Laaitui leh Khuangleeng Kilemna tungtaang

Laaitui leh Khuangleeng Kilemna tungtaang

Laisim khempeuh,
Laaitui leh Khuangleeng Kilemna tungtaang akicianlo thuthang leh akhial thuthang kikhah ngeingai-a, kilawm salo leh amaan thu akitheihding deihna-tawh kahong sungkhia-hi.

“Laaitui leh Khuangleeng Kilemna” ci-a minpuak sak-pen thuhoih ahihi. Ahizong-in ataktak-in tualgaal hunlaai-a Laaitui Hausapite-in Khuangleengte athah tamlua-a, khangthakte-in mulkimhuai kisa lawmlawm ahihman-in “Khutkhialh Luutna” (Luut: zubeel tung-in maaisakna ngen) akibawl ahihi.

Khuangleeng-tawh akido om kawmkawm-a, Sukte hitaleh Kaapteel hitaleh ana-kido zeuhzeuh ahihi. Ahizong-in tutung-a Laaitui tate-in Khutkhialh Luutna abawl-uhpen Sukte-a kipan khuadang min-tawh akiluut hilo-in, Pu Pau Suang-in athahlup Khuangleeng khuamite’ sisan tung-ah mawhmaaina akibawl ahihlam mikim-in hong theihpih tahen.

Athu-ah, 1870s -in Pum Lawng Lamka-ah Khuangleeng gaalbengte leh Laaitui gaalbengte kituah-in kikaap uh-a, Laaituite 7 bek hi-in Khuangleengte 40 vaal uh-a, atawpna-ah Laaituite khat gelsim vingveng-in khua-ah sihtaai-hi. 5 si khin uh-a, khatpa thalsing phung-ah aphei te-nih thau-in kaapliam ahihman-in sihding ngaak-in tu-a, athau thunthun-hi. Khuangleeng gaalbeng makaaipa athagol mahmah, agamh mahmahpa nuui liahliah kawm-in miliampa’ kiang zuan-hi. Nitui Ai nei akisa-mahmah ahihman-in thau-in akha theilo ahihi. Laaitui ngalliam-in athau puansia ding-in azii’ niindap zangh-a thau-thun aman ciang-in ngiim-hi. Khuangleeng gaalmaangpa-in laulo-lua ahihman-in a-awmpi dawh-in, “hong kaap” ci-hi. Lamenlo pipi-a akaapleh gaalmaangpa tuukpah-a, si-hi. Tua ciang-in adangteng-in amaangpa-uh pua-in taai lehtaai mang uhhi.

Pu Pau Suang: Laaitui Khuasaat Hausapipa-in azaak ciang-in amahbek kuanto-a, Khuangleeng akhua mahmah-ah va buluh-hi. Nitui Ai nei ahihman-in thau-in kha lo-a, pasal amuh khempeuh nausau-tawh that-hi. Nupite khenkhat-in atate-uh gamsung-ah taaipih/bukpih uh-a, tuatengbek suakta kici-hi. Khuangleeng gaal-pen Mualbeem Innpite hitaleh Kaapteelte hitaleh kido zeuhzeuh uh-a, ahizong-in Laaitui-tawh kidona taktak hih thu-nihbek ci-in kiciamteh-hi. Ka’ Pi-in honggenna-ah, Khuangleeng gaalkaapte-in Pu Pau Suang’ Nitui Ai neihlam thei ahihman-in hongpelhden uh-a, Sialthah gaal-a Nuam Khua-ah Laamzaangte pasal tingteng 7 leh numei khat Khuangleengte-in hong buluh inzong Laaitui hongpelh uhhi” ci-hi. Tua pasal sagihte angawntan uh-a, alutang khempeuh tua numei puasak-in, numei-zong sila ding-in man-uh azaak ciang-in Pu Pau Suang-in kamkhaak ziau-in hong ciahsak kiik-uh cihzong honggen-hi.

Bangbang ahizong-in, 1800-1900 kaal-a Laaitui Hausapite’ khut pan-a sisan luanna ziak-in Khutkhial Luutna-tawh thupha akidawh hi-a, Sukte leh adangdangte-tawh kipaaikaan lo ahihman-in ko Laaitui Vontawite-in Pasian’ Maaipha Zonna-in Ankuang aluui ka-hi uhhi. Thuumna cihbang saansaan-zong hilo-a, liausum piakna cihbang maimai-zong hilo-hi. Thupha Kong Honna ding-a ka’ vaaihawm-uh Ankuang ahihi. Kuamah dangte-in buaipih leh kinialpih nading omlo-hi.

Hih Itna Ankuang’ hang-in Pasian-in Ama’ Maaipha ziingnii bang-in hong taanvaak tahen!

Zokhai