Kum 13 numeino khatin asihma apumpi Donate, midang 8 in nuntaklawh

Kum 13 numeino khatin asihma apumpi Donate, midang 8 in nuntaklawh

Jemima Layzell kici numeino pen 2012 kumin “Brain Aneurysm” natna tawh si a, asih laitak in kum 13 bekbek phapan hi. Asihkhitciang apumpi aki zangtheilai aomleh ci’n Organ Donation piakkhiatna neikhol hi.

Jemima Layzell pen England gamsung, Somerset County pan ahihi. Asihkhit ciangin ama pumpi sungpan akizangtheilai Heart, Pancreas, Lungs, Small bowel, Liver cihte midang akisam te tungah kipiasawn in, mi 8 in zangkhinta uhhi. Tua azangte pen England gamsung muntuamtuam pan hi uh a, naupang 5 leh ulian 3 in ama pumpi nutsiat azangkha uh ahihi.

Asihkhit zenzen hangin, ama pumpi piakkhiatna Organ Donation tungtawn in midang 8 te ii nuntakna ahonkhia himawk hi.

NHS Blood & Transplant te’n abeisa Organ Donation kibawlte a etkik uhciangin, mihingkhat pumpi panin Jemima Layzell zahin midang tampi akihuh omngeilo cihi.

Jemima Layzell ii anu apa te aki zaksak ciangin, atanu uh asikhin ahih zenzen hangin, ama pumpi tungtawn in midang 8 bnagin nuntaklawh cihpen anu apa tezong kipak mahmah uhhi.

NHS Blood & Transplant pan thunei te genna ah Jemima Layzell ii pumpi te lakah Heart, Small Bowel, Pancreas cihte pen mikhattek tungah ki thuahsawnsak “Transplant” cihi. Kidney tepen khattuak in mi 2 kihawmsak hi.

Liver pen alangtuak in kikhen in, midang nihte tungah ki thuahsak hi. Lungs zong midangkhat avekin ki tuahsak hi. Akigawm in mi 8 takin nuntaklawh a, abeisa in Organ Donor khatin hizah in mitampi huh ngeilo cihi.

Jemima Layzell asihzawh asawtlo in Great Ormond Street Hospital ah lungtang apiading angak naupang khatin zangtheipah a, nuntaklawhpah hi. Jemima Layzell ii anu apa te’n atheih uhciang in kipaklua uh a, atanu uh asikhin ahih zenzen hangin, midangte nuntakna apiathei, ahuhthei suak ahih manin lungdam mahmah uhhi.

Anu apa te genna ah asihma in kozong katanu uh apumpi piakkhiatding pen ngaihsut hamsa kasamahmah uhhi. Ahi zongin katanu uh ka it mahbangun, midangte’nzong atate uh itmahmahding, pumpi Organ apiakhia omkeileh asihlawh tampi omding cihte angaihsut uhciangin khial kisa hetlo uhhi. Atanu khatbekbek hanginzong midang 8 bangin nuntakna ngahkikthei cihpen thupi samahmah uhhi.

Tua ahih manin “The Jemima Layzell Trust” cih Organ Donation vaitawh kisai ahanthawn kawikawiding in kipawlna khat kipan uh a, Organ Donation athupitzia midang te tungah genpih kawikawi uhhi.

NHS Blood & Transplant te genkhiatna ah pumpi piakkhiatna Organ Donation pen tawmlailua mahmah a, Organ Donor akicing in omzolo ahih manin mitampitak in sihlawh ci uhhi.

England gamsung ah nungkum in Organ Donor ngakngak in, pumpi apiakhiading aomloh ciangin anunung ah asihlawh mi 457 bang om cimawk hi. Tualak ah naupang 14 kihel ci uhhi. Tulian laitak inzong Organ Donor angak cina mi 6414 tak om cimawk hi.

Related: Leitungbup Ekbuk Kipawlna “World Toilet Organization”

Organ Donation pen leitung gamtuamtuam bekthamlo, Kawlgam nangawn ah omta hi. Ihsihma in kasihkhitciang kapumpi ahoihlai, akizangthei teng nazang un ci’n zato leh kipawlna te ah ki piakhiathei hi.

Ih sihkhitciang ihpumpi pen leisung ah kiphumsuk in, asawtciang amuatcipding hilel hi. Tuaveve sangin ihpumpi ahoihlai, aki zangtheilai te midang khatpeuh in noptuamleh hoihzawlo dinghiam? Ihsihkhit nangawn in midang te nuntakna kihonthei laihi. Sawltak #zomidaily