Vondeih Kep Ding – 108 (Dimno’ Pa)

Dear Tawngno,
Ka neulai-in ka lawmte pen kei banglo-in a nu leh a pa in a utut in omsak hi. Video et ding kham selo-in nitak vak ding zong kham selo uh hi. Tuabang hun ciangin ka lawmte eng in, khat veivei ciang bang na pu tungah heh in si leh bang ka ut hun tam veipi om hi. Naupangte nitak vakvak khawng ahoih lohna hong genzel in, thu honghilh zen hi. A sawtna ciangin cimtak in thu honghilh ding ciangin agei panin ka paikhia thei zel hi. Tuabang hun ciangin na pu in, ‘ i it te bek thu aki hilh hi’, hong cithei zel hi.

Tuin tua thute ka ngaihsut kik ciangin hi takpi mah hi. Hong it taktak te bek in i hoihlohna pan in i hoihna ding thu honggen in, thu honghilh uh hi. Hong taai-in, hong tawng uh hi. Tualo midangte-in bel lampi ah tangguak in i lum zongin hong don ding leh hong buaipih ding hilo uh hi.

Ahang in midangte-in muhdah thuak nuamlo-in i muhdah ding utlo uh hi. Muhdah thuak in thu hong hilh nuamlo uh hi. Hong it taktak te bek in i hoih ding hong deih luat manin i muhdah athuak zongin phamawh salo-in muhdah thuak in thu honghilh hong taaizaw uh hi.

Tuhun ah Semaria mihoih pa tawh akibang ding kitawm mahmah ta hi.

Tawngno aw, hong thuhilh zel na lawmte mudah khial ken la, nang’ sandan tawh akituak lo nalawm te zong enkhial tuan kei in! Amau hong gen thute limpha tak in ngaihsun in la, amauteng khempeuh na lawmhoih in ciamteh theih le cin hoih deih ing. Na cih peuhpeuh hong thukimpih na lawmte zong lawm hoih hi, cipah pah tuan ken.

Na nu leh ke’n thu hong hilh den ka hih uh teh, ko konggen khempeuh pen limtak in cimteh in la, hong zahtak in, aci nuam hituan peuhmah lo hing. Hong deihsak takpi leh hong deihsak takpi lo kithei lel in, deihsakna takpi tawh thu hong hilh zel, na lawmte enkhial, telkhial lo-in amaute pen nang adingin mi manphate ahih lam hong theisak nuam hi ing.

Hong nuihsan in hong maitai ziauziau te bek hong it leh hong deihsak nasak khialh khak ding ka lung hihmawh man hizaw hi.

Ni zong hong sa mahmah ta ahih manin omdan khawldan, annek tuidawn akipan kisil hun ding na ngawn dong ah tangval nungak ta na hih hangun na nu hong gen bangin na zuihtheih ding na hanciam un. Thu khat peuhpeuh ah nang pen kei tangin ading ding in muanhuai ta cin a, u zaw na hihna te ah na nau pen na telsiam in maw! Ngek bawl in an khawng akam ah bak ding aci nuam hilo ing a, u zaw lungsim nei-in na nau leh nang sanga nau zaw te hehpih ding aci nuam hizaw ing.

Hong phawk,
Na Pa

April 10, 2017