Tulaitak Pope Francis South Korea ah

Tulaitak Pope Francis South Korea ah

Asia gamsung ah Pope azinloh kum 15 sawtkhin – Thursday (Aug 14) ni in South Korea gamsung ah azinding in Pope Francis khualzin hong kipankhia tahi. Vanlengtual atun ciangin South Korea President Park Geun-hye leh Reception Committee te’n nadawn ngeingai uhhi. Seongnam aom Seoul Air Base paninzong Pope Francis vaidawnna in thaupi nalot uhhi. Zomi te zong zinmangpi ihneih ciangin Zothau tawh vaidawnte ihihi a, Zomi te ngeina tawh ki valak mahmah bilbel hi.

Pope Francis hong zinkhiatna alunggulhpi pen ahihleh Korean Peninsula ah “kilemna leh ki lungtuah kikna” (peace and reconciliation) aomnading hi a, tuamah ka lungtang sungah omden hi ci’n genkhia hi.

Tua hi a, Pope Francis in maikalsung in Seoul ahzong “Reconciliation Mass” bawlding a, Pyongyang ah kilemna leh deihna aom nading Message khahkhiading cihzong Yonhap News Agency te’n genkhia hi.

Message to China

Pope Francis pen Italy panin vanleng tawh hong lengkhia hi a, China gamtung vanleng tawh anawk sungin Chinese President Xi Jinping adingin thu nangetsak manhi. “Chinese Air Space kalut akipan nang ading leh na gammi te ading bekthamlo, na gam leitang mahmah ading kilemna leh nopsakna aom nading in thu kongngetsak hi” cihi.

50 Million Population bang apha ahi South Korea gamsung ah Catholic biakna thuzui pen 10% khawngbek hi napi in, ahihhang Pope Francis agam ah azinding pen nakpitak in nakiging mahmah uhhi. Seoul khuapi lampi khempeuh ah Pope Francis vaidawnna Banner vive dimzihziah a, vanzuakna dawlte ahzong Pope Francis pahtawina in akibawl “Mini Francis Doll” kici lim it huai nono tampi kizuak hi.

Asia gamsung ah Pope hongzin nunungpen ahihleh 1999 kum hi a, tua hunlai in Pope John Paul II ahihi. Tua hunlai in Pope John Paul II pen India gamsung ah hongzin ahihi. ZD Sawltak #zomidaily