Laisimna i manphatna ~ Peter Suante

Laisimna i manphatna ~ Peter Suante

Thupatna – Laisimna i manphatna thu at ding ci-in ka lungngaih ciangin haksa ka sak penin, “Hih ka lai-at zong laisim lote in hong simsaklo​​ ding hi mawk a” cih thu a hihi. Khat lamah, “Hih ka lai-at a simte pen a tawmpen kei bang ciangin laisim mite hi mawk ding a” cih thu a hihi. Tua hi-in, hih thului sungah laisimlo te laisim un cih lam hilo zaw in, laisimmi i suahna hangin i hamphat lawh ding thuteng hong kikup pih ding hi ing. Thului sungah: laisimmi a nam tuamtuam i omna thu tawh panin, laisimna (lai sungpan) in ngah ding hamphatna thukhat kong kikhuppih zawh ciangin, laisungpan a hih mel kei hangin laisimna hangin i ngah ding hamphatna thu tawm hong at ding hi ing. Tua banah laisimmi i tawm mahmah manin i mipihte laisimmi hongsuah na ding ka muhna tawm kong at dinga, laisimna le lai-at in kop theih ding a hoihna thu zong kong kikuppih ding hi.​​

Laisimmi nam tuamtuam

Laisimmi nam tuamtuam i​​ om ding hi. Tua teng lak ah: laisim ding kisam a hih manin lai asim mi (e.g. Siamsin sangnaupang te); hun ngah kawm le sep ding neih/theih melloh hangin laibu (tangthu) peuh cimphawng ci-in a sim mite; thuthak theihnop na hangin laihawm (news) te a sim mite; ki zaliatsak (ki phatsaknop) manin laisim kineihte; le theihnopna, telnopna le khantel nopna lungsim hangin laisimte cih danin a tuamtuam i om ding hi. Mikhat in hih teng a vek in neithei a, khat le nih bek zong nei thei hi. Bangbang hangin lai i simta​​ zongin Zomite sungah laisimmi i tawm mahmah lai ding hi.

Zopau, Zolai tawh laisim ding le mikim (Laisimmi nam tuamtuamte) i sim ding lai i neih nailoh hang zong hikha mah ding hi. Gtn. Zolai tawh tangthu laibu (fiction) pen khutme phazat sang a tamzaw deuh ciang i neihpan leh hi ding a, mikim i khuh sungah a tunna ding zongin i vaihawmzo nai kei hi. Hi mahta le, laisim nuam mi khat in laisim ding omlo cih omsamlo ding hi. Mikang te in, “If there is a will, there is a way,” naci uh hi. Sepnopna lungsim, hihnopna lungsim, sinnopna lungsim, le simnopna lungsim i neih ding thupi masa pen hi. Tua lungsim te i neih nak le a tangtang om lel ding hi. ​​

Laisimna sungpan ngah ding hamphatna

Laisimna sungpan i ngah ding hamphatna cih pen bang laite bang danin sim i hiam cih tawh ki kawizawt mahmah ding hi. Sangkah te in sanglaite a theihna dingun a sim uhleh a thei dinguh a, laihuanna pan onna ding ciangin a simuh le zong, tuamciang ngah ding uh hi. Mi lak ah ki picin sak na ding ciangin lai kisimsak mi-in, tua ciang hong suak ding a, hun beisak na ciangin a simte zongin hun beisak na ding ciang hamphatna ngah ding hi. Tua mah bangin cidamna ding thu a simmi in cidamna thu thei ding a, gam ki-uk zia (politics) thu a simmi in tua thu thei ding hi. Cihnopna in i laisimdan​​ dungzui in i theihna (Knowledge) hong khang le hong ki lam dang ding hi.

Theihna in banglai pen bangdan in sim i hiam cih tungah a kingak banah, tua theihna tung tawn in thuneihna (Power) om hi. A thuthuk le a nasiazaw (deep and wide) theihna a neite in​​ a mauzah in theihna a neilo te tungah thuneihna (Power) hong nei toto hi. Kawlte’n a paunak uh ah, “i neihloh (material possession) sangin i theihloh (no knowledge) nazaw hi” na ci uh hi. Cihnopna ah neihsa lamsa te sangin theihna(Pilna) thupi zaw a, tua in thuneihna (power) nei zaw hi cih lahna a hihi. Tunai ngaihsuthat mipil Michel Foucault in, “Knowledge and Power employ each other,” na ci hi.

