Bangkok ah pasal khatah Motorcycle tawh uikhat taalkaihgawp in kiman

Bangkok ah pasal khatah Motorcycle tawh uikhat taalkaihgawp in kiman

Thailand, Bangkok khuasung ah pasal khatah uikhat khautawh khihin Motorcycle nungah taalkaihgawp ahih manin kiman cih The Nation pan kiza hi. Tuapa pen kum 50 aphakhin Somchai Parnbutr akici khat ahihi.

Thursday zingsanglam in Bangkok khuasung ah thupiang hi a, amukha te’n Video zaihpah in, Facebook tungah khahkhia a, amukhapeuh in tuapa pen mawhsak mahmah uhhi.

Video Clip sungah tua Somchai Parnbutr kicipa in Motorcycle hawlin, anungah a ui khihtakpi ah, hatsakpian ahih manin ui in phazolo in taalkaihkhazel cihi.

Hih Video azaihpenzong Motorcycle atuangkawm hi a, tuapa akhawltheih nadingin amai ah khaktan in ama Motorcycle khawlsak cihi. Tua ui pen aki taalkaihna in gimmahmahta a, akamsung ah cilphuan kaai in, akhe tezong siluangliang cihi.

Tuazawh asawtlo in tuapa pen Thai Police te’n mankhiapah uhhi. Saimai Police Station panin amakaipi ahi Pol Colonel Thanakorn Konkaew in agenna ah Bangkok, Saimai District, Or-ngern Subdistrict sung aom Permsin Road kici lamzikpi tungah Thursday ni in thupiang cihi.

Tuapa pen kimankhin a, ahi zongin Police Station ah akipaipih ciangin bangmah thu kidong ciantheilo cihi. A innkuanpih te’n agenna ah alungsim cidamlo, Psychiatric Patient khat hi ci’n gensak uh a, zato alupzelna Hospital ID Card tezong lak uh cihi.

Ahi zongin adenciang palik te tungah tuapa in agenna ah hih ui pen kaikhia inla, mundang khatah vapai in ci’n hongkisawl cihi. Hih ui pen anei te innpan in nihveibang kipaikhiakhin himahleh a innmah ah ciahkikzel cihi.

Tutung petpet ciangin tua uipen animal Hospital ah kilumsak in, tuapan in midang khatin khoiding in laksawm cih kiza hi.

Hihthu apianma azanni Wednesday ni inzong Thailand, Rayong’s Pluak Daeng District sungah pasal kum 32 aphakhin khatin guipi anawipialai khat golum in, amvatvat cimawk hi. Tua uipi pen azanni mahin ano asuakkhialian hi a, ano te anawi apiapialaitak satlummawk ahih manin, atheikha te’n hehpihhuai saluamahmah uh a, tuapa pen velgawp uh cihi.

Ui pen akhangtosa gamte ah asa nekding in tuattheilo uh a, uigo uibawlsia khawng amuhkhak uhciangin mihing abawlsia danmah in ngaihsun uh a, kumpi thunei te’n thu bawlthei uhhi. Pawlkhat te’n uipen taneih bangin neiliang uh a, luppihpih liang uhhi. Mihing khatin ihpiankhiat sangin hihte ui hizawleng cihnop dekdek hunbang omphial hi 🙂

More: China ah Uisa zuakpawi kipankik leuleu

Tuabang kawmkal ah ui agosimsim mah ki om vevelai hi. Hih thuthang te Zomi khat adingin thupi sakholkei khamah niteh, ahi zongin gamdang ah omdan tatzia hongkidawm un cihna hizaw. Kawlgam nangawn ah Kawlte’n uisa ane te kihmahmah uhhi. (Uisa anene zongbel Burmese, Chinese, Korean, Vietnamese, etc… tampi omveve tham) China, Yulin City sungbang ah kumsim in uisa zuakpawi “Dog Meat Festival” ci’n aneiliang uh hileuleu. Uisa duhzong buaihuai mahmah 🙂 Sawltak #zomidaily