Lai tawh Zomi te’ kongpi honna ~ Rev. Thang Van Lian

Lai tawh Zomi te’ kongpi honna ~ Rev. Thang Van Lian

1965 kum September 8 ni-in Iran gam Teheran khuapi ah World Literature Congress Khawmpi kibawl a, tua pan kipan September 8 ni pen “International Literacy Day” ci-in UNESCO in kipsak suak hi. Tua kim pawl mahin Kawlgam sungah “Ah – Tung – Lung” kici “3Rs” khanglam laisinna kihanciam mahmah a, tua hun a kihel khangham tampite in lai siam bek thamlo sing kibi tuat dan khawng zong nak siam mahmah uh hi. Lai pen gam leh minam khantohna kongpi khat hi, Zomite in zong lai tawh khuamuhna leh khantohna kongpi a hong ihi hi.

Leitung tangthu ah Gutenbeng in lai khetna setpi abawl theih hun A.D 1455 masiah khantohna zekai mahmah a, Biakna lam panin zong lai theih ma hun sung pen “Khuamial Hun” kici hi. Tangpi tangtate in laisim lo uh ahih manin khangto lo, Pasian’ thu ah zong mittaw ahi hi.

Set tha tawh lai khenin tangpi tangtate in lai a sim uh ciangin Khristian biakna tangthu ah ‘Khuavak hun” hong kipan a, Pawlpi puahphatna tawh hong kizom to hi. T ua tawh kizui-in gam leh minamte’ khanlawhna leh khantohna hong manlang mahmah ta hi. Tua pen “Laitui tawh van kongpi honna,” kici hi.

Kum 2013 ciangin Zomite lai tawh i nuntak kum 100 a cing ding hi ta hi. Minamdang te tawh tehna-in sawt nai hetlo hi mah ta leh tua kum za sung in khanlawhna leh khantohna tampi piang hi. Lai tawh Zomi ta ding kongpi kihong zo a, biakna lam, kumpi nasepna sum zon pai zonnate ah gamgi ciangtan lo kongpi tampi tak kihong zo hi. Suanglaikung zatna panin Computer/ Internet ah leitungbup khantohna hualpi sung hong lutpih hi. Kum zalom 21-na sungah zong Zomite bit nading leh khantoh nadingin Zolai mah tawh Zomite kongpi hong to to lai ni.

A hun zui-in Kawllai, Manglai leh namdangte’ lai zong siam ding thupi mah hi. Ahi zongin Zolai siam lo in Zomite’ kongpi kihong thei lo ding hi. Zolai tawh akigelh news/ Journal/ Laibu tam nai hetlo ahih manin lei ding thasial kei ni. Zolai tawh a kigelh news leh laibu i lei zahzah Zomite’ bit nading leh khantoh nading kongpi a hong ihi hi.

Zolai tawh Zomite’ kongpi hongin Kawllai, Manglai leh namdangte’ pau siamna tawh leitungbup khantohna hualpi sungah a lawhcing minamte hi dingin hanciam ni, ci-in International Literacy Day kiton in i kihanthawn hi. Rev. Thang Van Lian (Source: Zomi Times – Welcome International Literacy Day)