pasian in “Khuavak omta hen” (Piancil 1: 3) leitungah nuntakna apia khuavak apian sakni zong ahih mahbangin, Jesu Topa sungah nuntakna khuavak tate asuakkhempeuh te ii, i nimasa pen ni ahihi.
(v) Sunday ni in, Nungzuipi te leh athokik Topa kimuh ni ahihi. Hihthu hangin, Sunday ni in, eite laizanga om Topa ihmuhtheih nading in, kikhawm in, eite laizanga om athokik Topa tawh akimu den te ahi Christian te ii Topa tawh kimuh ni zong ahihi.
Hihthu te hangin Sunday ni (Nipini) Topa tawh kimuh ding, Topa biading, Topa phatding, Topa min pahtawi ding in, athu pi penpen nasep leh nuntakzia te ahihi.
Rev Fr Damian Dal
Belgium
Comment piaknop aomleh...