A khiatna in, “Thutheihna (knowledge) and thuneihna (power) pen ki kopkhawm hi,” cihna a hihi. Leitung le i kim​​ i pam enlehang bangbang nasepna ah thuneihna (power) a neite pen thutheihna (knowledge) a neite hi diak hi. A diakdiak in tunai (21st​​ century or neoliberalism era) ah mihing khat in bangtan thuneihna neihiam cihpen tua mipa in bangtan thutheihna neihiam cih tung kinga mahmah hi. Gam khat in bangtan thuneihna nei hiam cih zong tua gammi te ii thutheihna tungah nasiatak in kinga mahmah hi. Tua hi-in, Zomi le Zogam in bangtan thuneihna nei ding i hiam cihpen Zomite in bangtan thuthei i hiam cih hong hi ding hi.

Tua hi-in, laisimna sung panin i laisimdan tung kinga in, i theihna hong khang dinga, i theihna tung kinga in i thuneihna hong khang ding hi. Leitung le mihing te a uk pen theihna (Epistemology/knowledge) a hihi. Theihna cih pen khuak thanemna (mental retardation) a nei mite cihloh buang in hanciamna, kinna le veina tawh a ki ngahthei vanmanpha a hihi. Mikim phial i ngahtheih vanmanpha a hihi.

Laisimna hangin ngah ding hamphatna

Laisimna hangin ngah ding hamphatna ka cih ciangin laisimsim mi khat in a laisim dungzui in theihna (knowledge) bek hilo in a dang hamphatna (indirect benefit) om hi. 2016 kum in, thukhantel te (researchers) in laisim hunzat gamtat (reading habits) a nei mi 3635 te Kum 12 sung a ettelna sungah kalkhat (nipi khat) sungin a tawmpen​​ nai thum le alang (3.5 hours) bang laisim kinken mite pen tuazah a laisimlo mite sangin 23% a khansau (sawt nungta zaw) uh a, laisim vetlo te sangin kalkhat nai thum le alang (3.5 hours) ciangbang laisimmi te 17% bang a khan sauzaw uh hi cih thu na mukhia​​ uh hi (https://fictionophile.com).​​

Laisimna le khansauna bangci in kizom (relate) peuhmah hiam cih thudotna dawngkikna ah: laisimmi te pen lungkia (lungkiat natna/loneliness or depression) ngei mello in, laisimlo te sangin lungnopna le lungduaina neithei zaw uh hi. A langkhat ah lungkiatna (loneliness or depression) te pen laisimna in hong​​ toihdam sak thei hi. Tunai ciangin social media te (Facebook, Viber, Youtude, Twitter, etc.) ah lungnopna ki zongin ki gualnuam mahmah ta le, tua social media te hangin lungkia le singim in amau le amau a kithat zong tampi om hi.

A hih hangin laisimna hangtawh a mah le amah ki that, lungkhia cih pen omlo cih ding hiphel hi (I ngaih mahmahte i hong nialna lai cihloh buang). Laisimna in lungkiatna le singimna te veimang sak thei banah, lamet beite nagawn lametna hong guan thei hi. Tua hi-in laisimmi te lungsim cidamzaw in a khan uh sau tuam hi.

Cidamna lakah lungsim cidam ding thupi pen hi. Leitung ah Helen Keller (Lai-at siam), Stephen Hawking (Scientist), Franklin Roosevelt (U.S. te’n Kumpi lui), Sia Tawngno (ei sungah) cihte pan kipan mipil mi minthang tampite pen a pumpi (Physical) uh a thanem hangun lungsim cidamna tawh khuasuak mite a hi uh hi. Lungsim cidamna pen laisimmi te i a ngahtheih hamphatna lianpi khat a hihi.

Laisimmi suah na ding bang cih ding

Laisimna in hong piaktheih thuneihna (Power) le khansau lungnopna (happiness lifelong living) te i ngahna dingin laisimmi i suah hong kul ding hi. Zomite sungah haksatna a tuamtuam (manlah, laisim ding laibu kicing omlo) banah laisim cih limlim pen hunzat (habit) khat in a nei i tawm mahmah lai hi. “Laisim un” ci a sawlsawl bek tawh lah a piangthei ding nam hilo hi. Banghang hiam cih le eimau (hih laisimte a kua maciat) mahmah zongin i neupek panin hong ki thuhilh te tampi lakah tu dongciang i zuih valval thuhilhna pen tawm mahmah ding hi. Tua hi-in mi dangte thu hilhnuam i hih le ei le ei ki etkak kik in, koici bang thuhilh gamtatna te sannop hiam cih lungngaih phat mahmah ding kisam hi.​​

A diakdiak in kei (hih lai-at pa) bangin, “Semin, hihin, hihkei in,” cih danin hong ki thuhilhna te sangin mi-i gamtat le luhekzia te en in kasin le kazuih gamtatna te tamzaw dingin ka ki ummawh hi. Laibusim (sanglai hilo) bangpen ka lawmte i gamtatzia en in ka zuih hipian zaw hi. Banghang hiam cih le kanu le kapa pen laisim valval nam a hihloh ban uh ah, sanglai hilo lai dang sim ding khawngzo hong thapia mello uh hi. Ka lawmte laibu sai pai in laibu kawm uh leh ken zong zuipong le kawmpong, ka lawmte in laibu simin thu a gen uh ciangin ken zaknop sa in tua tengtawh laisim kipan cih dan hi pianzaw hi.

Ciapteh huai deuh khat ah bel, mibanglo (mi ginalo) ka suaknuam hetkei hi. Hanciamnopna lungsim ka nei hi. Cihnopna ah i sanggam, i tanau, a kuakua te laisimun cihzeu kammal bek tawh laisimmi i suahsak ding haksa pian ding hi. Pattahna, ei mau mahmah in makaih limlahna le zolsiamna te kisam ding hi. Laisim un cih a sawlsawl pongin ei mau mahmah in simlo (makai limlahna omlo) cih dan tawh i mipihte laisimmi suahpih zolo ding hi hang. Ka cihnopna ah sepkhiatna tawh limlah, pattah, le makaih ding tampi kisam hi.

Laisimna le​​ lai-at khopkhawm thei leng

Laisimmi a kua maciat in i theihciat thu khat ah i laisimsa te hun tawmvei sungin i malhilh lel hi. Tangthu (fiction) mawkmawk te ciangah poi sam nailo hi. A hih hangin academic laite le khantohna lam thupicing te i sim ciangin Notebooks (e.g. google docs, sheet) dan khat ah i laisim peuhpeuh: (1) lai-at pa/nu min; (2) laibu/ thulu; (3) bangkum a tuam laibu kithoh cihte le, (4) hoih i sak (hoihlo i sak) thute a laimai (page number) tawh ciamteh thei leng hoih kasa mahmah hi. Kei bangin google sheet tawh tuadan in notes ka zang hi.​​

Tua notes te tawh a lemkei le zong “Blog or page”cihdan social media te ahizongin, “Wordpress, Blogger” cihte ah a hizong in laibu khat i simzawh simin tua laibu/ journal/ thului ii: (1) a thu tom-kim-cing​​ (summary); (2) hoih nasak thu (good things from the book/ journal/ article); le (3) hoihlo na sak na akl. tuaci zaw deuh le cih na ngaihsutna (critique or recommendation) cih namthum (3) te at khia den leng hoih hi. A diakdiak in laibu khat i sim zawh ciangin i lungsim hong su valval thu pawl khat omthei hi. Tua te mun khat ah (a ki kemcing theina munah) at giatgiat ding thupi mahmah hi.​​

Bangbang lai (laibu/ journal/ magazine/ thului/ thuthang/ laihawm) i sim zongin hih danin i ciapteh ding le tua lai tungah i​​ muhna i attuah ding thupi mahmah hi. Tua dan pen doctor buaih la ding te a hi zongin a thupi mahmah hunzat gamtatna (habit) khat a hihi. Leitung ah journal (academic journals) minthang tuamtuam te le pilna thukisialna (academic discourses) tuamtuam te ah tua dan in laibu/lai review (summary, good things, and things to improve or your recommendation) cihte pen gamtathoih (good practice) khat a hihi.

Tua hi-in, sangkahlai mi i hi zongin, sangman kin (khawllai) mi i hi zongin laisim le lai-at (a tawmpen note bawl) i kop ding thupi mahmah hi. Tua dan hunzat gamtat (habit) in zong i lai simsa te i manghilh pahloh na dingin hong huh mahmah hi.​​

Thukhupna

A phatna pan a tom in genkik leng: laisimmi nam tuamtuam i om a; i laisimna dungzui le thu i kantel zawh dungzui in i theihna (knowledge) hong khang ding a; i theihna dungzui in i thuneihna (Power) hong lian semsem ding hi. Laisimna in lungnopna le lametna hong puak a, tua in cidamna le khansauna hong pia hi. Tua te i ngahkim na dingin laisimmi i suah ding thupi mahmah hi. Kampau bektawh sawlna hilo in sepna tawh i mipi te i limlah makaih ding kisam hi.

A tawpna ah laisim ci-in sim mawkmawk ciang hilo in thu le la khat tungah hoih i sakna le hici zaw deuh le cih ngaihsutna (ahoihloh na bek genlo in a hoihna zong gen ding kisam) i neih den ding zong thupi hi. Laisimna hangin lungnop cidamna le thuneihna (power) ngahzo ding ci leng tua sangin a manpha zaw hamphatna tam mello dinghi. Lungdam!​​ Peter Suante